04.03.2017

DEPUTAT BILAN BIR KUN YONMA-YON

2017 yilning Xalq bilan muloqot va inson manfaatlari yili, deb nomlanishida chuqur ma’no mujassam. Odamlar orasida yurib, bu tashabbusning naqadar hayotiy ekanini anglab yetayapmiz, kerakli xulosalar chiqaryapmiz.

Deyarli har kuni mahallalarda yuramiz. Uyda yotgan bemorlar, yolg‘iz keksalar, nogironlar va ehtiyojmand oilalar holidan muntazam xabar olamiz. Homiylar ko‘magi bilan bayramlarda ularga sovg‘a-salomlar ulashiladi.

Olmaliq shahriga kirib borganimizda quyosh iliq nurlarini socha boshlagandi. Shahar markaziy shifoxonasining ikkinchi qavatiga ko‘tarildik. Bosh shifokor qabuliga kelganlar navbat kutib turishardi.

Shifoxona bosh shifokori Qizilgul Qosimova xalq deputatlari viloyat Kengashi deputati, O‘zbekiston XDP guruhi a’zosi. Shu bois faqat tibbiy masalada emas, boshqa tashvishlar bilan ham uning qabuliga ko‘pchilik eshik qoqib keladi. U biriga deputat, biriga shifokor, biriga do‘st, biriga opa-singil bo‘lib maslahat beradi, muammolarini yechishga ko‘maklashadi, dardini eshitadi.

Aslida bizning maqsadimiz ham deputatning aholi, saylovchilar bilan muloqoti, odamlar orasiga qanchalik kirib borayotgani, ularni o‘ylantirayotgan masalalarga qanday yondashayotganini bilish, o‘rganish edi.

— Bugun zamon o‘zgarmoqda, odamlarning talabi oshib bormoqda, — deydi deputat. — Shunga muvofiq, bizning oldimizda turgan vazifalar, zimmamizdagi mas’uliyat ham katta. 2017 yilning Xalq bilan muloqot va inson manfaatlari yili, deb nomlanishida chuqur ma’no mujassam. Odamlar orasida yurib, bu tashabbusning naqadar hayotiy ekanini anglab yetayapmiz, kerakli xulosalar chiqaryapmiz.

Deyarli har kuni mahallalarda yuramiz. Uyda yotgan bemorlar, yolg‘iz keksalar, nogironlar va ehtiyojmand oilalar holidan muntazam xabar olamiz. Homiylar ko‘magi bilan bayramlarda ularga sovg‘a-salomlar ulashiladi.

— Saylovchilaringiz, umuman, shahar aholisini ko‘proq qanday masalalar o‘ylantirmoqda? Muloqotlar davomida qanday muammolar bilan murojaat qilishyapti?

— Hokim, parlament a’zolari, mutasaddi xodimlar bilan birga aholi vakillari bilan uchrashib, suhbatlashyapmiz. Har chorshanba kuni sayyor guruh hududlarga chiqyapti. Ochiq muloqotlar davomida aholini ko‘proq bandlik masalasi o‘ylantirayotgani ma’lum bo‘lmoqda. Mana, hozirgina qabulimdan chiqqan onaxon ham nevarasini ishga joylashtirish masalasida yordam so‘rab kelibdi.

Shahrimizda 6 kollej, bitta akademik litsey bor. Har yili mazkur ta’lim muassasalarini minglab yoshlar bitiradi. Kasb-hunar kollejlari konchilik, ijtimoiy servis, uy-joy qurilishi, sanoat hamda tibbiyot sohalari bo‘yicha mutaxassislar tayyorlaydi. Olmaliq kon-metallurgiya kombinati har yili ming, bir yarim ming nafar yoshlarni ishga qabul qiladi. Tibbiyot kollejini o‘tgan yili shu hududning o‘zida ro‘yxatda bo‘lgan 50 nafardan ortiq bitiruvchi tamomladi.

— Kollej bitiruvchilari uchun ish o‘rinlari yetarlimi?

— Afsuski, yo‘q. Shuning uchun ham tibbiyot kollejlarida har yili turli yo‘nalishlarda mutaxassislar tayyorlash maqsadga muvofiq, deb o‘ylayman. Ehtiyojga qarab, bir yili laborantlik, boshqa yili stomatologiya hamshirasi, farmatsevtika yo‘nalishlari ochilishi bo‘yicha takliflar beryapmiz. Ichki yo‘llarni ta’mirlash masalasi ham dolzarb masaladir. Aholidan tushgan murojaatlar asosida mutasaddilarga deputatlik so‘rovlari kiritilgan.

Bugun saylovchilar bilan uchrashuv belgilaganmiz. Aholi murojaatlari bilan yaqindan tanishishingiz mumkin bo‘ladi. Vaqt ham bo‘lib qoldi, yuringlar, sizlarni ijtimoiy iqtisodiyot va servis kasb-hunar kollejiga taklif qilaman. Ochiq muloqot o‘sha yerda bo‘lib o‘tadi.

Yo‘l-yo‘lakay deputat bilan sog‘liqni saqlash tizimi oldida turgan vazifalar, kelgusidagi rejalar haqida ham suhbatlashdik.

— Prezidentimiz Shavkat Mirziyoyev belgilab bergan vazifalardan kelib chiqib, birinchi navbatda aholiga tez tibbiy yordam ko‘rsatish sifatini oshirishga e’tibor qaratyapmiz. To‘g‘risi, xodimlarimizning bemorlar bilan muloqoti, kasbga fidoyiligi qattiq nazoratga olindi.

