05.01.2017

УСТУВОР ВАЗИФАЛАР БЕЛГИЛАБ ОЛИНДИ

Ёши улуғ кишиларнинг иззат-ҳурматини жойига қўйиш, уларнинг руҳини, кўнглини кўтариш, ғамхўрлик қилиш хал­қимизга хос фазилат. Шу боис юртимизда кексалар ҳамиша эъзозда.

Ўзбекистон Республикаси Президенти Шавкат Мирзиёевнинг Ўзбекистон фахрийларини ижтимоий қўллаб-қувватлаш «Нуроний» жамғармаси фаолиятини янада такомиллаштириш чора-тадбирлари тўғрисидаги фармони хонадонларимиз файзи ва фариштаси бўлган кексаларга ғамхўрликнинг яна бир намунаси бўлди.

Ўзбекистон ХДП фракциясининг навбатдаги йиғилишида депутатлар мазкур фармондан келиб чиқадиган, партия ва унинг депутатлик корпуси олдида турган вазифаларни муҳокама қилишди.

— Президентимизнинг мазкур фармони ёши улуғ инсонларга кўрсатилаётган юксак эътиборни янги босқичга кўтаради, — деди Олий Мажлис Қонунчилик палатаси депутати, ЎзХДП фракцияси аъзоси Саттор Раҳматов. — Фармонда белгиланган вазифалар «Нуроний» жамғармаси фаолиятини тубдан ўзгартириб, нафақат кексаларимизни ижтимоий қўллаб-қувватлаш, балки уларнинг бой ҳаётий тажрибасини ижтимоий фаолиятга кенг жалб этишга хизмат қилади.

Одатда узоқ йиллар ишлаган одам нафақага чиққач, худди ўзини кераксиздек ҳис қила бошлайди. Аслида улар тўплаган тажриба, панд-насиҳатларга ёшлар ҳамиша эҳтиёж сезади. Фармонда қайд этилганидек, пенсияга чиққандан кейин нуронийларнинг юқори ижтимоий фаоллигини, шу жумладан, уларнинг мамлакат ижтимоий-сиёсий ҳаёти ҳамда давлат органлари фаолияти устидан жамоатчилик назоратини амалга оширишдаги иштирокини қўллаб-қувватлашимиз лозим.

— Президентимиз фармони ёлғиз кексалар, пенсионер ва ногиронларнинг турмуш даражаси ва сифатини ошириш, шуни­нг­дек, уруш ва меҳнат фахрийларини эъзозлаш йўлидаги муҳим қадам бўлди, — дейди Олий Мажлис Қонунчилик палатаси депутати, ЎзХДП фракцияси аъзоси Турсунпўлат Норбоев. — Қонун ҳужжатлари ижроси устидан жамоатчилик назоратини таъминлаш, эҳтиёжманд кексалар ва аҳолининг бошқа қатламларини ижтимоий қўллаб-қувватлаш, тиббий хизмат сифатини ошириш бўйича фармонда белгиланган чоралар Ўзбекистон Халқ демократик партиясининг дастурий вазифаларига ҳар жиҳатдан мос келади. Демак, биз бу борада янада фаол бўлишимиз зарур. Учрашувларда пенсионерлар билан очиқ, самимий мулоқот қилиб, уларнинг ҳаётий муаммоларини ҳал қилишга кўмаклашишимиз талаб этилади. Зеро, кексалар бахтли бўлса, оила ҳам, жамият ҳам бахтиёр бўлади.

Йиғилишда фракция олдида турган вазифалар белгилаб олинди.

 

Гулруҳ ОДАШБОЕВА,

«Ўзбекистон овози» мухбири.



DB query error.
Please try later.