Oxirgi sonda



Ko'p o'qilgan maqolalar



Dolzarb mavzu



Maqolalar arxivi

«    Iyun 2017   
Du Se Cho Pa Ju Sha Ya
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2
27.12.2016

PARTIYA GURUHLARI FAOLLIGI, JONKUYARLIGI

odamlarni o‘ylantirayotgan masalalarni o‘rganish, inson manfaatlarini himoya etishda muhim o‘rin tutadi

Bugun siyosiy partiya xalqning ichiga chuqurroq kirib borishi, elektorat vakillarini o‘ylantirayotgan masalalarni izchil o‘rganishi, ijro hokimiyati mas’uliyatini oshirish bo‘yicha tashabbuslar bilan chiqishi talab etilmoqda. Ayniqsa, hududlarni ijtimoiy-iqtisodiy rivojlantirishda deputatlik birlashmalarining faol ishtirokini ta’minlash, ularning hududlar ravnaqini oshirishdagi rolini kuchaytirish katta ahamiyatga ega.

O‘zbekiston Respublikasi Prezidenti Shavkat Mirziyoyevning Konstitutsiya kuniga bag‘ishlangan tantanali marosimdagi ma’ruzasi hamda Oliy Majlis palatalarining qo‘shma majlisidagi nutqida mahalliy Kengashlar faoliyatini kuchaytirish, davlat hokimiyati va boshqaruvi organlari rahbarlarining hisobdorligini oshirish, bu borada Oliy Majlis hamda mahalliy Kengashlarning hamkorligini yanada kuchaytirish bo‘yicha dolzarb takliflar o‘rtaga tashlandi. Aniq vazifalar belgilab berildi. Shuningdek, hududlarni kompleks rivojlantirish, sog‘liqni saqlash, aholini ish bilan ta’minlash, ijtimoiy himoya qilish masalalarida yo‘l qo‘yilgan kamchiliklarni bartaraf etish yuzasidan tanqidiy-tahliliy fikrlar bildirildi. Shundan kelib chiqib, har bir partiya guruhi deputatlik faoliyatiga munosabatini tubdan o‘zgartirishi talab etilyapti.

O‘zbekiston XDP Markaziy Kengashi tomonidan 2015-2019 yillarga mo‘ljallab qabul qilingan Harakat dasturi hududlardagi muammolarni hal etishda muhim ahamiyat kasb etadi. Xo‘sh, o‘tgan davr mobaynida dasturda belgilangan vazifalar qay darajada amalga oshdi? Aholini o‘ylantirayotgan masalalar sessiyalarda muhokama etilib, o‘z yechimini topayaptimi? Dasturning joriy yil 10 oyi davomidagi ijrosi tahlili nimalarni ko‘rsatmoqda?

— O‘tkazilgan tahlillardan shunday xulosaga kelish mumkinki, xalq deputatlari mahalliy Kengashlaridagi O‘zbekiston XDP guruhlari tashabbusi bilan 166 masala partiya guruhlarida, 103 masala doimiy komissiya yig‘ilishlarida, 71 masala sessiyalarda muhokama etilib, tegishli qarorlar qabul qilingan, — deydi O‘zbekiston XDP Markaziy Kengashi Aholi bandligi va ijtimoiy siyosat masalalari bo‘limi mudiri Boymurod Yusupov. — Ayniqsa, Surxondaryo, Toshkent va Xorazm viloyatlaridagi partiya guruhlari Harakat dasturi ijrosini o‘z vaqtida ta’minlash masalasiga alohida e’tibor qaratmoqda.

Deputatlik birlashmalari tashabbusi bilan muhokama qilingan masalalar mazmun-mohiyatiga e’tibor qaratadigan bo‘lsak, ularda elektorat manfaatlariga daxldor bo‘lgan qator masalalar o‘z ifodasini topgan.

Harakat dasturi doirasida biz uchun juda muhim ahamiyatga bo‘lgan aholi bandligini ta’minlash, kasb-hunar kollejlari bitiruvchilarini ishga joylashtirish borasida olib borilayotgan ishlar tegishli tartibda muhokama qilindi. Misol uchun, ularning 26 tasi partiya guruhlari, 20 tasi doimiy komissiyalar hamda 14 tasi sessiyalar muhokamasiga olib chiqildi.

Ammo ayrim partiya guruhlari ushbu muhim masalani o‘z yig‘ilishida nomiga ko‘rib chiqish bilan cheklangan.

Oldimizda turgan eng dolzarb vazifalardan biri mahalliy Kengashlar zimmasiga yuklatilayotgan masalalarni o‘z vaqtida hal etishdir. Bu esa bevosita Harakat dasturi ijrosi bilan chambarchas bog‘liq.

Harakat dasturida sog‘liqni saqlash, hududiy poliklinikalarni zamonaviy tibbiyot va diagnostika asbob-uskunalari bilan jihozlash, tug‘ma va irsiy kasalliklarni profilaktika qilish, qishloq vrachlik punktlarining moddiy-texnika bazasini yaxshilash, dori vositalari va farmatsevtik faoliyat bilan bog‘liq dolzarb masalalarni o‘rganish ko‘zda tutilgan. E’tibor bersak, bularning hammasi inson manfaatlari bilan bog‘liq hayotiy vazifalardir. Xo‘sh, bu borada xalq deputatlari mahalliy Kengashlaridagi partiya guruhlari qanday ishlarni amalga oshirdi?