Shifoxonamizda tibbiy ijtimoiy sektor faoliyati yo‘lga qo‘yilgan. 17 nafar ijtimoiy xodima yolg‘iz keksalar, nogironlar holidan muntazam xabar oladi. Yolg‘iz keksalarni bepul dori-darmonlar bilan ta’minlashga harakat qilyapmiz. Nogironlarga harakat tayanch buyumlari navbat bilan bepul berib boriladi.

Bizni O‘zbekiston XDP Olmaliq shahar kengashi raisi Muhriddin Hamzayev kutib oldi.

— Xalqning ichiga kirib, ularning dardi, muammolari, takliflarini eshitishimiz lozim, — deydi u. — Odamlarga qancha yaqin bo‘lsak, ularni o‘ylantirayotgan muammolardan xabardor bo‘lamiz, yechimi uchun ko‘maklashamiz. Bugun ham shu maqsadda yig‘ildik.

— Mahalla ahli, ota-onalar maktabda turli sabab va bahonalar bilan pul yig‘ish ko‘paygani haqida gapirishadi, — deydi «Hamza» mahalla fuqarolar yig‘ini maslahatchisi Oltinoy O‘ljaboyeva. — Aslida bu qanchalik to‘g‘ri? Maktabda o‘quvchilardan qanday hollarda pul yig‘ilishi mumkin?

Yana bir e’tirozim — tug‘uruqxonalarda beriladigan suyunchi pullari masalasida. Hatto ayrim tibbiyot xodimlari shuncha pul berilsin, deb talab qiladi. Ro‘yxatdan o‘tish uchun ham pul so‘rashadi.

— Qizim kollejni bitirdi, maktabda amaliyot o‘tadi, — deydi Zuhra Sharofiddinova. — Lekin maktabga oliy ma’lumotli kadr kerakligi aytilib, qizim ishga olinmadi. Maktab bilan uch tomonlama shartnoma ham tuzilgan. Kollejda shartnomalar nomiga tuziladimi, nega ularga amal qilinmaydi?

— Ko‘chamizdan qurilish va uy-joy xo‘jalik kasb-hunar kolleji hamda oilaviy poliklinikaga kelish uchun ikkita transportdan foydalanamiz,deydi «Yangi hayot» mahallasidan Savriniso Soliyeva. — Bu esa aholiga, bolalar va yosh bolali ayollarga qiyinchilik tug‘dirmoqda. Shu yo‘lga bitta yo‘nalishda transport qo‘yish masalasini ko‘tarmoqchi edim.

Muloqot davomida yana boshqa masalalarda ham ko‘plab murojaatlar bo‘ldi, hayotiy savollar berildi. Deputat savollarga javob berib, muammmolarni hal etish bo‘yicha vazifalar belgilab oldi. Muloqotda Olmaliq shahar kengashi deputati, O‘zXDP guruhi a’zosi Mavjuda Ilyasova ham faol ishtirok etdi.

Uchrashuvdan so‘ng Qizilgul Qosimova kollejning 2-bosqich buxgalteriya guruhiga kirib bordi. Ularning o‘qish sharoitlari bilan tanishdi. O‘quvchilarni qiziqtirgan masalalar xususida dildan suhbatlashdi.

— Yaxshi o‘qishimiz uchun kollejimizda barcha sharoitlar bor, — deydi Dilnoza Ashurboyeva. — Kutubxonamizda kitoblar yetarli. Sport zalimiz ham to‘liq jihozlangan. Malakali ustozlardan ta’lim olyapmiz. Bizdan esa faqat yaxshi o‘qish, yetuk mutaxassis bo‘lish talab etiladi. Mening bir taklifim bor. Kollejimizda yozuvchilar, shoirlar, siyosatshunoslar bilan uchrashuvlar tez-tez o‘tkazilsa.

— Yoshlarning takliflari, fikrlarini eshitib, ularning hayotga, ertangi kunga bo‘lgan ishonchini ko‘rib, juda quvondim, — deydi deputat. — Farzandlarimizning hech narsadan kam bo‘lmay unib-o‘sishi kelajagimiz uchun zamindir.

Keyingi manzilimiz 16-davlat maxsus maktabgacha ta’lim muassasasi bo‘ldi. Vaqt kech bo‘lgani uchun bog‘chada bolalar ko‘rinmasdi.

Deputat bu yerdagi shart-sharoit bilan yaqindan tanishib, oziq-ovqat ombori hamda haftalik taomnomani ko‘rib chiqdi. Xonalarni isitish tizimi, yotoqxona, bolalar o‘yinchoqlari, hamma-hammasini ko‘zdan kechirdi.

— Muassasa joriy ta’mirga muhtoj, — deydi deputat muassasadan chiqar ekanmiz. — Bu haqda albatta hokimiyatga ma’lumot kiritamiz. Bolalar yaxshi sharoit bilan ta’minlanishi uchun mas’ulmiz.

Quyosh bota boshladi. Poytaxtga qaytishimiz kerakligi uchun deputat va partiya faollari bilan xayrlashdik. Ular esa hali xonadonlarga kirishi, yolg‘iz keksalar va ehtiyojmand oilalar holidan xabar olishlari kerak ekan. Hamroh bo‘lolmaganimizdan afsuslandik. Lekin deputatning bir kunlik faoliyatidan ko‘nglimiz to‘ldi.

 

Gulruh ODASHBOYEVA,

«O‘zbekiston ovozi» muxbiri.



DB query error.
Please try later.