30.05.2017

DUNYO BILAN HAMNAFAS, AHIL VA TOTUV YASHASH — O‘ZBEKISTONLIKLARNING QAT’IY QARORI

O‘zbekiston Respublikasi Prezidenti Shavkat Mirziyoyevning 2017 yil 7 fevraldagi farmoni bilan tasdiqlangan Harakatlar strategiyasida yurtimizda millatlararo totuvlik va diniy bag‘rikenglikni ta’minlash, yon-atrofimizda xavfsizlik, barqarorlik va ahil qo‘shnichilik muhitini shakllantirish, yurtimizning xalqaro nufuzini mustahkamlash masalalariga alohida e’tibor qaratilgan.

Zero, mazkur sohadagi munosabatlarni takomillashtirishdan maqsad, avvalo, mamlakatimizda yashayotgan turli millat va elatlar vakillari o‘rtasidagi do‘stlik va inoqlikni kuchaytirish orqali mavjud demokratik konstitutsiyaviy tuzumni va xavfsizlikni mustahkamlashga xizmat qilsa, ikkinchi tomondan, O‘zbekistonning jahon hamjamiyatidagi nufuzini yanada yuksaltirishga, do‘stona munosabatlarni rivojlantirishga hamda dunyo nigohida yurtimizning jozibadorligini oshirishga qaratilgandir.

Harakatlar strategiyasidagi ustuvor vazifalarni amalga oshirish doirasida Prezidentimiz tomonidan qabul qilingan «Millatlararo munosabatlar va xorijiy mamlakatlar bilan do‘stlik aloqalarini yanada takomillashtirish chora-tadbirlari to‘g‘risida»gi farmonni ulkan ijtimoiy-siyosiy ahamiyatga ega hujjat sifatida e’tirof etish kerak.

Farmonda ushbu sohadagi davlat siyosatining ustuvor yo‘nalishlari mamlakatimiz taraqqiyotiga, maqsadlariga hamohang tarzda chuqur tahlil etilib, bag‘rikenglik va insonparvarlik madaniyatini yanada rivojlantirish, millatlararo va konfessiyalararo hamjihatlikni, fuqarolar o‘rtasidagi totuvlikni mustahkamlash, barcha fuqaroga millati va diniy e’tiqodidan qat’i nazar, teng huquq va imkoniyatlar yaratish, yosh avlodni vatanparvarlik, milliy va umuminsoniy qadriyatlarga hurmat, vatanga muhabbat va sadoqat ruhida tarbiyalash borasidagi ishlarni kuchaytirish bilan bog‘liq aniq chora-tadbirlar belgilangan.

Farmonda O‘zbekistonda Respublika baynalmilal madaniyat markazi, 138 milliy madaniy markaz, O‘zbekiston xorijiy mamlakatlar bilan do‘stlik va madaniy-ma’rifiy aloqalar jamiyatlari kengashi, shuningdek, 34 do‘stlik jamiyati faoliyat yuritayotgan bo‘lib, ular yurtimizdagi barcha millat va etnik diasporalarning tarixi, madaniyati, ma’naviy qadriyatlari, milliy an’analari va urf-odatlarini saqlash hamda har tomonlama rivojlantirish tamoyillariga asosan ish olib borayotgani alohida e’tirof etildi. Bu faol «xalq diplomatiyasi» asosida chet eldagi vatandoshlarimiz bilan muntazam va o‘zaro foydali munosabatlarni yo‘lga qo‘yish, xorijiy mamlakatlar bilan do‘stona munosabatlarni va madaniy-ma’rifiy aloqalarni yanada mustahkamlash borasida bizda juda katta imkoniyatlar mavjudligini ko‘rsatadi.

Ushbu farmon asosida Vazirlar Mahkamasi huzurida Millatlararo munosabatlar va xorijiy mamlakatlar bilan do‘stlik aloqalari qo‘mitasining tashkil etilishi fuqarolarimiz ongida katta, ko‘p millatli yagona oilaga mansublik tuyg‘usini mustahkamlash, milliy madaniy markazlar va do‘stlik jamiyatlari faoliyatini har tomonlama qo‘llab-quvvatlash va yanada rivojlantirish, xorijiy mamlakatlar bilan madaniy-ma’rifiy aloqalarni kengaytirish borasidagi ishlarga yangi mazmun baxsh etadi.

