Охирги сонда



Кўп ўқилган мақолалар



Долзарб мавзу



Мақолалар архиви

«    Yanvar 2020   
Du Se Cho Pa Ju Sha Ya
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
10.12.2019

ИННОВАЦИЯ – МУВАФФАҚҚИЯТЛАР АСОСИ

“Биз учун нон қанчалик азиз ва қадрли бўлса, заҳматкаш деҳқонларимиз, уларнинг меҳнати ҳам шунчалик азиз ва қадрлидир.

Ҳақиқатан ҳам, уруш ва очарчиликни бошидан кечирган бобо ва момоларимиз бизга болаликдан бошлаб нонни кўзимизга суртиб эъзозлашни ўргатганлар. Бу бизнинг буюк қадриятимизга айланган.”

Давлатимиз раҳбарининг Бош Қомусимиз 27 йиллигига бағишланган тантанали маросимдаги маърузасида билдирган бу фикрларини тинглар эканман, болалигимизда ота-онамизу устозларнинг ноннинг ушоғи ҳам азиз, унинг ерга тушганини кўзга суртиб эъзозлаш зарурлиги ҳақидаги ўгитлари ёдимга келди. Эндиликда олтмишни қоралаб қўйганимга қарамай, ана шу насиҳатларга ҳозиргача амал қилиб, фарзанду неваралар қалбига бебаҳо неъматларни қадрлаш туйғусини сингдиришга ҳаракат қиламан.Бу ўз навбатида ҳаётимизда рўй бераётган ижобий ўзгаришлар билан уйғунликда кечаётгани зиммамизга янада масъулият юклайди.

Деҳқонларимизнинг бу йилги меҳнатига қанча таҳсин айтсак, эъзозласак шунча оз, албатта. Мавсумнинг қирқ куни ёмғирли, яна шунчаси жазирамали бўлишига қарамай, деҳқону фермерларнинг ақл-заковати ва пешона тери билан 7 миллион 130 минг тонна ғалла, 2 миллион 845 минг тонна пахта, 19 минг 600 тонна пилла, 21 миллион тонна мева-сабзавот, 400 минг тонна шоли, 2 миллион 600 минг тонна гўшт етиштирилди, 11 миллион тонна сут маҳсулотлари тайёрланиб, 8,1 миллиард дона тухум олинди.

Албатта, бундай марраларга эришишда уларга инновацияга асосланган тизимлар қўл келяпти, янгича ёндашувлар натижасида экспорт салоҳиятимиз ортиб бораяпти. Хусусан, жорий йилда пахта ҳосилининг 73 фоизи пахта-тўқимачилик кластерлари ҳиссасига тўғри келди, 1,3 миллиард АҚШ доллари қийматидаги 1,5 миллион тонна мева-сабзавот экспорт қилинди. Энг муҳими, бу борадаги ишлар келгусида янада кенг кўлам касб этиб бораверади. 2020 йилда мева-сабзавот маҳсулотларининг экспортини 2,5 миллиард долларга, яқин уч йилда эса 5 миллиард долларга етказиш мақсад қилиб қўйилган.

2020 йилда ҳам инновацияга асосланган инвестиция лойиҳаларини амалга ошириш ишлари давом эттирилади.Хоразм вилоятида 7 гектар майдонда янги қурилаётган замонавий иссиқхонада йилига 175 тонна экспортбоп қовун етиштириш йўлга қўйилади.Ҳиндистоннинг «Kalash Seeds» селекция компанияси билан биргаликда Андижон вилоятининг Асака туманида юқори технологик уруғчилик кластери ташкил этилади.

АҚШнинг «Valmont Industries» компанияси билан ҳамкорликда Навоий вилояти Қизилтепа туманининг 100 гектар майдонига ёмғирлатиб суғоришнинг замонавий технологияси жорий этилиб, бошқа ҳудудларда ҳам бу борада олиб борилаётган ишлар кўлами янада кенгаяди. Жанубий кореялик компанияларнинг инвестициялари ҳисобига Самарқанд ва Жиззах вилоятларида оқ мағзли ярим пакана ёнғоқнинг кўчатзор плантацияси барпо этилади, унинг ниҳоллари бошқа вилоятларга ҳам етказиб берилади. Бу лойиҳанинг аҳамиятли томони, етиштирилган ёнғоқларнинг аксарият қисми экспорт қилинади.Сабзавот ва полиз экинлари уруғчилиги бўйича иш бошлайдиган станцияларнинг фаолияти ҳам асосан шу мақсадга йўналтирилади. Хусусан, Бухоро вилоятининг ўзида яқин истиқболда 50 минг гектар майдонда замонавий иссиқхоналар қуриш белгиланган.

Келгуси йилдаги инновацион лойиҳаларга доир мисолларни яна кўплаб келтириш мумкин. Яна бир муҳим томони, ҳудудларнинг инновацион ривожланишини ташкил қилиш ва такомиллаштириш мақсадида ҳар бир вилоятнинг 2030 йилгача бўлган муддатга мўлжалланган дастурларини ишлаб чиқиш режалаштирилмоқда. Мазкур дастурлар иқтисодиётнинг барча соҳаларини ўз ичига олади, уларнинг ўзаро уйғунликда ишлашини таъминлайди.

Яқин истиқболда бошқа соҳалардаги каби қишлоқ хўжалигига доир инновацион дастурларда ҳам катта-катта мақсадлар қамраб олинган. Президентимиз эътироф этганидек, юксак марраларга эришишда Конституциямизда белгиланган ҳуқуқларимиз бизга раҳнамо бўлади, куч-қудрат манбаи бўлиб хизмат қилади. Демакки, эзгу орзу-интилишларни ифода этган ислоҳотлар жадал давом этади. Нафақат давом этади, балки янги, янада юксак босқичга кўтарилиб бораверади.

 

Ахтам ДОЛИЕВ,

Ўзбекистон Республикаси Инновацион

ривожланиш вазирлиги бўлим бошлиғи


Фикр ва мулохазалар

Защита от автоматических сообщений

Сўнгги янгиликлар: