Oxirgi sonda



Ko'p o'qilgan maqolalar



Dolzarb mavzu



Maqolalar arxivi

«    Oktabr 2019   
Du Se Cho Pa Ju Sha Ya
30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3
13.09.2018

SURXONDARYOLIK PARTIYADOSHLARIMIZ, DEPUTATLAR GAZETA O‘QIMAYDIMI?

Globallashuv jarayonida yashayapmiz. Bugungi tezkor va shiddatli zamonni ommaviy axborot vositalarisiz tasavvur qilib bo‘lmaydi. Siyosiy partiyalar uchun esa, albatta, partiya matbuoti muhim ahamiyatga ega. Joylardagi partiya tashkilotlari ish tajribasi, deputatlarimiz faoliyati, takliflari, partiyamizning Oliy Majlisdagi fraksiyasi, O‘zXDP Markaziy Kengashi tadbirlari, qaror va tavsiyalari haqida asosan «O‘zbekiston ovozi» va «Golos Uzbekistana» gazetalari orqali bilish mumkin. Buning uchun avvalo partiya nashrlariga obuna bo‘lish kerak, albatta. Partiya faollari, a’zolari o‘z partiyalari nashrlariga obuna bo‘lmasligi esa birinchidan, partiya faoliyatidan bexabarlikni, o‘rganish, izlanishga qiziqish sustligini, siyosiy bilim yetarli emasligini bildiradi.

 

Bu masalada Surxondaryodagi ahvol bilan tanishishga harakat qildik.

— Hozirgi kunda vohada 13 tuman, bir shahar Kengashi faoliyat ko‘rsatmoqda, — deydi O‘zbekiston XDP Surxondaryo viloyat Kengashi raisi, xalq deputatlari viloyat Kengashidagi O‘zbekiston XDP guruhi a’zosi Mavjuda Hasanova. — 37 ming nafardan ortiq a’zoni birlashtirgan 670 ga yaqin boshlang‘ich partiya tashkiloti bor. Xalq deputatlari viloyat Kengashida O‘zbekiston XDPdan saylangan 19, tuman va shahar Kengashlarida esa 126 nafar deputat ish olib bormoqda.

Obunani namunali tashkil qilish uchun o‘tgan yili O‘zbekiston Xalq demokratik partiyasi Markaziy Kengashi tomonidan maxsus dastur ishlab chiqilgan edi. Unda viloyat, tuman va shahar Kengashlari mas’ullari «O‘zbekiston ovozi» va «Golos Uzbekistana» gazetalariga ikki nusxadan, mahalliy Kengashlar deputatlari esa bir nusxadan yillik obuna bo‘lishlari tavsiya qilingandi.

Xo‘sh, natija qanday bo‘ldi? To‘g‘risini aytganda, ko‘zlangan maqsadga erisholmadik. Viloyat bo‘yicha gazetalarimizga partiya tashkilotlarida 1400 nusxa «O‘zbekiston ovozi»ga 1000, 400 nusxa «Golos Uzbekistana»ga obuna rasmiylashtirilishi ko‘zda tutilgan edi. «O‘zbekiston ovozi» rejasi — 50-55, «Golos Uzbekistana» esa 35-40 foizga uddalandi, xolos.

To‘g‘ri, Denov, Jarqo‘rg‘on, Qumqo‘rg‘on tumanlari hamda Termiz shahrida bu boradagi ko‘rsatkichlar yaxshi. Ammo Sherobod, Sariosiyo, Muzrabot, Qiziriq tumanlarida «O‘zbekiston ovozi»ga 7-13 ta, «Golos Uzbekistana»ga esa bor-yo‘g‘i 3-8 nusxadan obuna tashkil qilindi...

Mahalliy Kengashlardagi 145 nafar deputatimizning ko‘pchiligi tashabbuskor va fidoyi insonlar hisoblanadi. Xalqning dardu tashvishi bilan yashayotgan safdoshlarimizdan faxrlanamiz, albatta. Lekin Sari­osiyo, Sherobod, Muzrabot va Qiziriq tumanlaridagi aksariyat deputatlar yarim yilga obuna bo‘lgani yoki ayrimlari obuna bo‘lishni umuman unutib qo‘ygani ma’lum bo‘ldi.

Hududlardagi holatni o‘rganish maqsadida viloyat markazidan qariyb 200 kilometr olisda joylashgan Sariosiyo tumanida bo‘ldik. O‘zbekiston XDP tuman kengashi partiyamiz nashrlariga ikki nusxadan obuna bo‘lgan ekan.

