07.08.2018

POMPEO E’TIROFI ORTIDAGI HAQIQAT

AQSh Davlat kotibi Mayk Pompeo fikriga ko‘ra, O‘zbekiston erkin jamiyatga aylanish sari qadam tashlamoqda

Janob Pompeo e’tiqod erkinligi taraqqiy etgan mamlakatlarda rivojlanish bo‘lishini ta’kidlab, bunga O‘zbekistonni misol qilib ko‘rsatdi. «E’tiqod erkinligi ilgarigiga qaraganda kengaygani bu mamlakat va jamiyat, shuningdek, butun mintaqaga ijobiy ta’sir ko‘rsatishiga ishonchimiz komil», dedi Pompeo yaqinda Vashington shahrida din erkinligi masalasiga bag‘ishlab o‘tkazilgan nufuzli xalqaro konfrensiyada.

Ushbu anjumanda O‘zbekistondan ham katta delegatsiya qatnashdi. O‘zbekiston Tashqi ishlar vaziri Abdulaziz Komilov, Adliya vaziri Ruslanbek Davletov, Oliy Majlis Senati Raisining birinchi o‘rinbosari Sodiq Safoyev, Inson huquqlari bo‘yicha milliy markaz rahbari, akademik Akmal Saidov hamda Afg‘oniston bo‘yicha maxsus vakil Ismatilla Ergashev Vashingtonda yuqori lavozimli rasmiylar bilan uchrashib, mamlakatning bugungi tashqi va ichki siyosati bilan bog‘liq jarayonlar to‘g‘risida batafsil ma’lumot berishdi.

Vashington muloqotni yaxshi ko‘radi. Yuzma-yuz samimiy suhbatlar global muammolarni hal etish uchun har doim ham kifoya emas, lekin dialog va muhokamalar Amerika siyosiy faoliyatining ajralmas qismi, ayniqsa, gap O‘zbekistondek «yangicha yo‘nalishni tanlagan davlat» haqida ketayotgan bo‘lsa, deydi diplomatlar.

Pompeoning xalqaro anjumanda O‘zbekiston haqida iliq fikr bildirgani aynan Toshkent — Vashington o‘rtasidagi bugungi dialog ko‘lami va ruhini ko‘rsatadi. Tramp ma’muriyati Mirziyoyev ma’muriyatiga ishonch bilan qaramoqda. Respublikaning rahbari va boshqa arboblari fikrlari o‘rganib borilmoqda va mana shu tasdiqlangan ma’lumotlarga asoslanib, O‘zbekiston bugun «to‘g‘ri yo‘lda» ekaniga ishonch hosil bo‘lmoqda.

AQSh o‘zini global maydonda e’tiqod erkinligi targ‘ibotchisi deb biladi. Xususan, Tramp ma’muriyatining tashqi siyosatida bu mavzuga urg‘u katta.

Oq uy rasmiysi Jastin Kolbert Vashingtondagi Milliy axborot markazida o‘tgan tadbirda so‘zlar ekan, O‘zbekiston hukumati bugungi kunda diniy erkinlik singari nozik masalalarni ochiq muhokama qilayotgani tahsinga sazovor, dedi. Shuningdek, u O‘zbekiston inson huquqlarini ta’minlash, bolalar mehnatiga barham berish, ijtimoiy adolatni ta’minlash yo‘lidagi islohotlarda ulkan muvaffaqiyatga erishdi, degan yuksak bahoni berdi.

May oyida O‘zbekiston rahbari Shavkat Mirziyoyev Oq uyda Prezident Donald Tramp bilan muzokara olib borganida, uning yonida Diniy erkinlik bo‘yicha maxsus elchi Sem Braunbek o‘tirgan edi. Braunbekning yaqin kunlarda O‘zbekistonga safar qilishi kutilmoqda.

25 iyulda Milliy matbuot markazida yangragan bayonotlar va jurnalistlar bilan olib borilgan munozara ertasiga Pompeo tomonidan qilingan nutqqa o‘z ta’sirini ko‘rsatdi. Xo‘sh, O‘zbekiston rasmiylari nima dedi?

