Oxirgi sonda



Ko'p o'qilgan maqolalar



Dolzarb mavzu



Maqolalar arxivi

«    Iyul 2017   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
11.02.2017

AHOLINI O‘YLANTIRAYOTGAN MUAMMOLAR IZCHIL O‘RGANILYAPTI

Taklif va mulohazalarni tinglash, xalq bilan bamaslahat ish tutish, muammolarni hal qilish odamlarning davlatga, qonunlarga ishonchini mustahkamlaydi. Taraqqiyotga keng yo‘l ochadi.

Oliy Majlis Qonunchilik palatasi deputatlari hamda Senat a’zolarining hududlarda bo‘lishi, joylardagi muammolarni o‘rganishi, xonadonlarga kirib, xalq bilan muloqot qilishi ham ana shu ezgu maqsadga qaratilgan.

Aholi va elektorat vakillari bilan o‘tkazilayotgan muloqotlarda ijtimoiy infratuzilma hamda tadbirkorlikni rivojlantirish, moliya-kredit tashkilotlari faoliyatini samarali tashkil etish, savdo va maishiy xizmat ko‘rsatish sifatini oshirish, aholi bandligini ta’minlash masalalariga e’tibor qaratilmoqda. Qabul qilingan qonunlar, boshqa me’yoriy-huquqiy hujjatlar ijrosini yaqindan o‘rganish, aholining talab, takliflarini eshitish, mahalliy ijro hokimiyati faoliyatini tanqidiy tahlil etish kelgusi vazifalarni belgilab olishda dolzarb ahamiyat kasb etadi.

O‘zbekiston Xalq demokratik partiyasi fraksiyasi rahbari, Oliy Majlis Qonunchilik palatasi Spikeri o‘rinbosari Xatamjon Ketmonov bir guruh deputatlar hamda Senat a’zolari bilan Shahrixon tumanida bo‘ldi. Qishloq, mahalla fuqarolar yig‘inlari, muassasa, korxona va tashkilotlarda aholi vakillari bilan yuzma-yuz muloqotlar o‘tkazildi.

Uchrashuvlarda, avvalo, Xalq bilan muloqot va inson manfaatlari yili maqsad-mohiyati xususida so‘z yuritildi. Davlat hokimiyati organlari va tashkilotlar rahbarlarining muloqotlar chog‘ida bevosita ishtirok etishi muammolar o‘z vaqtida yechim topishiga xizmat qilishi ta’kidlandi.

Qonunchilik palatasi deputatlari hamda Senat a’zolarining tashabbusi bilan Shahrixon tuman Kengashi qoshida ishchi guruhi shtabi tuzildi. Aniqlangan kamchiliklar, muammolar tuman hokimligi, mutasaddi tashkilotlar bilan hal qilinadi. Ayrim murojaatlar nazoratga olinib, ba’zi masalalar bo‘yicha takliflar tayyorlanadi.

— Davlat va jamoat tashkilotlari, mahallalar, ta’lim, tibbiyot muassasalari faoliyatini batafsil o‘rganishga harakat qilyapmiz, — dedi Xatamjon Ketmonov. — Xonadon sohiblari bilan suhbatlashyapmiz. Ularning ko‘nglidagi rejalariga ahamiyat beryapmiz, amalga oshishiga ko‘mak ko‘rsatyapmiz.

Ichimlik suv ta’minoti, ekologiya bilan bog‘liq masalalar ko‘tarilyapti. «Suvoqava» davlat unitar korxonasi murojaatlarni hal qilishga kirishdi. Fuqarolar ayrim hududlarda «kaliforniya» teraklari ko‘klamda momiq chiqarib, allergik kasalliklarni qo‘zg‘atayotgani haqida gapirishdi. Tabiatni muhofaza qilish qo‘mitasi mutaxassislari ushbu masalani o‘rganishga jalb etildi.

Shahrixon tumani viloyatdagina emas, balki mamlakat miqyosida aholi eng zich joylashgan hududlardan hisoblanadi. Shu nuqtai nazardan bu yerda bandlikni ta’minlash dolzarb vazifalar qatorida turadi.

Shahrixon hunarmandchiligining dong‘i dunyoga ketgan. Usta beshikchilar, pichoqchilar, misgar, kandakorlar samarali mehnat qilmoqda.

Tumanda mustaqillik yillarida avtomobillar hamda qishloq xo‘jaligi texnikalariga filtrlar, zamonaviy andozadagi poyabzallar ishlab chiqaruvchi qo‘shma korxonalar, bir qancha mas’uliyati cheklangan jamiyatlar faoliyati yo‘lga qo‘yildi. Yangidan-yangi binolar qurilyapti. Qishloqlarda namunaviy loyihalar asosida bunyod etilgan ko‘plab zamonaviy uy-joylar foydalanishga topshirildi.

Xoldevonbek qishlog‘idagi 53-umumta’lim maktabidagi ta’lim-tarbiya, fanlarni o‘qitish tajribasi ibratlidir. Maktab direktori, O‘zXDP faoli, O‘zbekiston Qahramoni Kamoliddin G‘opirov boshchiligidagi malakali o‘qituvchilar o‘quvchilarga puxta bilim berishyapti.

Shahrixondagi ibratli ishlar ko‘lamining kengligi hamma muammolar hal etildi, degani emas. Bu parlament vakillari bilan aholi o‘rtasidagi muloqotlarda ayon bo‘lmoqda.

Deputatlar «Nomozgoh» mahallasidagi Anvar Abdullayev xonadonida bo‘lishdi.

— Prezidentimiz odamlarning tadbirkor bo‘lishiga ko‘maklashish zarurligi haqida juda o‘rinli gapirdi, — dedi xonadon sohibi. — 10 bosh qo‘y boqamiz. Agar chorva uchun ozuqa yetishtirishga yer ajratilsa, yuzta qo‘y boqishni uddalaymiz. Ro‘zg‘orimizga baraka kiradi.

Deputatlar masalani o‘rganib, yordam ko‘rsatilishini aytishdi.

Shu mahallalik Odiljon Ismoilov elektr energiyasi tizimidagi uzilishlar masalasini o‘rtaga tashladi. Tuman elektr tarmoqlari korxonasiga masalaga aniqlik kiritish xususida ma’lumotnoma taqdim etildi.

Qo‘sh qavatli, 24 xonadonli uyda yashovchi Yoqutxon Hojiboyeva turar-joy tomi va oqava tarmog‘i ta’mirga muhtoj ekanini ma’lum qildi.

Oliy Majlis Qonunchilik palatasi Spikeri o‘rinbosari Xatamjon Ketmonov bilan birga Shahrixon tuman Kengashi deputati Orifjon Tursunov, viloyat Kengashi deputati Durbek Abdurahmonov, O‘zbekiston Qahramoni Kamoliddin G‘opirov ham aholi xonadonlaridagi suhbatlarda qatnashishdi. Bu muammolarni birgalikda hal etishga xizmat qiladi.

— Xalq davlat idoralariga emas, davlat idoralari xalqimizga xizmat qilishi kerak, degan qat’iy talabning amaldagi isbotini ko‘ryapmiz, — dedi mehnat faxriysi, O‘zXDP faoli Anorxon Mo‘minova. — Odamlar deputatlar bilan muloqotlarda muammolar yechim topishiga katta umid bildiryapti, yangi rejalar tuzyapti. Biz bundan juda xursandmiz.

 

Ahmadillo SOLIYEV,

«O‘zbekiston ovozi» muxbiri.



DB query error.
Please try later.