— Mazkur yo‘nalishda 39 masala partiya guruhlarida, 26 tasi doimiy komissiyalarda hamda 16 tasi sessiyalarda muhokama qilingan, — deydi O‘zbekiston XDP Markaziy Kengashi sektor mudiri Durbek Xudoyqulov. — Jumladan, To‘rtko‘l, Qorako‘l, Baxmal, Nurota, Tomdi, Payariq, Oltinsoy, Qumqo‘rg‘on, Ohangaron, Xonqa, Yangibozor, Buvayda, Koson tumanlari, Buxoro, Bekobod, Farg‘ona shahar Kengashlarida masalalar sessiyalarda muhokama etilib, tegishli qarorlar qabul qilingan.

Bu masalalar Amudaryo, Qorao‘zak, Andijon, Chust, Bog‘ot, Kasbi, Nishon tumanlari hamda Jizzax, Namangan, Urganch shaharlarida doimiy komissiyalarda ko‘rilgan bo‘lsa, ayrim tuman va shahar Kengashlaridagi partiya guruhlarida rasmiyatchilik yuzasidan, ya’ni nomiga ko‘rib chiqilgan, xolos.

Agar qaysi tumanda muammo sessiya muhokamasiga olib chiqilmasdan qolib ketadigan bo‘lsa, bu o‘sha hududda partiyamizning ta’sir kuchi kamligi, elektorat manfaatlari e’tiborsiz qoldirilganidan dalolat beradi.

Shuningdek, partiya guruhlarimiz sessiya qarori ijrosiga ham jiddiy e’tibor qaratishi lozim. Chunki sessiyada muhokama etildi degani muammo hal bo‘ldi, degani emas. Sessiya qarori ijrosini tizimli ravishda monitoring qilib borish hududlarni ijtimoiy-iqtisodiy rivojlantirish, yangi ish o‘rinlari yaratish, eng muhimi, saylovchilar ishonchini qozonishda muhim ahamiyat kasb etadi.

Harakat dasturida pensiya va nafaqa pullarining tayinlanishi, yosh oilalarning imtiyozli ipoteka kreditlari asosida uy-joylar bilan ta’minlanishi, davlat tomonidan ko‘rsatilayotgan moddiy yordamlarning manzilliligini o‘rganish va aholi ijtimoiy himoyasini kuchaytirish borasida ham dolzarb masalalar belgilangan. Mazkur yo‘nalishda 27 masala partiya guruhlarida, 20 tasi doimiy komissiyalarda hamda 13 tasi sessiyada ko‘rib chiqilgan.

— Yil boshida Harakat dasturida ko‘zda tutilgan masalalarga alohida e’tibor qaratdik, — deydi O‘zbekiston XDP Surxondaryo viloyat kengashi raisi Chori Jumaqulov. — Shu bois Jarqo‘rg‘on, Muzrabot, Qiziriq tumanlari hamda Termiz shahar Kengashlari sessiyalarida partiya guruhlarimiz tashabbusi bilan bir qator yo‘nalishlar ko‘rib chiqildi. Sessiya muhokamasiga kiritishdan oldin pensiya va nafaqa pullarining tayinlanishi, shuningdek, davlat tomonidan ko‘rsatilayotgan moddiy yordamlarning qay darajada manzilliligi o‘rganib chiqildi. Ko‘plab tahlillar o‘tkazdik. Buning natijasida joylarda kamchilik va nuqsonlar yaqqol ko‘zga tashlandi.

Hozirda sessiya qarorlari ijrosini ta’minlash bo‘yicha ish olib borayapmiz. Mahalliy Kengashlardagi deputatlarimiz masalani izchil o‘rganib, kerak bo‘lsa, sessiyaga takroran kiritish ustida ishlayapti.

Bundan tashqari, tumanlardagi Bandlikka ko‘maklashish markazlari, «Mahalla» xayriya jamoat fondi bo‘limlari hamda boshqa jamoat tashkilotlari bilan hamkorlikni yo‘lga qo‘yganmiz.

Harakat dasturida ko‘zda tutilgan muhim masalalar — ta’lim tizimini yanada rivojlantirish, maktabgacha ta’lim muassasalarining moddiy-texnika bazasini yaxshilash, ushbu tizimdagi xodimlar mehnatiga haq to‘lash tizimini takomillashtirish, shuningdek, ijtimoiy himoyaga muhtoj oilalar farzandlari, ayniqsa, qiz bolalarning sport bilan shug‘ullanishi uchun sharoitlar yaratish, chekka hududlarda yangi sport obyektlarining qurilishi, ularning moddiy-texnika bazasini yanada mustahkamlash yo‘nalishlarida 25 masala deputatlik guruhlari, shundan 16 tasi doimiy komissiyalar va 6 tasi esa sessiyalar yig‘ilishlarida ko‘rilib, tegishli qarorlar qabul qilingan.

Biroq Harakat dasturi ijrosini ta’minlash borasida ayrim mintaqaviy, tuman va shahar kengashlari hamda partiya guruhlari tomonidan sustkashlik va kamchiliklarga yo‘l qo‘yildi. Bundan ko‘z yumib bo‘lmaydi. Harakat dasturida 10 oy davomida o‘rganilishi belgilangan 159 masaladan 22 tasi faqatgina deputatlik guruhlarida muhokama qilinib, doimiy komissiya va sessiya muhokamasiga olib chiqilmagan.

Xulosa o‘rnida shuni aytish kerakki, qaysi hududda partiya guruhlari samarali faoliyat yuritsa, odamlarni o‘ylantirayotgan masalalarni o‘rgansa, ularni hal etish bo‘yicha tashabbus ko‘rsatsa, o‘sha yerda aholining ertangi kunga bo‘lgan ishonchi ortadi, muammolarga ijobiy yechim topiladi. Demak, mahalliy Kengashlardagi partiyamiz guruhlari ishini yangi bosqichga olib chiqish hamda tashabbuskorligini oshirish dolzarb ahamiyat kasb etadi.

 

Nurali ORIPOV,

«O‘zbekiston ovozi» muxbiri.



DB query error.
Please try later.