22.01.2019

SOLIQDAGI O‘ZGARISHLARNI KIM QANDAY TUSHUNYAPTI?..

Poytaxtimizdagi «O‘zekspomarkaz» majmuasida Davlat soliq qo‘mitasi tomonidan O‘zbekiston Respublikasi soliq va byudjet siyosatining 2019 yilgi asosiy yo‘nalishlaridan kelib chiqib, soliq qonunchiligiga kiritilgan o‘zgartirish va qo‘shimchalar mazmun-mohiyatini aholi va tadbirkorlik sub’ektlariga tushuntirish, savollarga javob berish maqsadida ko‘rgazmali seminar tashkil etildi. Unda O‘zbekiston Respublikasi Oliy Majlis Senati va Qonunchilik palatasi, Moliya vazirligi, Bosh prokuratura, Bojxona qo‘mitasi, Savdo-sanoat palatasi, Markaziy bank hamda mamlakatimizda faoliyat yuritayotgan chet el vakolatxonalari rahbarlari, Xalqaro valyuta jamg‘armasi va Jahon bankining O‘zbekistondagi vakillari ishtirok etdi.

Seminarda Prezidentimizning 2018 yil 28 dekabrdagi Oliy Majlisga Murojaatnomasi, 2018 yil 26 dekabrdagi «O‘zbekiston Respublikasining 2019 yilgi asosiy makroiqtisodiy ko‘rsatkichlari prognozi va Davlat byudjeti parametrlari hamda 2020-2021 yillarga byudjet mo‘ljallari to‘g‘risida«gi qarorida belgilangan ustuvor vazifalar mazmun-mohiyatiga asosiy e’tibor qaratilib, ishtirokchilarga batafsil ma’lumotlar berildi.

Shuningdek, seminarda Davlat soliq qo‘mitasi raisi Behzod Musayev va boshqalar 2018 yil 24 dekabrda O‘zbekiston Respublikasining «Soliq va byudjet siyosatining 2019 yilga mo‘ljallangan asosiy yo‘nalishlari qabul qilinganligi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida»gi qonuni qabul qilingani hamda unga muvofiq, O‘zbekiston Respublikasining «Fuqarolarning davlat pensiya ta’minoti to‘g‘risida«gi qonuni, Byudjet kodeksi va Soliq kodeksiga o‘zgartirishlar kiritilganiga alohida to‘xtalib o‘tdi. Shuningdek, qonun hujjatlarini to‘g‘ridan-to‘g‘ri amal qilish prinsipini ta’minlash maqsadida Soliq kodeksi yuridik shaxslardan olinadigan foyda solig‘i, jismoniy shaxslardan olinadigan daromad solig‘i, qo‘shilgan qiymat solig‘i, yuridik shaxslarni mol-mulk solig‘i va yagona ijtimoiy to‘lovi stavkalarini joriy etuvchi 1591, 181, 2111, 2691, 3081 - moddalar bilan to‘ldirilgani to‘g‘risida ham ma’lumot berdi.

Yana shuni qayd etish lozimki, 2019 yil 1 yanvardan boshlab joriy etilgan soliq solishning yangi tartiblari davlat byudjeti va mahalliy byudjetlar daromadlarini oshirishga, soliq qonunchiligini soddalashtirish, insofli soliq to‘lovchilarning huquqlari va qonuniy manfaatlari himoyasini kuchaytirishga qaratilgan. Jismoniy shaxslar daromadini soliqqa tortishni takomillashtirish maqsadida barcha fuqarolar uchun jismoniy shaxslardan olinadigan daromad solig‘ining yagona stavkasi 12 foiz miqdorida joriy etilgan bo‘lsa, mehnatga haq to‘lash jamg‘armasiga soliq yukini kamaytirish maqsadida yagona ijtimoiy to‘lov stavkasi 25 foizdan 12 foizgacha kamaytirildi (byudjet tashkilotlari va davlat ulushi 50 foizdan yuqori tashkilotlar bundan mustasno). Fuqarolarning mehnatga haq to‘lash turidagi daromadlaridan fuqarolarning byudjetdan tashqari Pensiya jamg‘armasiga to‘lab kelingan 8 foizlik sug‘urta badallari bekor qilindi. Foyda solig‘i to‘lovchilariga soliq yukini kamaytirish, investitsiyalar miqdorini oshirish uchun qulay shart-sharoitlar yaratilmoqda. Xususan, tijorat banklari uchun foyda solig‘i stavkasi 22 foizdan 20 foizgacha, korxona va tashkilotlar uchun 14 foizdan 12 foizgacha, dividend va foiz ko‘rinishidagi daromadlar uchun 10 foizdan 5 foizgacha kamaytirildi.

Yuridik shaxslarning aylanmasi (tushumi)dan undiriladigan davlat maqsadli jamg‘armalariga majburiy ajratmalar bekor qilindi. Soliq solishning soddalashtirilgan rejimidagi soliq to‘lovchilarga soliq siyosatini takomillashtirishning salbiy ta’sirini kamaytirish maqsadida yuridik shaxslarning mol-mulkiga solinadigan soliq stavkasini 5 foizdan 2 foizgacha pasaytirishga erishildi. Bundan tashqari, yillik aylanmasi 1 milliard so‘mgacha bo‘lgan mikrofirma va kichik korxonalar uchun yagona soliq to‘lovi stavkasi 5 foizdan 4 foizgacha kamaytirildi. Aylanmasi 100 million so‘mgacha bo‘lgan yakka tartibdagi tadbirkorlar uchun qat’iy belgilangan soliq stavkalari 13-40 foizga kamaytirildi. 100 million so‘mdan yuqori va 1 milliard so‘mgacha bo‘lgan yakka tartibdagi tadbirkorlarga aylanmadan 4 foizlik stavkada soliq to‘lashga o‘tkazish yo‘li bilan qat’iy belgilangan soliq bekor qilindi.

Ko‘rgazmali seminarda soliq to‘lovchilarga soliq va moliyaviy hisobotlarni shakllantirishda amaliy yordam va maslahatlar berilib, umumbelgilangan soliqlarni to‘lash tartibi ko‘rgazmali va tarqatma materiallar yordamida tushuntirildi.

Soliqlarni vaqtida to‘lab kelayotgan, qonunga itoatkor, insofli soliq to‘lovchilar Davlat soliq qo‘mitasining diplom va esdalik sovg‘alari topshirildi.

 

Toshtemir XUDOYQULOV,

«O‘zbekiston ovozi» muxbiri.



DB query error.
Please try later.