22.05.2018

PSIXIATRIYA YORDAMI BO‘YICHA YANGI QONUN LOYIHASI ISHLAB CHIQILADI

Oliy Majlis Qonunchilik palatasidagi O‘zbekiston XDP fraksiyasining navbatdagi yig‘ilishida «Psixiatriya yordami ko‘rsatish tizimini tubdan takomillashtirish chora-tadbirlari to‘g‘risida»gi Prezident qarorining ahamiyati haqida so‘z yuritildi.

Fraksiya a’zolari joylardagi haqiqiy holatni o‘rganish jarayonida aholining ruhiy sog‘lig‘ini tekshiruvdan o‘tkazish bilan bog‘liq muammolar kuzatilayotganini ta’kidlashdi. Ruhiy holati buzilgan shaxslarni profilaktika qilish, ularga tashxis qo‘yish, davolash, parvarishlash va tibbiy-ijtimoiy jihatdan tiklash yuzasidan qator kamchiliklar ko‘zga tashlanmoqda.

— Psixiatriya yordami ko‘rsatish tizimining samarali faoliyatini ta’minlovchi huquqiy bazani takomillashtirishni zamon talab qilmoqda, — dedi Oliy Majlis Qonunchilik palatasidagi O‘zXDP fraksiyasi a’zosi Aliya Yunusova. — Chunki «Psixiatriya yordami ko‘rsatish to‘g‘risida»gi qonunning ayrim me’yorlari eskirgan va qayta tahrirga muhtoj. Ruhiy hastalikka chalingan bemorlarga aniq tashxis qo‘yish, ularni davolash hamda parvarishlash uchun zamonaviy diagnostika asbob-uskunalari hamda tibbiy reabilitatsiya vositalari talab etiladi.

Fraksiyamiz fikricha, psixiatriya xizmati muassasalarining ayrim vazifalarini sog‘liqni saqlashning xususiy sektoriga o‘tkazish kerak. Aholiga psixiatriya yordami ko‘rsatish sohasida davlat-xususiy sherikchiligini rivojlantirish, ko‘rsatilayotgan xizmatlar sifatini yaxshilash uchun investitsiyalar jalb qilish lozim. Joylarda bo‘lganimizda deputatlar tomonidan tizimli muammolar ham o‘rganilgan. Mazkur muammolar tibbiy xizmat sifatiga ham salbiy ta’sir ko‘rsatmoqda. Shuning uchun psixiatriya yordami ko‘rsatish boshqaruvini chuqur qayta ko‘rib chiqish zarur, deb hisoblaymiz.

Psixiatriya sohasida fundamental, amaliy va innovatsion ilmiy tadqiqotlarni faollashtirish uchun xususiy shifoxonalar faoliyatini kengaytirish kerak. Har bir hududda aholining barcha qatlami, xususan, bolalar va o‘smirlar uchun qulay sharoitlarda, sifatli psixiatriya xizmatidan foydalanishni yo‘lga qo‘yish lozim. Bunda yuqori malakali mutaxassislarni tayyorlash, psixiatriya yordami ko‘rsatishni samarali boshqarish mexanizmini joriy etish ustuvor masala hisoblanadi. Sohadagi ilmiy tekshirish ishlarini yuqori pog‘onaga olib chiqish zarur.

Fraksiyamiz a’zolari tomonidan ikki yil davomida joylarda o‘rganilgan masalalar, psixiatriya yordami ko‘rsatish bo‘yicha jamoatchilik fikrini inobatga olgan holda qonun loyihasi ham tayyorlanmoqda. Aholi murojaatlari sohada mutaxassislar yetishmasligi eng dolzarb masala ekanini ko‘rsatdi.

Psixiatriya yordami ko‘rsatish to‘g‘risidagi qonun loyihasini yangi tahrirda ishlab chiqish bo‘yicha fraksiyaning ishchi guruhi shakllantirildi. Fraksiya tashabbusi bilan taklif etiladigan yangi tahrirdagi qonun tizimni tubdan takomillashtirishning asosiy yo‘nalishlarini qamrab olishi lozimligi ta’kidlandi.

Yig‘ilishda, shuningdek, boshqa qonun loyihalari ham atroflicha muhokama qilindi.

«Erosti boyliklari to‘g‘risida»gi O‘zbekiston Respublikasi Qonunining 27-moddasiga o‘zgartishlar kiritish haqida»gi qonun loyihasi fraksiya a’zolarining diqqat markazida bo‘ldi.

— Vazirlar Mahkamasining nomidan foydali qazilmalarni o‘z ichiga olgan yer qa’ri uchastkalaridan foydalanish huquqi uchun litsenziyalar berish komissiyasi tugatilmoqda, — dedi Oliy Majlis Qonunchilik palatasidagi O‘zXDP fraksiyasi a’zosi Aksaule Tumishova. — Ushbu vakolat Respublika Davlat geologiya va mineral resurslar qo‘mitasiga topshirilishi ko‘zda tutilmoqda. Bunday tartib joriy etilishi tadbirkorlik sub’ektlariga ruxsat berish, litsenziyalarni rasmiylashtirish, shuningdek, boshqa davlat xizmatlaridan foydalanishda ortiqcha xarajatlarni qisqartirishga va jarayonlarni soddalashtirishga imkon beradi.

Fraksiyamiz a’zolari yangi tartib orqali yerosti boyliklarining talon-taroj qilinishiga yo‘l qo‘ymaslik kerak, deb hisoblaydi. Ya’ni amalda belgilangan me’yorlar, talab va majburiyatlar litsenziyada o‘z aksini topishi lozim. Shuningdek, litsenziyaga ega bo‘lgan tadbirkorlik sub’ektlari faoliyati ustidan deputatlik nazorati o‘rnatilishi talab etiladi. Qonunchilik talablari buzilgan holda litsenziya bekor qilinishi, lozim bo‘lsa, javobgarlikka tortilishi kerak, deb o‘ylaymiz. Ana shunda yerosti boyliklarini asrash, ulardan samarali va maqsadli foydalanish mumkin bo‘ladi.

Deputatlar «O‘zbekiston Respublikasining ayrim qonun hujjatlariga qo‘shimchalar kiritish to‘g‘risida»gi qonun loyihasi bo‘yicha ham o‘z fikr-mulohazalarini bildirdi. Loyihaga ko‘ra, ma’muriy huquqbuzarlik to‘g‘risidagi bayonnoma tuzishga vakolatli organlarni aniq nazarda tutuvchi masala o‘rin olgan. Xususan, nogironligi bo‘lgan shaxslar huquqlari va erkinliklari bilan bog‘liq qonun hujjatlari ijrosi yuzasidan monitoring tartibi hamda jamoatchilik nazoratini takomillashtirish nazarda tutilgan.

Ma’muriy javobgarlik to‘g‘risidagi kodeksining 255-moddasiga uchinchi va to‘rtinchi qismi bilan qo‘shimchalar kiritilishi belgilanmoqda. Ya’ni mazkur Kodeksning 511– moddasi talablari bo‘yicha qonunbuzilish aniqlangan hollarda, mehnat bo‘yicha davlat texnik inspektorlari va mehnat shart-sharoitlari davlat ekspertizasi mansabdor shaxslari ma’muriy huquqbuzarlik to‘g‘risida bayonnoma tuzishi ko‘rsatilgan. Qonun loyihasi bilan bunday bayonnomani ko‘rib chiqish uchun tegishli tartibda sudga yuborish masalasi aniqlashtiriladi.

 

Zilola UBAYDULLAYEVA,

«O‘zbekiston ovozi» muxbiri.



DB query error.
Please try later.