Oxirgi sonda



Ko'p o'qilgan maqolalar



Dolzarb mavzu



Maqolalar arxivi

«    Iyul 2017   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
10.12.2016

MUHIM QONUN LOYIHALARI QABUL QILINDI

6 dekabr kuni Oliy Majlis Qonunchilik palatasining navbatdagi majlisi bo‘lib o‘tdi. Unda jamiyat hayotining turli sohalarida amalga oshirilayotgan islohotlarni yanada chuqurlashtirish, fuqarolarning, tadbirkorlik subyektlarining huquqlari, erkinliklari va qonuniy manfaatlarini himoya qilishga qaratilgan qonun loyihalari qabul qilindi.

Parlament quyi palatasi majlisining kun tartibiga kiritilgan masalalar avvalroq tegishli tartibda O‘zbekiston Xalq demokratik partiyasi fraksiyasining yig‘ilishida ham vazirlik va idoralar, fuqarolik jamiyati institutlarining vakillari ishtirokida muhokama qilindi.

Fraksiya a’zolari dastlab «O‘zbekiston Respublikasi prokuratura organlari xodimlari kunini belgilash to‘g‘risida»gi qonun loyihasini atroflicha ko‘rib chiqishdi. Ta’kidlanganidek, prokuratura organlari xodimlarining kasb bayramini belgilash prokuratura organlari faoliyati samaradorligini yanada oshirish, xizmat vazifalarining vijdonan bajarilishini rag‘batlantirishga xizmat qiladi.

Shundan so‘ng deputatlar «Tadbirkorlik faoliyatining jadal rivojlanishini ta’minlashga, xususiy mulkni har tomonlama himoya qilishga va ishbilarmonlik muhitini sifat jihatidan yaxshilashga doir qo‘shimcha chora-tadbirlar qabul qilinganligi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida»gi qonun loyihasini muhokama etdi.

Yurtimizda xususiy mulk daxlsizligini himoya qilishning ishonchli tashkiliy-huquqiy mexanizmlari yaratilmoqda. Xususiy mulkni himoya qilish, ishbilarmonlik muhiti va biznes yuritish shart-sharoitlarini yanada yaxshilashga qaratilgan qonunlar hamda boshqa normativ-huquqiy hujjatlar qabul qilindi va ular samarali amalga oshirilmoqda.

Joriy yil 5 oktabr kuni qabul qilingan tadbirkorlik faoliyatining jadal rivojlanishini ta’minlashga, xususiy mulkni har tomonlama himoya qilishga va ishbilarmonlik muhitini sifat jihatidan yaxshilashga doir qo‘shimcha chora-tadbirlar to‘g‘risidagi O‘zbekiston Respublikasi Prezidenti farmoni bu yo‘nalishdagi izchil islohotlarning mantiqiy davomi bo‘ldi.

— Mazkur farmonni amalga oshirishga qaratilgan qonun loyihasi tadbirkorlik subyektlari faoliyatiga asossiz aralashuvlar, jinoyat ishlari bo‘yicha taftishlar o‘tkazishni aniq tartibga solishni nazarda tutadi, — deydi O‘zbekiston XDP fraksiyasi a’zosi Shuhrat Mamajonov. — Unda moliyaviy-xo‘jalik faoliyatini amalga oshirish chog‘ida zararning o‘rni qoplangan va huquqbuzarlik oqibatlari ixtiyoriy ravishda bartaraf etilgan taqdirda, birinchi marta huquqbuzarlik sodir etgan tadbirkorlik subyektlari, xodimlari, shuningdek, davlat ro‘yxatidan o‘tkazmagan holda tadbirkorlik faoliyatini amalga oshirgan shaxslarni yetkazilgan javobgarlikning barcha turlaridan ozod etish masalalari nazarda tutilmoqda. Shuningdek, tadbirkorlik subyektlariga nisbatan tadbirkorlik faoliyati bilan shug‘ullanish huquqidan mahrum etish tarzidagi jinoiy jazoni qo‘llashga taqiq belgilanyapti.

Mazkur hujjatda nazarda tutilayotgan me’yorlar xususiy mulk va tadbirkorlik faoliyatini rivojlantirishga xizmat qiladi. Natijada aholi bandligini ta’minlash, ularning turmush sharoitini yanada yaxshilash imkoniyati ortadi. Bu, albatta, partiyamiz elektorati manfaatlariga to‘liq mos keladi.

Deputatlar «Soliq va byudjet siyosatining 2017 yilga mo‘ljallangan asosiy yo‘nalishlari qabul qilinganligi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida»gi qonun loyihasini ham qo‘llab-quvvatlashdi.

— Qonun loyihasiga ko‘ra, «Fuqarolarning davlat pensiya ta’minoti to‘g‘risida»gi, «Lizing to‘g‘risida»gi, «Tadbirkorlik faoliyati erkinligining kafolatlari to‘g‘risida»gi qonunlarga, shuningdek, Soliq kodeksiga o‘zgartirishlar kiritish nazarda tutilmoqda, — deydi O‘zbekiston XDP fraksiyasi a’zosi Qahramon Mirzayev. — Mazkur o‘zgartishlar kelgusi yilga mo‘ljallangan soliq va byudjet siyosatining tasdiqlangan konsepsiyalarini amalga oshirish, qonun hujjatlaridagi ayrim me’yorlarning aniqlashtirilishi va bir xil qo‘llanilishini ta’minlash bo‘yicha huquqiy shart-sharoitlar yaratish bilan bog‘liqdir.

Ushbu qonunlar parlament Qonunchilik palatasi tomonidan qabul qilinib, Senatga yuboriladigan bo‘ldi.

Deputatlar, shuningdek, birinchi o‘qishda muhokama etilgan «Intellektual mulk to‘g‘risidagi qonun hujjatlari yanada takomillashtirilishi munosabati bilan O‘zbekiston Respublikasining ayrim qonunlariga qo‘shimcha va o‘zgartishlar kiritish haqida»gi qonun loyihasi yuzasidan o‘z taklif-mulohazalarini bildirishdi.

— Ushbu hujjat loyihasida tovar bozorlarida noqonuniy raqobatga qarshi yanada samarali kurashish masalalari nazarda tutilgan, — deydi O‘zbekiston XDP fraksiyasi a’zosi Ahad Ahmedov. — Gap shundaki, ayrim hollarda intellektual mulk egalarining mahsulot belgilaridan noqonuniy foydalanish holatlari uchrab turadi. Mazkur qonun loyihasida ularning huquqlarini yanada ishonchli himoya qilishga qaratilgan me’yorlar belgilanmoqda. Ularning amaliyotga joriy etilishi tadbirkorlik subyektlariga ro‘yxatga olingan tovar belgilari to‘g‘risidagi axborotlardan bemalol foydalanish, tegishli sud qarorlarining yanada aniq va bir xilda ifodalanishini ta’minlash imkonini beradi.

Qizg‘in mulohazalarga boy tarzda o‘tgan yig‘ilishda boshqa huquqiy hujjatlar ham elektorat manfaatlaridan kelib chiqib, muhokama etildi.

 

Gulruh ODASHBOYEVA,

«O‘zbekiston ovozi» muxbiri.



DB query error.
Please try later.