— Xalq deputatlari tuman Kengashida 8 deputatimiz faoliyat ko‘rsatmoqda, — deydi O‘zbekiston XDP Sariosiyo tuman kengashi raisi Rustam Ramazonov. — Ularning barchasi «O‘zbekiston ovozi»ni, 5 nafari esa «Golos Uzbekistana»ni olayapti. Mavjud 41 boshlang‘ich partiya tashkilotining aksariyatida obuna tashkil qilingan. Bir so‘z bilan aytganda, «O‘zbekiston ovozi»ga 31 nusxa, «Golos Uzbekistana»ga 7 nusxa obuna rasmiylashtirilgan.

Uning ma’lumotlari kishini quvontiradi, albatta. Ammo Sariosiyo tuman «Matbuot tarqatuvchi» shu’ba korxonasi va «Sariosiyo pochta» aloqa tarmog‘idan olingan ma’lumotda esa buning aksiga guvoh bo‘ldik. Hozirgi kunda tuman bo‘yicha «O‘zbekiston ovozi»ga hammasi bo‘lib 11 nusxa, «Golos Uzbekistana»ga esa 2 nusxa obuna borligi aniqlandi. Gazetalar tuman hokimligi, Maishiy xizmat ko‘rsatish kasb-hunar kolleji, Uzun davlat o‘rmon xo‘jaligi, «Surxon telekom» Sariosiyo tuman bo‘limi, harbiy qism, Muruvvat uyi va O‘zbekiston XDP Sariosiyo tuman Kengashiga yetkazib berilayotgan ekan. Bu esa sariosiyolik deputatlar va faollarimizning ko‘pi partiya nashrlarini o‘qimasligidan dalolat beradi. Deputat gazetaga obuna bo‘lish orqali o‘zi a’zo bo‘lgan partiya bugungi kunda qanday ishlar bilan bandligini, mamlakatda olib borilayotgan siyosat va islohotlarning mazmun-mohiyati bilan yaqindan tanishadi. Boshqa deputatlarning namunali ishlaridan xabardor bo‘lib, o‘z faoliyatiga baho berishni o‘rganadi.

O‘zbekiston XDP Sherobod tuman Kengashida esa bu borada ahvol yanada achinarli. 2018 yil uchun tumanda barcha sohalar bo‘yicha jami 13 nusxa obuna rasmiylashtirilgan, xolos.

— Shu yilning iyun oyida ish boshladim, — deydi O‘zbekiston XDP Sherobod tuman kengashi raisi, xalq deputatlari tuman Kengashidagi O‘zbekiston XDP guruhi a’zosi Ikrom Bo‘ronov. — To‘g‘risini aytganda, muammolar to‘planib qolgan ekan. O‘rganishlar davomida tuman Kengashi sessiyalariga dolzarb masalalar kiritilmagani aniqlandi. «Faol ayollar» va «Istiqbol» yoshlar qanotlari faoliyati o‘z holiga tashlab qo‘yilganini tan olish kerak. Shu bilan bir qatorda obunaga ham panja ortidan qaralganini inkor qilib bo‘lmaydi. Tumanda 31 boshlang‘ich partiya tashkiloti, 2 ming 800 dan ortiq partiyadoshimiz bor. Tuman Kengashida 10 nafar deputatimiz faoliyat ko‘rsatmoqda. Obuna rejasi esa 10-21 foizga bajarilgani achinarli, albatta. Muammoga yechim topish uchun hozirdanoq ishga yangicha munosabat va o‘zgacha mas’uliyat bilan yondashayapmiz...

— To‘g‘ri, beparvo faollarimiz bor, — deydi O‘zbekiston XDP Jarqo‘rg‘on tuman kengashi raisi, xalq deputatlari tuman Kengashidagi O‘zbekiston XDP guruhi a’zosi Alisher Mamatmurodov. — Bir gap bo‘lar, qabilida ish yuritayotgan mas’ullaru loqayd deputatlar uchraydi. Endi kechagi kun bilan yashab bo‘lmasligini his qilishimiz kerak. Buning uchun matbuot bizga yaqin ko‘makchi bo‘lishiga ishonaman. Bizda 14 nafar deputatning barchasi obuna bo‘lgan. Tumanimizda jami obuna 150 nusxaga yaqin. Kelgusi yilda ularning soni 170 taga yetishi ko‘zda tutilgan.

— Yaqin-yaqingacha matbuotda tanqidiy-tahliliy chiqishlar juda kam bo‘lgan, — deydi xalq deputatlari Surxondaryo viloyat Kengashidagi O‘zbekiston XDP guruhi a’zosi Bahodir Tog‘ayev. — Yurtdoshlarimizni qiynayotgan masalalar deyarli ko‘tarilmasdi. Davlatimiz rahbarining tashabbusi bilan o‘zbek matbuoti haqiqiy ma’noda to‘rtinchi hokimiyat maqomiga ega bo‘lish uchun kurashmoqda. Bugun kamchiliklar ro‘y-rost gapirilmoqda.

