Oxirgi sonda



Ko'p o'qilgan maqolalar



Dolzarb mavzu



Maqolalar arxivi

«    May 2018   
Du Se Cho Pa Ju Sha Ya
30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3
28.12.2017

QONUNLAR IJROSI TALAB DARAJASIDAMI?

Sog‘liqni saqlash vazirligining axboroti eshitildi

Oliy Majlis Qonunchilik palatasida Mehnat va ijtimoiy masalalar qo‘mitasining O‘zbekiston XDP fraksiyasi bilan hamkorlikda «Nogironlarni ijtimoiy himoya qilish to‘g‘risida»gi hamda «Keksalar, nogironlar va aholining boshqa ijtimoiy ehtiyojmand toifalari uchun ijtimoiy xizmatlar to‘g‘risida»gi qonunlar ijrosi bo‘yicha Sog‘liqni saqlash vazirligining axboroti eshitildi.

Yig‘ilishda nogironlikni erta aniqlash va oldini olish, maxsus internat-uylarida istiqomat qiluvchilarning qonuniy manfaatlarini ro‘yobga chiqarish borasida Sog‘liqni saqlash vazirligi tomonidan olib borilgan ishlarga alohida e’tibor qaratildi.

— Andijon hamda Toshkent viloyatlarida nazorat-tahlil tadbirlari o‘tkazildi, — dedi Oliy Majlis Qonunchilik palatasidagi O‘zbekiston XDP fraksiyasi a’zosi Zulayxo Akramova. — Bir qator masalalar vazirlik va idoralar mutasaddilari, sog‘liqni saqlash boshqarmalari mas’ullari ishtirokida muhokama qilindi. Hududlarda qonun ijrosi bo‘yicha amalga oshirilgan ishlar bilan birga, qator kamchiliklar yig‘ilib qolganining guvohi bo‘ldik.

Xususan, Andijon viloyatidagi «Chuvama» ayollar muruvvat uyi binosiga joriy va kapital ta’mirlash uchun zarur mablag‘larning o‘z vaqtida ajratilmagani tufayli muassasa bugungi kun talablariga mutlaqo javob bermaydi. U yerda yashovchilarning istaklari, ehtiyojlari o‘rganilib, takliflar tayyorlandi. Muassasa rahbariyati muruvvat uyida istiqomat qiluvchilar uchun alohida tibbiy bo‘lim qurish taklifini bildirdi. Mazkur masalaning yechimi yuzasidan ham vazifalar belgilab olindi.

— Partiya faollari bilan hamkorlikda Toshkent viloyati Ohangaron tumanidagi «Saxovat» uyiga borganimizda qator muammolarga duch keldik, — dedi O‘zbekiston XDP fraksiyasi a’zosi Ahad Ahmedov. — Muassasaning 255 o‘ringa ega ikkinchi bo‘limi kapital ta’mirlanib, shu yilning iyun oyida foydalanishga topshirilishi kerak bo‘lgan. Ammo hanuzgacha ta’mirlash ishlari nihoyasiga yetmagan, turli sabablarga ko‘ra to‘xtab qolgan.

Toshkent viloyati Ohangaron tumanidagi «Muruvvat» uyi 350 o‘ringa ega. 2013 yilda rekonstruksiya qilingan muassasa binosiga issiqlik quvvatini yetkazib beradigan quvurlar eskirgan. Kuz-qish mavsumida xonalar yaxshi isimaydi. Bundan tashqari, ruhshunos, nevropotolog kabi mutaxassislar yetishmaydi. Bemorlar yilda ikki marta tibbiy ko‘rikdan o‘tkaziladi. Agar ular poytaxtdagi tibbiyot muassasalarida tekshiruvdan o‘tadigan bo‘lsa, transportdan qiynalishadi. Chunki maxsus avtotransport ajratilmagan, borlari esa ta’mirga muhtoj.

Fraksiyamiz fikricha, mana shu masalalarga yanada jiddiy e’tibor qaratish kerak. Maxsus dasturlar asosida olib borilayotgan qurilish-ta’mirlash ishlari o‘z vaqtida nihoyasiga yetkazilmagani mahalliy hokimiyatning e’tiboridan chetda qolmoqda. Mas’ullarga intizomiy choralar qo‘llanilsa, bu kabi noxush holatlarning oldi olinadi, deb o‘ylaymiz. Fraksiyamiz a’zolari Mehnat va ijtimoiy masalalar qo‘mitasining qo‘shma qaroriga bu borada o‘z takliflarini berdi.