Tashqi ishlar vaziri Abdulaziz Komilov dediki, e’tiqod erkinligini ta’minlash O‘zbekiston uchun nihoyatda dolzarb vazifadir. Komilov AQSh siyosiy va ilmiy doiralari vakillari oldida qilgan nutqida «inson huquqlari toptaladigan emas, hurmat qilinadigan, uzviy erkinliklar e’zozlanadigan jamiyat qurishga bel bog‘laganmiz», dedi.

Adliya vaziri Ruslanbek Davletov Amerika ommasiga bugungi qonunchilikni tushuntirar ekan, «fuqarolarning erkinlik darajasini xalqaro me’yor va qonunlarga javob berishini ta’minlaymiz», deya ta’kidladi. Bugungi islohotlar jamiyatdagi muhitni liberallashtiradi, deya ishonch bildirdi u.

Senator Sodiq Safoyev so‘zlariga ko‘ra, repressiya beqarorlikka yetaklaydi. Erkinlikni ta’minlash, o‘z huquq va burchlarini yaxshi anglagan fuqarolarni tarbiyalash har bir davlat kelajagi uchun o‘ta muhim. O‘zbekiston buni yaxshi tushunadi va shu yo‘ldan boradi.

«Siyosiy muxolifat bo‘lmagan muhitda yoshlar ekstremist guruhlarga qo‘shilib, shu tarzda o‘z muxolif qarashlarini namoyon etishi mumkin. O‘zbekiston hukumati undan qo‘rqmaydimi?» Bu savolga Sodiq Safoyev quyidagicha javob berdi: Ekstremizmga siyosiy muxolifat deb qarash noto‘g‘ri. Odamlar o‘z qarashlari va takliflarini tinch yo‘l bilan, demokratik tizimlar orqali bildirishi zarur. O‘zbekiston demokratiya yo‘lidan ketmoqda, yosh avlod ham, kattalar ham erkin tarzda yashaydigan jamiyat bo‘lishini maqsad qilgan.

Inson huquqlari bo‘yicha milliy markaz rahbari Akmal Saidov fikriga ko‘ra, respublika bu borada xalqaro organlar, xususan, BMTning tegishli agentliklari va boshqa tashkilotlar bilan yaqindan ishlayapti.

Qonunlar amaliyoti suv va havodek zarur, dedi deputat. Ularning ijrosini ta’minlamay turib, dunyoviylikni targ‘ib qilish mumkin emas. Demokratik institutlar ishlashi va samara berishi kerak. Ta’lim va tarbiyadan tortib, jamiki boshqa jabhalargacha, barchasini isloh qilish va mustahkamlash lozim. Qonun ustuvorligiga erishish yo‘lida qilinadigan ishlarimiz ko‘p.

Strategik sheriklik huquq masalasida hamohanglik talab etadi, deydi rasmiylar. O‘zbekiston uzoq payt o‘z siyosatini ochiq tushuntirishni istamagan edi. Endilikda uning rasmiylari dunyo kezib, xalqaro tillarda, masalan, inglizchada O‘zbekistonning bugungi pozitsiyasini izohlab berayotgani progressga oddiy misol, deydi G‘arb diplomatlari.

AQShda O‘zbekistondagi bugungi o‘zgarishlarga katta qiziqish bilan qaralmoqda va bu jarayonga yuqori baho berilmoqda.

Men yaqinda O‘zbekistonda bo‘lib qaytgan jurnalist sifatida aytishim kerakki, Pompeo e’tirofi ortidagi haqiqatlarni o‘z ko‘zim bilan ko‘rdim.

O‘zbekistonda hayotga yangicha yondashuvlar boshlangan, muhit o‘zgarmoqda. Xalq yangi g‘oyalar bilan ruhlantirildi. Bular hammasi O‘zbekiston taraqqiyotini yangi bosqichga olib chiqishidan darak beradi.



Navbahor IMOMOVA,

«Amerika ovozi» teleradiosi jurnalisti.

Vashington.



DB query error.
Please try later.