«O‘zbekiston ovozi»da Xorazm, Navoiy, Qashqadaryo viloyatlaridan qator tanqidiy-tahliliy maqolalar berildi. Partiyaviy, iqtisodiy, ijtimoiy va boshqa sohalardagi chiqishlarda ham davr ruhini sezish mumkin. Bu quvonarli, albatta. Ammo biz tomoshabin bo‘lmasdan bu jarayonlarda faol qatnashishimiz kerak.

Joylarda matbuot nashrlarini o‘quvchilarga yetkazib berish va sotuvini yo‘lga qo‘yish borasida ham og‘riqli nuqtalar borligidan ko‘z yumib bo‘lmaydi. Bu esa mushtariylarning kundalik matbuotga bo‘lgan ishonchini yo‘qotmoqda, haqli e’tirozlarga sabab bo‘layapti.

— Yetmish yoshdaman, — deydi Denov tumanining «Mehnatobod» mahallasida istiqomat qiluvchi mehnat faxriysi Abdusamad Boboyusupov. — «O‘zbekiston ovozi»ni ko‘p yillardan buyon mutolaa qilaman. O‘tgan yili obuna bo‘lolmaganim uchun tuman markazida joylashgan gazeta-jurnal sotiladigan shoxobchaga qatnayman. Ba’zan sotuvchi «O‘zbekiston ovozi» sotilib ketganini aytadi. Boshqasida esa partiya nashrlari yo‘q ekan. Nahotki olis hududlarda gazeta-jurnal savdosini namunali tashkil qilish imkoniyati bo‘lmasa?!

— Yutuq bor joyda kamchilik bo‘lishi tabiiy, — deydi Denov tuman «Matbuot tarqatuvchi» shu’ba korxonasi boshlig‘i Normamat Jumayev. — Ichki imkoniyatdan kelib chiqqan holda muammolarni bartaraf qilayapmiz. Haftaning dushanba, chorshanba va juma kunlari 40 nomdan ortiq 12 ming nusxaga yaqin gazeta-jurnal qabul qilamiz. Uning asosiy qismi obunachilarga yetkazilsa, qolgani sotuvga chiqariladi. 370 ming nafardan ziyod aholi istiqomat qiladigan tumanda 5 dona matbuot shoxobchasi kamlik qilishi tabiiy. Shunday ekan, yana bir nechta ko‘chma do‘kon faoliyati yo‘lga qo‘yilsa yaxshi bo‘lardi.

— Matbuot — hayot ko‘zgusi, — deydi Sho‘rchi tuman tibbiyot birlashmasidagi O‘zXDP boshlang‘ich partiya tashkiloti yetakchisi Chori Qoraqulov. — Undan nafaqat mamlakatimiz, balki, dunyoda ro‘y berayotgan voqea-hodisalardan ham xabardor bo‘lamiz. Qisqasi, axborot asrida matbuotning o‘rni va roli kundan-kunga oshmoqda.

Xo‘sh, biz ommaviy axborot vositalaridan unumli foydalanayapmizmi?! Afsuski, yo‘q! Ayni kunlarda tumanda 2 mingdan ortiq korxona va tashkilot bor. Kichik biznes va xususiy tadbirkorlik yo‘nalishidagi majmualar yil sayin ko‘paymoqda. Ammo boshlang‘ich partiya tashkilotlarimiz soni bor-yo‘g‘i 41 tani tashkil qilar ekan. Bu esa faoliyatimiz tizimli va to‘g‘ri yo‘lga qo‘yilmaganidan dalolat beradi.

Bu kabi fikrlarni ko‘pchilikdan eshitdik. Darhaqiqat, matbuot qadrini bilgan biladi, undan samarali foydalanadi. Matbuot qanday kuchligini bilmagan kishi unga obuna bo‘lish yoki sotib olib o‘qish haqida o‘ylamaydi ham.

Xalq deputatlari Surxondaryo viloyat Kengashi deputatlari, partiya faollari va a’zolarining partiya nashrlariga bunday munosabati kishini o‘yga toldiradi. Ehtimol, ular O‘zbekiston XDP Markaziy Kengashi tomonidan partiya gazetalariga obuna bo‘lishlari tavsiya etilganidan ham bexabar bo‘lishsa kerak? Bunisi mayliya, partiyaga a’zoliklari eslaridan chiqqan bo‘lmasinda...

 

Abdumalik HAYDAROV,

«O‘zbekiston ovozi» muxbiri.


Fikr va mulohazalar

Spam bot protection (CAPTCHA)

So‘nggi yangiliklar: