Oxirgi sonda



Ko'p o'qilgan maqolalar



Dolzarb mavzu



Maqolalar arxivi

«    May 2018   
Du Se Cho Pa Ju Sha Ya
30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3
12.12.2017

«INSON HUQUQ VA MANFAATLARINI AMALDA TA’MINLASH UCHUN

hali ko‘p ish qilishimiz kerak»

Oliy Majlis Qonunchilik palatasida O‘zbekiston XDP fraksiyasining yig‘ilishi bo‘lib o‘tdi. Unda davlatimiz rahbarining O‘zbekiston Respublikasi Konstitutsiyasi qabul qilinganining 25 yilligiga bag‘ishlangan tantanali marosimdagi ma’ruzasi mazmun-mohiyati, oldinda turgan muhim vazifalar xususida atroflicha fikr almashildi.

— Ma’ruza qisqa vaqt ichida mamlakatimizda amalga oshirilayotgan keng miqyosli o‘zgarishlarning tub mohiyati ochib berilgani, oldimizda turgan dolzarb vazifalar belgilangani bilan ahamiyatlidir, — dedi Oliy Majlis Qonunchilik palatasi deputati, O‘zXDP fraksiyasi a’zosi Abdug‘affor Qirg‘izboyev. — «Asosiy qonunimiz talablarini to‘liq amalga oshirish borasida hali oldimizda ulkan vazifalar turganini yaxshi tushunamiz. Ya’ni, xalqimiz hayot darajasi va sifatini yanada yaxshilash, inson huquq va manfaatlarini amalda ta’minlash bo‘yicha hali ko‘p ish qilishimiz kerak. Eng avvalo, odamlarimiz islohotlar samarasini kelajakda emas, balki bugun o‘z hayotida his etishlari zarur». Bu fikrlar partiya tashkilotlari va deputatlik birlashmalari zimmasiga katta mas’uliyat yuklaydi.

Harakatlar strategiyasi asosida shu yilning o‘zida 20 dan ortiq qonun va 700 dan ziyod qonunosti hujjatlari qabul qilindi. Xo‘sh, ularning hammasi ko‘ngildagidek ijro etilyaptimi? Agar bunday bo‘lmasa, oddiy odamlar hayoti o‘zgarishi, turmush sharoiti yaxshilanishi qiyin. Demak, biz joylarda me’yoriy hujjatlarning hayotga tatbiq etilishi ustidan parlament nazoratini olib borishimiz zarur. Bu ishni so‘zda emas, amalda ta’minlashimiz talab etiladi.

— Mamlakatimizda davlat boshqaruvini demokratlashtirish jarayonlari tobora izchil tus olmoqda, — deydi Oliy Majlis Qonunchilik palatasi deputati, O‘zXDP fraksiyasi a’zosi Akmal Umaraliyev. — Ma’ruzada turli darajadagi ijro hokimiyati organlarining xalq vakillari — parlament va mahalliy Kengashlar oldida hisobot berish amaliyotini keng joriy qilish lozimligi haqida ham muhim fikrlar bildirildi. Bu jarayonda partiyamiz, deputatlik birlashmalarimiz qanday ishtirok etadi? Ana shu qat’iy savolga aniq javobimiz bo‘lishi kerak.

Partiyaning har bir kengashida bu borada aniq rejalar ishlab chiqilishi va ijrosi ta’minlanishi maqsadga muvofiqdir. Odamlar davlat organlari, shuningdek, o‘zlari saylagan vakillar nima bilan shug‘ullanayotganini bilishlari, ularning faoliyatiga xolisona baho bera olishi uchun imkoniyatlar yaratilishi oldimizga yanada mas’uliyatli vazifalar qo‘yadi.

