10.06.2017

«INSONIYLIKNING YUKSAK CHO‘QQISINI O‘ZBEKISTONDA KO‘RDIK»

«National Geographic»ning Rossiyadagi bo‘limi xodimlari O‘zbekiston bo‘ylab fotosayohat uyushtirdi. Ushbu safar ishtirokchilarining taassurotlari bayon qilingan maqola mazkur nashrning veb-saytida e’lon qilindi. Biz uni biroz qisqartirgan holda gazetxonlarimiz e’tiboriga havola qilamiz.

 

VAQT BO‘YLAB SAYOHAT

Moskvadan Samarqandga uchib kelgandayoq o‘zimizni boshqa davrga tushib qolganlik his etdik va bu tuyg‘u butun sayohat davomida bizni tark etmadi. Bu yerda 500 yil avval bo‘lgani kabi, odamlar oziq-ovqatlarni bozorlardan sotib olmoqda, ularning egnida milliy liboslar. Hatto eng kichik kafeda ham sizga chiroyli sopol idishlarda choy keltirishadi. Bu yerda hamma narsadan qadimiylik ufurib turibdi: O‘zbekiston xalqi ajdodlaridan qolgan o‘tmish merosiga hurmat bilan munosabatda bo‘lmoqda.

Mamlakatning tarixiy markazlari bo‘lmish Samarqand, Buxoro va Xivada barchasi bir necha asr oldin qanday bo‘lsa, o‘shandayligicha saqlanmoqda. Agar qaysidir imoratga ziyon yetadigan bo‘lsa, uni rekonstruksiya qilishadi. Buyuk Sohibqiron va uning avlodlari qabri joylashgan Amir Temur maqbarasida sayyohlar soni haddan tashqari ko‘pligiga guvoh bo‘ldik.

 

ODAMLAR

O‘zbekistonda istiqomat qilayotgan mahalliy aholi haqida gapiradigan bo‘lsak, ularning milliy qadriyatlarni asrash va unga amal qilish borasidagi intilishlarini butun dunyoga namuna qilib ko‘rsatsa arziydi. Biz fotoapparatlarimizni qo‘limizdan tushira olmadik. Shunday holatlar ham bo‘ldiki, ular ham bizni suratga olishdi. O‘zbekistonning sayyohlarni eng hayron qoldiradigan jihatlaridan biri — odamlarining ochiqko‘ngil, samimiy ekanligidir. Bu yerda yuqori darajadagi mehmondo‘stlikka guvoh bo‘ldik: ko‘chalardagi yo‘lovchilar, bozorlardagi sotuvchilar, umuman hamma bizga aziz mehmon ekanligimizni aytib, bir piyola choyga taklif qilar edi. Biz insoniylikning yuksak cho‘qqisini O‘zbekistonda ko‘rdik. Bu hissiyot bizni butun sayohat davomida tark etmadi.

Bozorlar haqida gapirmasak bo‘lmaydi. Rastalar bo‘ylab yurar ekanmiz, har biridan nimadir olib yeb boraverdik. Shu sababli ham delegatsiyamizdan ko‘pchilik ortiqcha vazn bilan ortga qaytdi.

 

TAOMLAR

Bir fikrni komil ishonch bilan ayta olaman: o‘zbek taomlari va sharqona dasturxon haqida ushbu fotosayohat ishtirokchilari hali ko‘p vaqt gapirib yuradi. Birinchidan, O‘zbekistonda «porsiya» umuman boshqacha ekan. Ovqat ko‘pligidan u suzilgan idishning chetlari mutlaqo ko‘rinmaydi. Ikkinchidan biz o‘zimiz bilan kattaroq jomadon olib kelmaganimizga achindik. Sababi, bu yerdagi ne’matlardan tatib ko‘rgach, yurtimizga mazasining tengi yo‘q shirinliklarni ham, ziravor va quruq mevalarni ham olib ketishni istadik. To‘g‘risini aytishimiz kerak, bizda bunday ne’matlar yo‘q.

O‘zbek oshxonasi haqida gapirar ekansan, palovga to‘xtalmay ilojing yo‘q. Axir o‘zbeklarda palov shoh taom hisoblanadi. Biz qayerga bormaylik, o‘sha yerdagi odamlar o‘zlari tayyorlaydigan palov eng mazali ekanini ta’kidlardi. Biz ham turli joylarda yegan palovlarimizni solishtirib ko‘rdik va baribir bir to‘xtamga kela olmadik. Hammasi o‘ziga xos edi.

O‘zbekistondan qaytar ekanmiz, barchamizni bir istak qamrab olgan edi: bu yerga albatta, yana kelamiz. Keyingi safar o‘zimiz bilan kattaroq jomadon olishni ham unutmaymiz.

 

Temur A’ZAM tayyorladi.



DB query error.
Please try later.