Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
09.01.2018

БУНДА БУЛБУЛ КИТОБ ЎҚИЙДИ

Ўзбекистон Қаҳрамони, Халқ шоири Абдулла Орипов мактабида истеъдодли ёшлар таълим олмоқда

Мен у кишини кўп йиллардан буён билардим, шеърларини, китоб­ларини катта ҳаяжон билан, таъсирланиб ўқирдим. Бундай самимий ва дилбар шахс, халқимизнинг қалбини, юрагини ўлмас асарлари билан юксак пардаларда тараннум этиб келган ноёб ва бетакрор истеъдод эгаси камдан-кам топилади. Ишончим комил, Қашқадарё аҳли, бутун халқимиз ўзбек адабиёти ва маданияти тарихида ўчмас из қолдирган бу улуғ фарзандини ҳеч қачон унутмайди, унинг хотирасини қалбида сақлайди.

Шавкат МИРЗИЁЕВ

 

2017 йилнинг 24-25 феврали. Президентимиз Қашқадарё вилояти тараққиётига дахлдор ўнлаб истиқболли лойиҳалар ҳақида фикр билдириб, маслаҳатлар берди. Шулардан бири Қарши шаҳрида ардоқли шоиримиз Абдулла Ориповга ёдгорлик ўрнатиш, шоир номидаги мактабни ташкил этиш эди. Бу таклифдан шоирнинг юртдошлари кўкси тоғдек кўтарилди, ҳаяжондан кўзига ёш олганлар ҳам бўлди. Менга ЎзХДП Қарши шаҳар кенгаши раиси, шаҳар Кенгаши депутати Рашид Муртозаев шундай деганди:

— Ишонинг, шунчалик хурсанд бўлдикки, миннатдорлик билдиришга сўз тополмаймиз. Президентимиз халқимизнинг дилидаги гапни айтди. Ҳатто қаерга ёдгорлик ўрнатилишини ҳам белгилаб берди. Буни қашқадарё­ликлар ҳеч вақт унутишмайди...

Жорий йилнинг 24 майида эса Вазирлар Маҳкамасининг «Қарши шаҳрида Абдулла Орипов номидаги она тили ва адабиёти фанини чуқурлаштириб ўқишга ихтисослаштирилган мактаб-интернатини ташкил этиш тўғрисида»ги қарори чиқди.

Мен бугун шаҳар кўчаларини кезаман. Шоир ўтмиш ва замонни якқалам қилган эди. Хаёлимга улуғ адиб Чингиз Айтматовнинг «Абдулла Орипов менга XXI асрга қадам қўйган давримизнинг буюк маданий аҳамиятга молик шоири бўлиб гавдаланади», деган фикрлари келади.

— 2007 йилнинг баҳори эди. ­Абдулла Орипов билан Қаршида учрашдик, — дейди Ёшлар иттифоқи Қашқадарё вилоят кенгаши қошидаги «Истеъдод чорлови» клуби раҳбари, шоир Турди ­Ҳайдар. — У кишига ёш талантлар бошини қовуштириш ҳақида ўйлаб юрганларимни айт­ганимда, ниҳоятда севиниб: «Мен қўллаб-қувватлайман, эзгу иш бу», дегани ҳамон ёдимда. «Ёшлик саро­йи»да шеъриятга ихлосманд ёшларни тўплаб, билганимча ижод сирларини ўргата бошладим. 2008 йилда 10 нафар ёш шоирнинг шеърини тўплаб, «Чақмоқ ёғдуси» номли китобни чиқардик. Ҳозиргача 280 ёш истеъдоднинг шеър­лари жамланган 28 тўплам чиқардик. Клубимиз машғулотларидан мингдан ортиқ ёш баҳра олди. Севинаманки, шогирдларимдан кўплаб истеъдодли ижодкорлар етишиб чиқди. Буёғини эшитинг... 2013 йилнинг ёзида Абдулла Орипов қашқадарёлик 24 нафар ёш шогирдимни ёзувчиларнинг Дўрмон боғида қабул қилиб, 3 кун синадилар. Хўп, нима демоқчиман?.. Устоз адабиётимизнинг келажагига, ёшлар камолига ишонарди, уларни доим қўллаб-қувватларди. Президентимизнинг ташаббуси билан Қарши шаҳрида шундай ибратли мактаб ташкил қилинганидан устоз шоирнинг руҳи шод бўлгани тайин...

Юриб-юриб, шаҳарнинг Табассум маҳалласига етиб келдим. Йўл четида кўркам хиёбон. Шу жойда шоир ҳайкали қад кўтаради. «Баркамол авлод» марказига қарашли муҳташам бинода янги мактаб қарор топибди. Илгари Қарши давлат университетида ишлаган, бир неча илмий китоблар муаллифи, филология фанлари доктори, ниҳоятда ташкилотчи Хуршида ­Норхўжаева директор этиб тайинланибди. У ташкилий ишлар, режалар ҳақида ҳикоя қилади.

