04.02.2017

PARLAMENT A’ZOLARI

hududlarda aholi vakillari bilan muloqotda bo‘lib, muammolarni o‘rganmoqda. Muxbirlarimiz ularga hamroh bo‘lishmoqda

Toshkent viloyatidan saylangan Senat a’zolari va deputatlar Quyi Chirchiq tumanida saylovchilar va elektorat vakillarining turmush sharoiti, kayfiyati, muammolari bilan yaqindan tanishmoqda.

Oliy Majlis Senati a’zosi Maqsuda Vorisova, Qonunchilik palatasidagi O‘zbekiston XDP fraksiyasi a’zosi Aliya Yunusova kunni ko‘ptarmoqli markaziy poliklinika faoliyati bilan tanishishdan boshladi. Biz ham ularga hamrohlik qildik.

Bolalar bo‘limiga kirib bordik. Yo‘l-yo‘lakay poliklinika mudiri Gulbahor Saxiyeva shifoxona haqida ma’lumot berdi:

— Poliklinikamiz 200 o‘ringa mo‘ljallangan. Ikki smenada ishlab kelyapmiz. Shifoxonada tor doiradagi mutaxassislar, diagnostika, sil kasalliklari, bolalar bo‘limi har kuni aholi xizmatida. Rentgen, UZI, EKG tekshiruvlari yo‘lga qo‘yilgan.

— Aholiga sifatli xizmat ko‘rsatilishida qanday muammolar, kamchiliklar bor?

— Bizda tor doiradagi mutaxassislar yetishmaydi. Misol uchun, akulist, fitiziator, bolalar nevropotologi kabi shifokorlarga ehtiyoj sezilyapti.

Qishloq vrachlik punktlari bo‘yicha ham bizni o‘ylantirayotgan masalalar oz emas. Tumanda 17 ta qishloq vrachlik punkti faoliyat yuritadi. Ularning atigi ikkitasi maxsus loyiha asosida qurilgan binoda, 15 tasi esa moslashtirilgan binoda joylashgan. Ulug‘bek, Toshovul qishloq vrachlik punktlarining binolari zamon talablariga javob bermaydi. 6 tasi kapital ta’mirga muhtoj.

— Tez tibbiy yordamning ahvoli qanday?

— Tez tibbiy yordam markaziy bo‘limimiz bor. Unga 8 shoxobcha biriktirilgan. Hozirgi kunda 10 ta tez tibbiy yordam mashinasi xizmat ko‘rsatayotgan bo‘lsa, ularning 7 tasi yaroqlilik muddatini o‘tagan.

Parlament a’zolari palatalardagi shart-sharoitlar bilan tanishib, bemorlar va ularning ota-onalari bilan suhbatlashdi.

Shundan so‘ng shifoxonaning flyuorografiya, tez yordam, stomatologiya bo‘limlari, sil kasalliklariga qarshi kurash dispanserida bo‘ldik. Bemorlar bilan suhbatlashilib, ularning tibbiy xizmat ko‘rsatish sifati haqidagi fikr va takliflar o‘rganildi.

— Prezidentimiz Xalq bilan muloqot va inson manfaatlari yili munosabati bilan tuman va shaharlarda haqiqiy ahvolni o‘rganib, tegishli rahbarlarning hisobotini xalq deputatlari Kengashlari sessiyasi muhokamasiga kiritish taklifini ilgari surdi, — deydi Oliy Majlis Senati a’zosi Maqsuda Vorisova. —Bu naqadar to‘g‘ri va dolzarb taklif bo‘lganini bugun yana bir bor angladim, xulosa qildim. Albatta, Oliy Majlis Qonunchilik palatasi deputatlari va senatorlarning ijroiya hokimiyati organi, prokuratura va ichki ishlar bo‘limining faoliyatini o‘rganib, tahlil qilishi, tegishli xulosalar berishi samara keltiradi, muammolarni hal etishda katta ahamiyat kasb etadi, deb ishonaman.

Bugun poliklinika faoliyati bilan yaqin tanishdik, bu yerdagi shart-sharoitni o‘z ko‘zimiz bilan ko‘rdik. Bolalar bo‘limi kapital ta’mirga muhtoj. Binoning ichki qismida suv yo‘q. Bundan tashqari, jihozlar talab darajasida emas. Reanimatsiya xonalari ham ta’mirtalab...

Do‘stobod shaharchasi, Ibn Sino ko‘chasidagi Matluba Uskinboyeva xonadonidamiz.

— Ikki o‘g‘lim, bir qizim bor, — deydi u. — Qizimni turmushga uzatganman. Katta o‘g‘lim mashina parkida ishlaydi. Kichigi uch yildan beri kasal. Umurtqasi singan. Shundan beri harakatsiz yotibdi.

— O‘g‘lingiz uchun nafaqa olasizmi? — so‘radi deputat.

— Ha, ancha yugur-yugur bilan to‘g‘irladim.

