10.08.2017

МАКТАБ ЯРМАРКАЛАРИ

аҳолининг ижтимоий муҳофазаси йўлида муҳим аҳамиятга эга

Янги ўқув йили бошланиши муносабати билан 10 августдан 10 сентябрга қадар мамлакатимизнинг 1300 дан ортиқ ҳудудларида мактаб ярмаркалари ташкил этилади. Унда 26 турдаги зарурий ўқув қуроллари ва жиҳозлари тақдим этилади. Оммавий ахборот воситалари ходимлари учун Халқ таълими вазирлиги томонидан ташкил этилган медиа-турда шу ҳақда фикр юритилди.

— Фуқароларимиз таклиф ва истакларини эътиборга олган ҳолда янги ўқув йилини янги ўзгаришлар билан бошлаяпмиз, — дейди  Халқ таълими вазири Улуғбек Иноятов. Биринчи навбатда давлат таълим стандартлари такомиллаштирилди. Натижада янги ўқув йилидан бошлаб математика, физика, кимё, биология фанлари янги дастурлар ва методлар асосида ўқитилади.

Албатта, бундай методда ўқитиш учун биринчи навбатда  ўқитувчиларнинг ўзи тайёр бўлиши керак. Бу борада тизимда фаолият кўрсатаётган кимё, физика, биология, математика ўқитувчиларини махсус малака ошириш курсларида қайта тайёрлаяпмиз.

Шунингдек, бизда анъанавий ўқитиб келинаётган меҳнат таълими фани янги ўқув йилидан бошлаб технологиялар деб номланиб, такомиллаштирилган дастурлар асосида олиб борилади. Бундан ташқари, янги ўқув йилида биринчи синф ўқувчилари сони ҳар бир синфда 35 нафардан ошмайди.

Бу йил бешинчи синфда чет тилини Европа таълим стандартлари асосида А 2 даражасида ўқитиш бошланади.

Шу йилдан бошлаб умумтаълим мактабларида ўқувчилар 10-синфларда ўқишни давом эттиришади. Биздаги маълумотларга қараганда, бу йил 350 мингдан ортиқ ўқувчининг 10-синфда ўқиши кутилмоқда. Шу муносабат билан бугунги кунда нашриёт-матбаа уйлари билан биргаликда 10-синфнинг 12 фани бўйича тузилган янги ўқув режа ва дастурлар асосида дарсликлар тайёрланмоқда.

Ўқув режалари ва фан дас­турларини тузаётганимизда жаҳон тажрибасини ўрганиб чиқдик. Биринчи навбатда ўзимизда амалдаги давлат таълим сифатлари, бундан аввал ўқитилган 10-11-синфлар ҳамда ҳозирги кунда ўқитилаётган лицей ва коллежлардаги умумтаълим фанларининг дастурлари, 11 йиллик таълим жорий этилган давлатлар — Россия, Қозоғис­тон ҳамда Буюк Британиянинг ўқув режалари, фан дас­турлари таҳлил қилиниб, янги дастурлар тайёрланди.

Бу йил 650 минг нафар ўғил-қиз биринчи синфда ўқишни бошлайди. Уларни ҳар бирига 12 турдаги ўқув қуроллари ва ўқувчилик портфели тайёрлаб қўйилган. Шунингдек, 1-синфга келаётган ўқувчилар ҳар йили янгидан нашр этиладиган 12 номдаги дарсликлар билан таъминланади. Бугунги кунга келиб Халқ таълими вазирлиги буюртмасига асосан 34 миллион нусхада дарсликлар тайёрланмоқда. 1-синфлар учун 12 миллиондан ортиқ нусхада дарсликларни чоп этиб жойларга етказиб бердик...

Медиа-тур доирасида «Баркамол авлод» республика болалар бадиий ижодиёт марказида мактаб ўқув қуроллари, адабиётлар, болалар кийим-кечаклари ҳамда пойабзаллар кўргазмаси ўтказилди. Унда маҳаллий ишлаб чиқарувчилар, мактаб ярмаркасини ташкил этишга масъул ташкилот ва идоралар мутахассислари ҳамда кенг жамоатчилик вакиллари иштирок этди. 

— Юртимиз тадбиркорлари томонидан  ишлаб чиқарилган арзон, сифатли маҳсулотлар олиб келганмиз, — дейди «Ўзбек­енгилсаноат» акциядорлик жамияти бош мутахассиси Шерзод Акбаров. — Ўтказилган тажрибалар шуни кўрсатадики, кийим таркибидаги синтетика миқдори 30 фоиздан ошиб кетадиган бўлса, у инсон терисининг ҳаво ўтказувчанлигига таъсир қилиб, ўқувчи ўзини ноқулай ҳис қилишига сабаб бўлади. Натижада бу ҳолат уларнинг дарсни яхши ўзлаштира олмаслигига олиб келади. Корхоналаримиз ишлаб чиқараётган мактаб формаларининг хом­ашёси махсус лабораториялардан ўтган, яъни корхонанинг мазкур маҳсулотларни ишлаб чиқариш учун гигиеник сертификати мавжуд.

Медиа-тур давомида журналистлар пойтахтимизнинг Олмазор туманидаги 243-умумтаълим мактабида ташкил этилган ярмарка билан ҳам танишди.

— Бу йил мактабга учинчи фарзандим чиқади, — дейди  ярмарка иштирокчиси Дилором Эгамбердиева. — Мактаб бозори ташкил этилгани биз учун яхши бўлди. Узоққа бориб ўтирмаймиз, дея­рли барча ўқув-қуролларини шу ернинг ўзидан оламиз.

Медиа-тур якунида иштирокчиларга мактаб ярмаркаларида савдоси ташкил этилаётган маҳсулотларнинг Ўзбекистон Республикасидаги амалдаги стандартлар талабларига жавоб бериши ҳамда улар сифатининг назорат қилиниши таъминлангани тўғрисида маълумот берилди.

 

Мафтуна ТОШЕВА



DB query error.
Please try later.