26.06.2018

ОЗИҚ-ОВҚАТ МАҲСУЛОТЛАРИ СИФАТИ БЎЙИЧА ЖАВОБГАРЛИК КУЧАЙТИРИЛМОҚДА

Олий Мажлис Қонунчилик палатасидаги Ўзбекистон ХДП фракциясининг навбатдаги йиғилишида қатор қонун лойиҳалари муҳокама қилинди.

Депутатлар «Ўзбекистон Республикаси Маъмурий жавобгарлик тўғрисидаги кодекснинг 178-моддасига ўзгартириш киритиш тўғрисида»ги қонун лойиҳасига алоҳида эътибор қаратди. Чунки бу ўзгартириш аҳоли истеъмоли учун мўлжалланган озиқ-овқат маҳсулотлари сифатини янада яхшилашга хизмат қилади.

— Айтиш керакки, ҳар бир меъёрий-ҳуқуқий ҳужжат аввало инсон омилига қаратилган бўлиши керак, — деди Олий Мажлис Қонунчилик палатасидаги ЎзХДП фракцияси аъзоси Қаҳрамон Мирзаев. — Мазкур қонун лойиҳаси орқали товарнинг сифати ва истеъмол хусусияти тўғрисида истеъмолчиларни чалғитиш билан боғлиқ ҳолатларга жавобгарликни ошириш масаласи назарда тутилган. Яъни, товарларни унга ўхшаш маҳсулотлар билан алмаштириб қўйиш, онгли равишда маҳсулотнинг хусусияти ва сифати ўзгаришига йўл қўйилганда жавобгарликни кучайтириш масаласи илгари сурилмоқда. Фракциямиз фикрича, бу каби ҳолатларга чек қўйиш муҳим саналади. Шунингдек, озиқ-овқат маҳсулотини ишлаб чиқариш, юртимизга олиб кириш ва реализация қилишда содир этилган ҳуқуқбузарликлар юзасидан ҳам чоралар кучайтирилиши керак. Бу ўз навбатида тадбиркорларнинг масъулиятини оширишга, бозорларимизни сифатли озиқ-овқат билан таъминлашга хизмат қилади.

 

Президентимизнинг 2018 йил 17 апрелдаги «Қишлоқ ва сув хўжалиги давлат бошқаруви тизимини тубдан такомиллаштириш чора-тадбирлари тўғрисида»ги фармони ҳамда 7 майдаги «Ўзбекистон Республикаси Бош прокуратураси ҳузуридаги Агросаноат мажмуи ва озиқ-овқат хавфсизлиги таъминланиши устидан назорат қилиш инспекцияси фаолиятини ташкил этиш чора-тадбирлари тўғрисида»ги қарорига асосан Бош прокуратура ҳузурида инспекция ташкил этилиб, унинг вазифалари белгиланди.

Президент қарорига мувофиқ жорий йил 1 августдан Агросаноат мажмуи ва озиқ-овқат хавфсизлиги таъминланиши устидан назорат қилиш инспекцияси ўз фаолиятини бошлайди. Шу муносабат билан Вазирлар Маҳкамаси ҳузуридаги Давлат дон, «Ўзсувназорат» республика сув инспекциялари, Машина ва асбоб-ускуналарнинг техник ҳолатини назорат қилиш, Чорвачиликда наслчилик ишлари бош давлат инспекциялари, «Ўздавуруғназоратмарказ» қишлоқ хўжалиги экинлари уруғини сертификациялаш ва сифатини назорат қилиш давлат маркази ҳамда «Ўзстандарт» агентлигининг «Ўзбекистон пахта маҳсулотларини сертификатлаш «Сифат» маркази» давлат корхонаси тугатилиб, ушбу ташкилотларнинг қонун ҳужжатларида белгиланган вазифа ва ваколатлари Инспекцияга ўтказилмоқда.

Бу янгиликлар амалдаги айрим қонун ҳужжатларига ўзгартириш ва қўшимчалар киритишни тақазо этмоқда. Йиғилишда мазкур масала ҳам атрофлича муҳокама қилинди. Фракция аъзолари лойиҳа юзасидан ўз фикр-мулоҳазаларини билдирди. Лойиҳанинг рус ва ўзбек тилидаги матнлари ўзаро мутаносиблигига эътибор қаратиш, камчиликларни тўлдириш ҳамда янада такомиллаштириш юзасидан таклифлар берилди.

Йиғилишда кўриб чиқилган барча қонун лойиҳалари бўйича фракция ўз позициясини белгилаб олди.

 

Зилола УБАЙДУЛЛАЕВА,

«Ўзбекистон овози» мухбири.



DB query error.
Please try later.