Ko‘p vaqtdan beri O‘zbekiston hududida 130 dan ortiq millat va elat vakillari bir oila bo‘lib yashab keladi.

Yurtimizda tinch va farovon hayotni asrash, xorijiy mamlakatlar bilan do‘stona munosabatlar va madaniy-ma’rifiy aloqalarni rivojlantirish, chet eldagi hamyurtlar bilan yaqin va o‘zaro manfaatli munosabatlarni yo‘lga qo‘yish, shuningdek, aholi, ayniqsa, yoshlar ongida insonparvarlik qadriyatlarini, turli millat vakillari o‘rtasida o‘zaro hamjihatlikni yanada mustahkamlash, bu borada amalga oshirilayotgan ishlarni sifat jihatidan yangi bosqichga ko‘tarishni taqozo etayotgan edi. Ushbu farmonning qabul qilinishi va uning asosida yangi qo‘mitaning tashkil etilishi bilan yuqoridagi kabi masalalarga huquqiy yechim topildi.

Farmonga ko‘ra, xorijiy mamlakatlar bilan do‘stona munosabatlarni, chet eldagi hamyurtlarimiz va turdosh tashkilotlar bilan aloqalarni yanada mustahkamlash vazifalari alohida belgilangan. Xususan, qo‘mita mamlakatimizda faoliyat yuritayotgan xorijiy mamlakatlarning tashkilotlari va diplomatik vakolatxonalari, xorijiy davlatlarda faoliyat ko‘rsatayotgan turdosh tashkilotlar bilan samimiy va o‘zaro hurmatga asoslangan aloqalar o‘rnatish hamda izchil rivojlantirishga qaratilgan ishlarni tizimli amalga oshiradi.

Bu boradagi ishlar xalqaro hamjamiyatda respublikaning nufuzi va maqomini yanada yuksaltirish, O‘zbekistonda huquqiy demokratik davlat va kuchli fuqarolik jamiyatini barpo etish borasida erishilgan yutuqlarni keng jamoatchilikka yetkazishga qaratilgan. Shu maqsadda o‘zbek xalqining boy tarixi, madaniyati, ma’naviy qadriyatlari va an’analari, shu zaminda tug‘ilib o‘sgan buyuk olim va mutafakkirlar merosi, ularning jahon sivilizatsiyasiga qo‘shgan hissasini keng namoyish etish bo‘yicha tadbirlar o‘tkaziladi.

Qo‘mita o‘zbek xalqining mamlakatimiz tashqarisidagi tarixiy va madaniy meros obyektlarini asrab-avaylashni ta’minlash uchun davlat va nodavlat tashkilotlar bilan faol hamkorlik qilish masalasiga ham alohida e’tibor qaratadi. Farmonga muvofiq, hududlarda millatlararo munosabatlarni rivojlantirish va xorijiy mamlakatlar bilan do‘stona aloqalarni yo‘lga qo‘yish borasidagi ishlarni muvofiqlashtirish Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlarining jamoat va diniy tashkilotlar bilan aloqalar bo‘yicha o‘rinbosarlari zimmasiga yuklatilmoqda.

Xulosa qilib aytganda, farmon qoidalarining hayotga tatbiq etilishi mamlakatimizda millatlararo va konfessiyalararo totuvlik, tinchlik va barqarorlikni ta’minlash bo‘yicha yaxlit tizimni rivojlantirish, milliy madaniy markazlar uchun yanada qulay va keng imkoniyatlar yaratish, ularning bunyodkorlik tashabbuslari va intilishlarini qo‘llab-quvvatlash, faoliyatini sifat jihatidan yangi bosqichga ko‘tarish, xorijiy mamlakatlar bilan do‘stlik va madaniy-ma’rifiy aloqalarini yanada rivojlantirish, «xalq diplomatiyasi» vositasida chet eldagi vatandoshlar bilan munosabatlarni kengaytirishga xizmat qiladi.

 

Oybek TURG‘UNOV,

O‘zbekiston Respublikasi Prezidenti huzuridagi

Davlat boshqaruvi akademiyasi kafedra mudiri,

yuridik fanlar nomzodi.



DB query error.
Please try later.