07.01.2017

БОШ ВАЗИФА — ЁНҒИН ХАВФСИЗЛИГИНИ ТАЪМИНЛАШ

Статистик маълумотларга кўра, республикамиз ҳудудида ҳар йили 13 мингдан ортиқ ёнғин содир бўлиб, 500 нафардан ортиқ инсон турли даражадаги тан жароҳати олмоқда, айримлари ногирон бўлиб қолмоқда. Ёнғинлар туфайли етказилган моддий зарар миқдори эса бир неча миллиард сўмдан ошади.

Ёнғинларнинг олдини олиш бўйича жойларда ўтказилаётган учрашувларда ёнғин хавфсизлиги хизмати ходимлари ёнғинларнинг сабаб ва оқибатлари ҳақида тушунтириш ишларини олиб бормоқда. Шунингдек, лоқайдлик ва эътиборсизлик сабабли келиб чиқиши мумкин бўлган ёнғин пайтида одамлар ўзларини қандай тутиши кераклиги, биринчи нав­батда, кўриладиган чоралар тўғрисида тавсиялар бериляпти. Фуқароларга носоз, қўлбола электр ускуналардан фойдаланмаслик, шунингдек, ёнғин хавфсизлиги қоидаларини нафақат ишда, балки уйда ҳам унутмасликлари таъкидлаб келинмоқда.

Ёнғинларни келтириб чиқарувчи сабаблар, унинг даҳшатли асоратлари ва етказган талафотлари ҳақида ҳикоя қилувчи видеороликлар ҳам намойиш қилиняпти. Бундан ташқари, ёнғин ўчирувчи мосламалар ҳақида ҳам батафсил маълумотлар бериляпти. Биноларда ёнғиндан автоматик равишда хабар берувчи ускуналар, автоматик равишда ёнғин ўчириш қурилмалари, бирламчи ёнғин ўчириш воситалари, содир бўлиши мумкин бўлган ёнғинларни ўчиришга мўлжалланган ички ва ташқи сув тармоқлари ҳамда захира чиқиш йўлаклари ҳақида тушунтириш ишлари олиб борилмоқда. Фуқароларга ёнғин хавфсизлиги қоидаларини тарғиб қилувчи плакат ва эслатмалар ­тарқатилаётир.

Республика миқёсида содир бўлаётган ёнғинларнинг таҳлилига эътибор берадиган бўлсак, ёнғинларнинг аксарият қисми электр симларининг қисқа туташуви натижасида юз бермоқда. Электр кабелларидаги қисқа туташувлар электр энергия ва мосламалардан (электр иситиш ускуналари, электр чойнак, турли электр дастгоҳлар ва ҳ.к) фойдаланиш қоидаларини бузиш, электр кабелларни хоналарнинг тоифаларини ҳисобга олмасдан танлаш ҳамда сифатсиз қурилиш материалларидан фойдаланиши оқибатида юзага келмоқда.

 

Ҳилола ТЕМИРОВА,

Ўзбекистон Республикаси ИИВ ЁХББ муҳандиси, подполковник.



DB query error.
Please try later.