Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
11.10.2018

2020 ЙИЛДА БИРЛАМЧИ ТИББИЁТ МУАССАСАЛАРИДАГИ ТОР МУТАХАССИСЛАР ЕТИШМОВЧИЛИГИ ТЎЛИҚ БАРТАРАФ ЭТИЛАДИ

Соғлиқни сақлаш вазирлиги томонидан «Тиббий таълимдаги ислоҳотларсоғлиқни сақлаш тизимини тараққий эттиришнинг муҳим мезонларидан бири» мавзуида матбуот анжумани ўтказилди. Унда вазирлик мутасаддилари, бошқарма бошлиқлари, ихтисослаштирилган ва илмий-амалий тиббиёт марказлари, республика даражасидаги даволаш-профилактика муассасалари раҳбарлари иштирок этди.

Тадбирда тиббиёт соҳасини замонавий фикрлайдиган, чуқур билимли, масъулиятни ҳис этадиган, ҳар жиҳатдан етук кадрлар билан таъминлашга алоҳида эътибор қаратилаётгани ҳамда Президентимизнинг «Ўзбекистон Республикасида тиббий таълим тизимини янада ислоҳ қилиш чора-тадбирлари тўғрисида»ги қарори ушбу йўналишда дастуриламал бўлаётгани таъкидланди.

Бугунги кунда республикамизда тиббиёт соҳаси учун 7 олий тиббий таълим муассасаси ҳамда уларнинг 4 филиалида малакали кадрлар тайёрланиб келинмоқда. 2017 йили Тошкент тиббиёт академиясининг Термиз филиали, жорий йилда эса Фарғона филиали очилиши ҳудудлардаги тиббиёт муассасаларини малакали кадрлар билан таъминлаш имкониятларини кенгайтирди. Шунингдек, бу йил тиббий олий таълим муассасаларини бакалавриат йўналиши бўйича икки минг нафар талаба тугатиб ишга йўлланма олган бўлса, 4 минг 395 нафар йигит-қиз талаба бўлиш бахтига мушарраф бўлди.

Таълим тизимидаги ислоҳотлар жараёнида тиббий таълимнинг мазмуни, кадрлар тайёрлаш муддати ва сифати халқаро таълим стандартларига мос равишда такомиллаштирилмоқда, — дейди Соғлиқни сақлаш вазири Алишер Шодмонов.Хусусан, ўқув режаларидаги ижтимоий-иқтисодий фанлар блоки 23 фоиздан 7 фоизгача қисқартирилиб, клиникага оид фанлар учун соатлар ҳажми 55 фоиздан 85 фоизгача оширилди, халқаро стандартларга мос янги ўқув режалари ишлаб чиқилди. Шунингдек, ҳудудлардаги тиббиёт муассасаларини малакали шифокорлар билан таъминлаш мақсадида давлат грантлари асосида бакалавриат йўналиши бўйича мақсадли қабул квоталари йўлга қўйилди. Ушбу квоталар Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари буюртмаларига мувофиқ, юқори малакали тиббиёт кадрларига эҳтиёж катта бўлган ҳудудлар талабига кўра белгиланмоқда. Ўтган йилда 1180, жорий йилда 1548 квота шакллантирилди ва бу тайёрланаётган тиббий кадрлар 3 йилдан 10 йилгача муддатда тегишли ҳудудларда ишлаши белгилаб қўйилди.

Бу кўрилган чора-тадбирлар натижасида Қорақалпоғистон Республикаси, Хоразм, Бухоро, Навоий, Қашқадарё, Андижон ва Сирдарё вилоятларида умумий амалиёт шифокорига бўлган эҳтиёж тўлиқ қопланди. Бирламчи тиббиёт муассасаларидаги тор мутахассислар етишмовчилиги клиник ординатура, магистратура, қисқа муддатли қайта тайёрлов курслари битирувчилари ҳисобига 2020 йилгача тўлиқ бартараф этилади.

Тиббий таълим тизимида халқаро ҳамкорлик ҳам ривожланмоқда. Кейинги йилларда республикамизнинг тиббиёт йўналишидаги олий ўқув юртлари 20 дан ортиқ хорижий таълим муассасалари билан ҳамкорликни йўлга қўйди. Бунинг натижасида Кореяда 40 нафар ўзбекистонлик талаба таҳсил олмоқда. Жорий ўқув йилида Тошкент давлат стоматология институтида Москва давлат тиббиёт-стоматология университетининг «Стоматология» ва Италиянинг Турин политехника университетининг «Биотиббиёт муҳандислиги» таълим йўналишлари очилди.

Талабалар билан бир қаторда шифокорларнинг малакасини ошириш борасида ҳам тизимли ишлар олиб бориляпти. Шифокорларимизни хориждаги етакчи тиббиёт ва илмий муассасаларга малака ошириш учун юбориш, хорижий мутахассисларни таклиф қилиш тизими йўлга қўйилгани яхши самара бермоқда. Жорий йилда 500 нафардан кўпроқ ёш мутахассиснинг чет элда малака оширгани, 400 нафарга яқин хорижлик мутахассиснинг мамлакатимиз тиббиёт муассасаларида маҳорат дарсларини ўтгани соҳани янада ривожлантиришда муҳим аҳамият касб этди.

Шунингдек, тадбирда тиббий олий таълим муассасаларида малакали кадрлар тайёрлаш баробарида тиббиётнинг долзарб масалалари бўйича илмий изланишлар олиб борилаётганлиги таъкидланди. Кейинги йилларда 226 ихтирога ва фойдали моделларга патентлар, 186 та ЭҲМ дастури учун гувоҳномалар олинганлиги тўғрисида ҳам маълумот берилди.

 

Тоштемир ХУДОЙҚУЛОВ,

«Ўзбекистон овози» мухбири.



DB query error.
Please try later.