— «Muruvvat» hamda «Saxovat» uylarida ishlaydiganlarning manfaatini himoya qilish ham dolzarb masalalardan biridir, — dedi O‘zbekiston XDP fraksiyasi a’zosi Sattor Rahmatov.

— «Saxovat» hamda «Muruvvat» uylarida yashovchilar uchun sanitariya kiyim-kechaklar ajratish tartibini ham e’tiborga olish kerak. Bugungi kun talabi asosida qonunchilikka qo‘shimcha va o‘zgartishlar kiritilishini taklif qilamiz. Joylarda dori-darmon miqdori, protez-ortopediya mahsulotlari hamda reabilitatsiya vositalari ham talab darajasida emasligi haqida murojaatlar bo‘lmoqda. Shundan kelib chiqib, fraksiyamiz tegishli vazirliklarga o‘z takliflarini berdi. Bugun dunyo tibbiyotida «ekzoskelet» atamasi keng qo‘llanilmoqda. Ya’ni mazkur bionik kostyum mustahkam korset asosida yaratilgan bo‘lib, uni kiygan odam nafaqat tik turish, balki mustaqil o‘tirish, yurish hattoki zinalardan ko‘tarilish imkoniga ega bo‘ladi. Demak, bu tajribani yurtimizda ham joriy qilishni o‘ylab ko‘rish kerak. Albatta, mavjud ehtiyoj va talablardan kelib chiqib.

Yig‘ilishda nogironlikni keltirib chiqarayotgan omillarga qarshi kurashish masalasi ham muhokama qilindi. Xususan, yaqin qarindoshlar o‘rtasidagi nikoh ko‘payib ketgani natijasida yuzaga kelayotgan kasalliklar soni o‘sib borayotgani ta’kidlandi. Yaqin qarindoshlar o‘rtasidagi nikohlar oqibatida 60-80 foiz bolalar nogironlik bilan tug‘iladi. Shuning uchun tushuntirish-targ‘ibot tadbirlarini kuchaytirish zarurligi qayd etildi.

O‘zbekiston XDP fraksiyasi a’zolari tomonidan Oila kodeksining 16-moddasi ikkinchi qismiga «...nasl-nasab shajarasi bo‘yicha to‘g‘ri tutashgan qarindoshlar va ularning farzandlari o‘rtasida, tug‘ishgan va o‘gay aka-ukalar bilan opa-singillar va ularning farzandlari o‘rtasida niqoh tuzishga yo‘l qo‘yilmaydi», degan qo‘shimcha kiritish tavsiya etildi. Bunda ham xalqaro normalar va inson huquqlariga oid me’yoriy hujjatlarga murojaat qilish maqsadga muvofiqligi aytib o‘tildi.

Shuningdek, nogiron bolalar tug‘ilishining oldini olish uchun tug‘ma va irsiy kasalliklarni barvaqt aniqlash maqsadida faoliyat olib borayotgan «Ona va bola» va hududiy skrining markazlari tomonidan amalga oshirilayotgan ishlar ham tahlil etildi. Tizimdagi muammolarni bartaraf etish yuzasidan takliflar o‘rtaga tashlandi. Prezidentimizning ?018-2022 yillar davrida bolalikdan nogironlar tug‘ilishining oldini olish uchun tug‘ma va irsiy kasalliklarni barvaqt aniqlash davlat dasturi to‘g‘risida»gi qarori bilan tasdiqlangan Davlat dasturi sohadagi muammolar yechimiga xizmat qilishi ta’kidlandi. Bundan buyon saotlab navbat kutishlarga barham berilib, homilador ayollarni skrining tekshiruvidan o‘tkazish imkoni yuzaga kelishi e’tirof etildi.

O‘zbekiston XDP Markaziy Kengashi raisi, Oliy Majlis Qonunchilik palatasidagi partiya fraksiyasi rahbari Hotamjon Ketmonov kun tartibidagi masala yuzasidan so‘zga chiqib, kelgusida joylarda qonunlar ijrosini o‘rganish jarayonida deputatlarda talabchanlik va tashabbuskorlik ustuvor bo‘lishi zarurligini ta’kidladi.

Yig‘ilish yakunida yo‘l qo‘yilayotgan kamchiliklarni bartaraf etish yuzasidan tegishli tavsiyalar ishlab chiqildi hamda bu haqda qaror qabul qilindi.

 

Zilola UBAYDULLAYEVA,

«O‘zbekiston ovozi» muxbiri.



DB query error.
Please try later.