05.07.2018

ҲОКИМ ЖУРНАЛИСТГА УЙ СОВҒА ҚИЛДИ

Оммавий ахборот воситалари ходимлари байрами куни бу йил қувончли тадбирларга, тантаналарга бой бўлди. Оҳангарон туманида Тошкент вилояти ижодкорлари учун ташкил этилган тадбирда, Оҳангарон шаҳар ҳокими Одилжон Жўраев «Оҳангарон ҳаёти» газетаси муҳаррири Беҳзод Қобуловга касб байрами муносабати билан шаҳар марказидан ажратилган икки хонали уйнинг калитини топширди.

Бундан бир йилча аввал «Тошкент ҳақиқати» газетасининг масъул котиби вазифасида ишлаб юрган Беҳзод Қобулов номзоди муҳаррирликка тавсия этилган эди. У ўтган қисқа фурсатда «Оҳангарон ҳаёти» газетасига янги руҳ ва мазмун олиб кирди. Кўтарган долзарб мавзулари, ҳудуддаги муаммоларни хаспўшламасдан, таҳлилий-танқидий мақолаларни ёритиб бориши, аввало газетхонлар, қолаверса, ҳудуд раҳбарларини ҳам мамнун этди.

Ҳозир газета ижтимоий муаммоларни кўтариб чиқишда тегишли мутасадди идора ва ташкилотлар ҳамкорлигида ечимини топишда маҳаллий ҳокимликнинг кўмакдошига айланди.

Президентимиз 2017 йилнинг 3 августида мамлакатимиз ижодкор зиёлилари вакиллари билан ўтказган тарихий учрашувда адабиёт ва санъат, маданият соҳалари билан бир қаторда оммавий ахборот воситалари фаолиятини ривожлантириш борасида қимматли фикрларини билдирган эди.

Кўп ўтмай, давлатимиз раҳбари «Ўзбекистон Журналистлари ижодий уюшмаси фаолиятини янада такомиллаштириш чора-тадбирлари тўғрисида»ги Қарорга имзо чекди.

Қарорда, жумладан, оммавий ахборот воситалари фаолиятини кенг қўллаб-қувватлаш, журналистларни моддий ва маънавий рағбатлантириш, эҳтиёжманд ва фаол журналистларни уй-жой ёки ер участкалари билан таъминлашни тизимли йўлга қўйиш ҳақида сўз боради.

Оҳангарон шаҳар ҳокимининг қарори билан уй-жойга эҳтиёжманд журналистга уй берилгани ғоят ибратли ташаббус, деб ўйлаймиз.

 

Нуруллоҳ ДОСТОН,

«Ўзбекистон овози» мухбири.



DB query error.
Please try later.