— Prezidentimiz ma’ruzasini, to‘g‘risi, hayajon bilan tingladim, — deydi O‘zXDP Toshkent viloyat kengashi raisi Mehrojiddin Darxonov. — Keng qamrovli, tahliliy-tanqidiy ruhdagi ushbu ma’ruzada siyosiy partiyalar uchun dolzarb bo‘lgan masalalar xususida so‘z yuritildi. E’tibor beraylik, joriy yilning o‘zida kam ta’minlangan, uy-joyga muhtoj, nogironligi bo‘lgan shaxslardan 1200 nafardan ko‘prog‘ini uy-joy bilan ta’minlash bo‘yicha shartnomalar imzolanib, boshlang‘ich to‘lovlar uchun 22 milliard so‘mdan ortiq mablag‘ ajratildi. Bu minglab insonlarning hayotga, yashashga bo‘lgan ishonchi ortdi deganidir. Shu masalada biz nima qildik? Qanday tashabbus bilan chiqdik? Ochig‘i, bu savolga javob berishga qiynalamiz.

Ma’ruzadan kelib chiqib, tegishli vazifalarni belgilab olar ekanmiz, ijtimoiy qo‘llab-quvvatlashga ehtiyojmand kishilar, doimiy ish joyiga ega bo‘lmagan mehnatga layoqatli aholi qatlamlari manfaatlarini himoya qilishga alohida e’tibor qaratishimiz lozim. Partiyamiz guruhlari bu masalalarni sessiya va doimiy komissiyalarda ko‘rib chiqish bo‘yicha tashabbus ko‘rsatishi, qonunlar va qarorlar bajarilishini deputatlik nazorati tartibida o‘rganishi, mansabdor shaxslarning hisobotlari eshituvini izchil yo‘lga qo‘yishi zarur.

— Tantanali marosimda ta’kidlanganidek, 25 yil tarix uchun bir lahza xolos, — deydi O‘zXDP Toshkent shahar kengashi raisi, xalq deputatlari Toshkent shahar Kengashidagi partiya guruhi rahbari Haydar Boboxonov. — Ana shu mashaqqatli va sharafli yo‘lda erishgan barcha yutuqlarimizni Konstitutsiyamiz bilan bog‘lashimiz, albatta, bejiz emas.

Keyingi yillarda Konstitutsiyamizga kiritilgan o‘zgartishlar yurtimizda demokratiyaning mustahkamlanishiga xizmat qilmoqda. Ma’lumki, demokratiyaning yaqqol ko‘rinishi saylov jarayonlarida namoyon bo‘ladi. 24 dekabrda ilk bor poytaxtimiz tuman Kengashlariga saylovlar bo‘lib o‘tadi. Prezidentimiz mazkur saylovga to‘xtalib o‘tar ekan, «Toshkent shahri aholisi ham endi o‘z vakillari — deputatlar orqali tumanlarni boshqarishda ishtirok etish imkoniyatiga ega bo‘lmoqda», deya alohida ta’kidladilar. Saylovda muvaffaqiyatli qatnashib, har bir tuman Kengashida partiyamiz guruhlari tuzilishiga erishishimiz kerak. Shunda elektorat manfaatlarini himoya qilish bo‘yicha tashabbus va harakatlarimizni kuchaytirish imkoniga ega bo‘lamiz.

Fraksiya yig‘ilishida barcha darajadagi deputatlik birlashmalarining ijro hokimiyati organlarining hisobot berish amaliyotini keng joriy qilish, parlament, vakillik va jamoatchilik nazorati mexanizmlarini yanada rivojlantirish yuzasidan alohida rejalarini ishlab chiqish masalasi atroflicha muhokama qilindi. Ushbu jarayonda ijtimoiy himoya, aholi salomatligini saqlash yo‘nalishlariga alohida e’tibor qaratish bo‘yicha takliflar bildirildi.

Fikr-mulohazalar asosida fraksiyaning chora-tadbirlar rejasi tasdiqlandi.

 

Gulruh ODASHBOYEVA,

«O‘zbekiston ovozi» muxbiri.



DB query error.
Please try later.