Deputat Aliya Yunusova Matluba ayaning 18 yoshli o‘g‘li bilan suhbatlashdi. Uning holati, o‘y-fikrlari bilan qiziqdi.

— Yilning har choragida qonunchilikka muvofiq, saylovchilar bilan uchrashuvlar o‘tkazilardi, — dediAliya Yunusova xonadondan chiqar ekanmiz. — Uchrashuvlarda aholi va elektorat vakillari tomonidan turli muammolar, hududlarni ijtimoiy-iqtisodiy rivojlantirishga oid takliflar ko‘tarilardi. Biroq ularni o‘sha joyning o‘zida hal etish, ijroiya hokimiyati organi mas’uliyatini oshirish bo‘yicha aniq mexanizm yo‘q edi. Biz, deputatlar haqiqiy ahvolni yaqindan bilmaganimiz uchun umumiy xulosalar chiqarar edik. To‘g‘risini aytganda, aksariyat hollarda bizga qat’iyat yetishmasdi. Bundan keyin zimmamizdagi mas’uliyat ikki hissa ortadi.

Kunning ikkinchi yarmida O‘zbekiston XDP fraksiyasi a’zosi Shuhrat Tursunboyevga hamroh bo‘ldik.

Qurilish va uy-joy kommunal xo‘jaligi kasb-hunar kollejida o‘quvchilar ikki smenada o‘qisharkan.

— Kollejimizda 869 nafar o‘quvchi 7 yo‘nalishda ta’lim oladi, — deydi direktor o‘rinbosari Ilhom Hayitqulov. — Ularning amaliyoti bo‘yicha 26 tashkilot bilan shartnoma tuzilgan. O‘tgan yili kollejni 345 o‘quvchi tamomladi, 321 nafarining bandligi ta’minlangan. Bitiruvchilarning 38 foizi o‘z mutaxassisligi bo‘yicha ishga joylashdi. Bu yil kollejni 298 nafar o‘quvchi bitiradi.

— Qaysi masalalar sizlarni o‘ylantiryapti? O‘quvchilarga yana qanday sharoitlar yaratilishi kerak? — so‘radi deputat.

— Kollejimiz 2007 yilda qurilgan. Ayni paytda ta’mirga muhtoj. Gul, Do‘stlik hamda Abay mahallalaridan kelib o‘qiydigan o‘quvchilarga qatnash qiyin. Shu yo‘nalishlarga avtobus qo‘yilsa, biroz yengillik bo‘lardi.

Deputat komputer, tikuvchilik xonalari, sport zallariga kirdi. Kollejda komputerlar, sport anjomlari hamda darsliklar yetishmas ekan. Ikkinchi bosqich o‘quvchilari ham deputatga shu muammolar haqida aytishdi.

— Yana qanday takliflaringiz bor?

— Bugun xorijiy tillarga qiziqish va talab kuchli, — deydi o‘quvchi Saodat To‘layeva. — Tumanimizda til markazlari ochilishini xohlaymiz. Do‘stlarim, tengdoshlarim orasida ingliz tiliga qiziquvchilar juda ko‘p. Toshkent shahriga yoki qo‘shni tumanlarga borib til o‘rganishimizga to‘g‘ri kelyapti.

Oliy Majlis Qonunchilik palatasidagi O‘zbekiston XDP fraksiyasi a’zosi Akmal Umaraliyev kun davomida tumandagi ichki yo‘llarning ahvolini o‘rgandi. Deputatning xulosalari, fikrlari bilan qiziqdik.

— Bugun Mingchinor mahallasidan Gulbahor mahallasigacha bo‘lgan yo‘llarni o‘rgandik, — dedi deputat. — Ochiq aytadigan bo‘lsak, yo‘llar ta’mirtalab. Tuman yo‘l xo‘jaligi pudrat ta’mirlash foydalanish korxonasining joriy yil rejalari bilan tanishdik. Korxona jami uzunligi 195 km bo‘lgan davlat va viloyat ahamiyatidagi avtomobil yo‘llariga xizmat ko‘rsatar ekan. Korxona mutasaddilarining ma’lumotiga ko‘ra, bu yil viloyat ahamiyatidagi 3 km yo‘lga yangi asfaltbeton yotqizish, shuningdek, hajmi 800 m2 keladigan yo‘l qismlarini ta’mirlash rejalashtirilgan.

— Joylardagi muammolarni hal etishda bizning zimmamizda ham katta vazifalar turibdi, — xulosa qiladi deputat. — Shunchaki muloqot o‘tkazish bilan chegaralanib qolmasdan, uchrashuvlardan keyin aniq natija uchun ishlashimiz, saylovchilarning murojaatlari, muammolariga yechim topish ustida izlanishimiz, intilishimiz, kurashishimiz kerak.

 

Gulruh ODASHBOYEVA,

«O‘zbekiston ovozi» muxbiri.



DB query error.
Please try later.