13.08.2019

ТОШКЕНТ ОҚШОМЛАРИ

бугун бошқача чирой, жозиба ва шукуҳга эга

Бугун Ватанимиз мустақиллигининг 28 йиллиги арафасида юртимизнинг қай бир гўшасига борманг, бири-биридан гўзал байрам шодиёналари устидан чиқасиз, одамларнинг шодлигу қувончларига шерик бўласиз. Аммо шу кунларда пойтахтимиз — Тошкентга келмабсиз, шаҳарнинг қоқ марказидаги Сайилгоҳда бўлмабсиз, дунёга келмабсиз. Бу йил Тошкент эрталабдан кечгача турли хил томошаларга, концертларга, кўрик-танловларга бой бўлмоқда. Айниқса, пойтахтимиз оқшомларининг жозибаси, ранг-баранглиги, қувончи, ҳаяжонлари ўзгача бўлмоқда. Пойтахт аҳли ҳеч қачон бундай шукуҳли, ранг-баранг тадбирларни кўрмаганди.

Агар Тошкент курантлари томонидан келсангиз, Матбуотчилар уйи рўпарасидан ўтиб, Зарафшон ресторанига яқинлашишингиз биланоқ байрамона безатилган кўча ва майдонларга кўзингиз тушади. Пойтахт савдо маркази ортига ўтсангиз, эртаклар оламига тушиб қолгандай бўласиз.

Август ойи бошидан Сайлгоҳда тантанали, кўнгилочар тадбирлар ўтказилмоқда. Республика туризм қўмитаси ва Тошкент шаҳар ҳокимлиги ҳамкорлигида «Миллий таомлар» фестивали ҳам ўтказилмоқда. Мустақиллик метросидан чиқишингиз билан қулоғингизга куй-қўшиқлар чалинади, беихтиёр қўшиқ овози келаётган томонга шошасиз. Биз ҳам ижодий гуруҳимиз билан шошилдик ва жараённи кўриб ҳайратда қолдик. Майдонга кириб борар экансиз, ранг-баранг безаклардан кўзингиз қамашади. Музқаймоқ дўконларига дуч келасиз, иштаҳангиз очилади. Атроф-муҳитни кузатар экансиз, турли-туман тадбирларга дуч келасиз. Бир кўчани сайр қилиб, иккинчи кўчага ўтишингиз билан сизни мультфильм ва кино «қаҳрамонлари» кутиб олади, кайфиятингиз янада кўтарилади.

Ўзбекистон Республикаси туризм қўмитаси қошидаги миллий медиа маркази маркетинг ишлари директори Жамшид Бобожонов шундай дейди: — Бу тадбирга икки ой давомида тайёргарлик кўрдик. Сайлгоҳ майдонини кенгайтириш учун учта кўчани ҳам қўшиб олдик. Ҳар куни бу ерга тахминан йигирма минг киши келмокда. Миллий таомлар кўргазмаси, совғалар савдоси, музқаймоқ сайли каби тадбирлар ўтказилмоқда, концерт дастурлари намойиш этилмоқда.

— Биз Ўзбекистон ошпазлар уюшмасиданмиз, — дейди учинчи даражали ошпаз Салоҳиддин Назармуҳаммедов. — Фестивалда 30 нафар асл ошпазларимиз турли миллий таомларимизни тайёрланяпти. Мана, кўриб турганингиздек, ош, лағмон, шўрва, манти каби суюқ ва қуюқ таомларимиз бор. Таомларимизни, айниқса, хорижлик меҳмонлар қизиқиб тановул қилмоқда.

Томоша майдонида янграётган хоразмча куй-қўшиқ ҳамманинг завқини келтирди, миллий кийимлардаги кизларнинг шўх рақсларига томошабинлар ҳам қўшилиб кетишди.

— Шўрва одатда мол ёки қўй гўштидан тайёрланади, — дейди бухоролик ошпаз Ҳусниддин Жўраев. — Биз эса ҳозир мис қозонларда товуқ гўштидан шўрва тайёрлаяпмиз. Ушбу қозонда таом тайёрлаш соғлиқ учун жуда фойдали, инсонга куч бағишлайди.

Сайлгоҳда кўплаб хорижлик меҳмонларни ҳам учратдик.

— Мен оилам билан Ўзбекистонга тез-тез келиб тураман, — дейди Испаниянинг Барселона шаҳридан келган меҳмон Эван Менчанс — Ҳар бир байрамингиз, ҳар бир тадбирингизнинг ўзига яраша шукуҳи бор. Менга, айниқса, пойтахтингиз Тошкент ва албатта қадимий шаҳарларингиз жуда ҳам ёқади.

Бугун «Таомлар» фестивалида намойиш этилаётган миллий таомлар хилма-хиллиги кўзни қувонтиради. Бу каби фестиваллар миллатингиз табиатига хос, деб ўйлайман. Ўзбекистондаги меҳмондўстлик, меҳр-оқибат, аҳилликка ҳавас қилса арзийди.

Ҳа, меҳмон таъкидлаган бу фазилатлар халқимизнинг миллий қадриятлари ҳисобланади. Бугун пойтахтимиздаги Сайилгоҳда ўтказилаётган тадбирлар ҳам урф-одатларимиз, анъаналаримизнинг намойишидир.

Биз асосий саҳна томон юрамиз. Ёш истеъдодлардан тортиб, таниқли санъаткорларгача хизмат қилмоқда. Қўшиқлар янграмоқда, одамлар рақсга тушмоқда, қувонмоқда...

 

Умида НИШОНОВА,

ЎзЖОКУ талабаси.


Фикр ва мулохазалар

Защита от автоматических сообщений

Сўнгги янгиликлар: