Охирги сонда



Кўп ўқилган мақолалар



Долзарб мавзу



Мақолалар архиви

«    Avgust 2018    »
Du Se Cho Pa Ju Sha Ya
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
29.05.2018

ЭНДИ ПАРЛАМЕНТ АЪЗОЛАРИ ТАШҚИ АЛОҚАЛАРДА ФАОЛ ИШТИРОК ЭТАДИ

Демократик давлат ва ҳуқуқий жамият ҳақида сўз кетганда, биринчи галда парламент, вакиллик ҳокимиятини тасаввур қиламиз. Уларнинг таъсир кучини оширмасдан, катта ўзгаришларга умид қилиш қийин.

Шунинг учун жорий йилнинг апрель ойида бир қатор қонунларга ўзгартириш ва қўшимчалар киритилди. «Сиёсий пар­тия­лар тўғрисида»ги, «Ўзбе­кистон Республикаси Олий Мажлиси Қонунчилик палатасининг Регламенти тўғрисида»ги, «Ўзбекистон Республикаси Олий Мажлиси Сенатининг Регламенти тўғрисида»ги, «Халқ депутатлари вилоят, туман ва шаҳар Кенгашларига сайлов тўғрисида»ги қонунлар бунга мисол бўла олади.

Ўзгаришларга кўра, партия гуруҳлари аъзоларининг ҳуқуқ ҳамда ваколатлари кенгайтирилди. Сайловчилар олдидаги масъулияти оширилди. Хусусан, депутатлар ҳудудларни ривожлантириш дастурларининг лойиҳаларини такомиллаштириш юзасидан таклифлар киритиш ҳуқуқига эга бўлди. Туман (шаҳар) ҳокимининг, тегишли маҳаллий ижро этувчи ҳокимият органлари мансабдор шахсларининг қо­ниқарсиз фаолияти тўғрисида Жўқорғи Кенгесга, вилоят ёки Тошкент шаҳар ҳокимига хулоса тақдим этиши мумкин бўл­ди. Эндиликда халқ вакиллари сайловчилар ишончини оқлаш билан бирга, уни депутатликка номзод қилиб кўрсатган сиёсий партия олдидаги мажбуриятларини бажариши зарур. Акс ҳолда, тақдимнома асосида депутат чақириб олиниши, яъни ваколатлари муддатидан олдин тўхтатилиши мумкин. Ушбу тартиб Қонунчилик палатаси депутатлари ва Сенат аъзоларига нисбатан ҳам татбиқ этилади.

Шу билан бирга, хориж парламенти билан муносабатларни мустаҳкамлашга қаратилган меъёрлар ҳам жорий этилди. Яъни, қонунчиликда парламент­лараро гуруҳлар ва комиссиялар тузиш тартиби белгиланди.

Парламентаризм ривожининг бугунги замонавий босқичида ташқи сиёсат соҳасида депутатлар ҳам фаол иштирок этиши зарур. Олий Мажлис Қонунчилик палатасидаги ЎзХДП фракцияси аъзоси Феруза Эшматова бу ҳақда қуйидагича фикр билдирди:

Парламент аъзолари таш­қи сиёсат соҳасида халқаро шартномаларни ратификация ҳамда денонсация қилиш, дипломатик ва халқаро ташкилотларга вакилларни лавозимга тасдиқлаш жараёнларида иштирок этади.

Ташқи алоқаларни ривожлантиришда парламент ролини кучайтириш, мамлакатимизнинг халқаро имиджини мустаҳкамлаш долзарб аҳамиятга эга. Шу масалада ҳуқуқий асосларни такомиллаштириш устувор вазифа бўлиб, янгича ёндашувни талаб этади.

Парламентлараро ҳамкорлик халқаро амалиётда одатда парламентлараро гуруҳлар, парламентлараро комиссиялар, ишчи гуруҳлар ва бошқа давлатлар парламентлари билан ҳамкорлик бўйича турли тузилмаларни ташкил этиш орқали амалга оширилади.

Маълумки, хорижий давлатлар парламентлари билан ҳамкорлик бўйича парламентлараро гуруҳлар ташкил этилган. Ўз нав­батида, 40 га яқин хорижий мамлакатлар парламентларида мамлакатимиз парламенти билан ҳамкорлик бўйича турли шаклдаги тузилмалар ҳам фаолият юритмоқда. Улар тўғридан-тўғри мулоқот ўрнатиш учун ташкил этилган бўлиб, парламентлар аъзоларини бирлаштиради.

Олий Мажлис парламентлар­аро гуруҳлари таркибига 90 нафардан ортиқ парламент аъзолари, хорижий парламентлар­аро гуруҳлар таркибига 230 дан зиёд парламентарийлар кирган. Мазкур гуруҳлар фаолияти доирасида Буюк Британия, Италия, Канада ва Латвия парламентлари билан ҳамкорлик меморандумлари имзоланди.

2017 йил октябрь ойидан Ўзбекистон ўзининг Парламентлараро иттифоқда аъзолигини тиклади ва унинг сессияларида парламентимиз аъзолари фаол иштирок этиб келишмоқда.

Миллий қонунчилигимиз атрофлича таҳлил қилинди. Парламент аъзоларининг фаоллигини ошириш учун қонунчиликни яхшилаш зарурлиги аён бўлди. Парламентлараро гуруҳларни тузиш, улар фаолияти, расмий парламент делегацияларини ташкил этиш масалаларини тартибга солиш мақсадида «Ўзбекистон Республикаси Олий Мажлиси Қонунчилик палатаси Регламенти тўғрисида»ги, «Ўзбе­кис­тон Республикаси Олий Мажлиси Сенати Регламенти тўғрисида»ги қонунларга ўзгартиш ва қўшимчалар киритилди. Унда ҳамкорлик бўйича парла­мент­­лар­аро гуруҳлар, комиссия­лар, қўмиталар, ишчи гуруҳлар ва хорижий мамлакатлар парламентлари билан ҳамкорлик бўйича бошқа тузилмаларни ташкил этиш масалалари такомиллаштирилди. Шунингдек, хорижга юборилаётган расмий парламент делегацияларини ташкил этиш тартиби белгиланди.

Бу янгиликлар парламентимиз аъзоларининг фаоллиги ҳамда масъулиятини оширишда муҳим аҳамиятга эга бўлади.

 

Зилола УБАЙДУЛЛАЕВА,

«Ўзбекистон овози» мухбири.



DB query error.
Please try later.