— Вазирлар Маҳкамасининг 312-қарори асосида барча ишлар ташкил этилди, — дейди у. — Муаллимлар танлаб олинди. Сентябр ойида синовлардан муваффақиятли ўтган 150 ўқувчи билан машғулотлар бошлаб юборилди. Мактабимизнинг ётоқхонаси бор. Чунки нафақат вилоятнинг узоқ туманлари, балки Бухоро, Сурхондарё вилоятларидан ҳам ўқувчилар қабул қилинган. Машғулотлар қай тарзда ўтилади? Мактабда барча фанлар, шу жумладан, ўзбек тили ва адабиёти чуқур ўргатилади. Кутубхонамизга янги китоблар олаяпмиз.

— Улуғ зотларнинг ҳаёти ҳамиша ўзига хос бўлади, — дейди ўйчанлик билан шоирнинг жияни, мактаб-интернати директорининг ўринбосари ­Нозима Орипова. — Бир куни умр йўлдошлари «Ўнг қовоғим учди, узоқдаги қариндошлар эсга тушди», деган мазмундаги халқ қўшиғини айтиб қолибди. Амаким ўша заҳоти буни шеър­га солибдилар. Бу шеър сўнгги «Эверест ва уммон» тўпламига киритилган. Келин­ойим ушбу мактаб ташкил топганидан беҳад севиниб, музейимизга ноёб буюмлар, жумладан, ­шоирнинг 60 ёшида Биринчи Президентимиз томонидан сов­ға қилинган чопон ҳамда ёзув машинкасини топширди. Бу машинкада мадҳиямиз ёзилган экан...

— Эй, кўп улуғ иш бўлди, — дейди фахрланиб Ўзбекистон Ёзувчилар уюшмаси Қашқадарё бўлими раҳбари, таниқли адиб Ўроз ­Ҳайдар. — Мен мактаб директори билан бир неча бор суҳбатлашдим. Хўш, режа шундайки, яқин кунларда кутубхоналарига 150 дона китоб олиб бориб бераман. Яна таниқли ижодкорларнинг 200 китобини совға қилишни мўлжаллаб турибмиз. Энди таълим масаласи. Республика Ёзувчилар уюшмаси раҳбарияти билан кенгашиб, вақти-вақти билан таниқли адиб, шоир, адабиётшунос олимлар дарс ўтишини ташкил қилиш, мактабни ҳақиқий ижод масканига ­айлантириш лозим, деб ўйлайман.

Мен ҳам шундай ўйлаб тургандим. Аввало, Абдулла Ориповнинг шоирлик маҳорати дарс сифатида ўқитилиши керак. Яна таржима санъати ҳам машғулотлар сирасига киритилса, яхши бўларди.

«Бир-икки нафар иқтидорли ўқувчи билан суҳбатлашсам», деб сўраганимда, директорнинг хонасига бир гуруҳ ёшлар кириб келишди. Чироқчилик Машҳура Абдурайимова тўққизинчи синф ўқувчиси. Унинг тенгдоши, ғузорлик Дилобар Саломованинг «Эъзоз ёғдуси» китоби чоп этилибди. Гулинур Ражабова шоирнинг она қишлоғи ­Некуздан экан. Қарши шаҳридан ­Аббос Амирқулов ҳуқуқшунос бўлмоқчи, адабиётни ҳам чуқур ўрганмоқчи. Миришкор туманидан келган 7-синф ўқувчиси Абдухалил Ҳасанов журналист бўлишни орзу қиларкан. Саккизинчи синф ўқувчиси Жавоҳир Аҳмаджонов Қарши шаҳридан, шеър ёзаркан. Унинг ҳамшаҳри Ибрат Бобожонов ва Ҳусан Исақуловнинг ҳам қалби орзуга тўла. Касби туманидан келган Севинч ­Омонова еттинчи синф ўқувчиси, шеър­лар китоби чиққан, яқинда у «Камалак юлдузлари» фестивалида биринчи ўринни эгаллабди ва Республика босқичига йўлланма олибди. Севинч кўрик дас­турига кирган «Бахт» сарлав­ҳали янги шеърини ўқиб берди.

Ҳаяжонланаман, севинаман. Баногоҳ, хотирамга улуғ шоирнинг илк асарларидан биридаги «Булбул тилини булбул билар, мен билмасман, булбулжон...» мисралари келди. Агар таъбир жоиз бўлса, ижоднинг ўзи булбул тилидадир. Севинч ва унинг тенгдошлари бу тилни суюкли шоиримиз Абдулла Орипов асарлари ва мактабидан ўрганишга чоғланишган. Вақти келади, улар орасидан Абдулла Ориповдек буюк ижодкорлар етишиб чиқади.

 

Юнус УЗОҚОВ,

«Ўзбекистон овози» мухбири.



DB query error.
Please try later.