08.08.2017

Ўзбекистонлик зиёратчиларнинг дастлабки гуруҳи ҳаж сафарига жўнаб кетди

Ўзбекистонлик зиёратчиларнинг 459 нафардан иборат дастлабки иккита гуруҳи 7 август куни Тошкент ва Наманган шаҳарларидан Саудия Арабистонига жўнаб кетди. Шу муносабат билан зиёратчиларни тантанали кузатиш маросимлари бўлиб ўтди.

Истиқлол шарофати билан миллий урф-одатларимизни тиклаш, муқаддас динимизни, азиз-авлиёларимизнинг бой меросини чуқур ўрганиш, табаррук қадамжоларини ободонлаштириш борасида кенг кўламли ишлар амалга оширилмоқда. Давлатимиз томонидан юртдошларимизнинг ислом динининг улуғ арконлари, жумладан, ҳаж ва умра амалларини эмин-эркин, қаноат ва шукроналик билан адо этишлари учун барча зарур шароитлар яратилмоқда.

Президентимиз Шавкат Мирзиёев ташаббуси билан жорий йилги ҳаж мавсумида ўзбекистонлик зиёратчилар 7 минг 350 нафар қилиб белгиланди. Шу пайтга қадар ҳар йили 5 минг юртдошимиз ҳаж сафарига ва 6 минги умра зиёратларига борганини инобатга олсак, ўзбекистонликларнинг диний ибодатларни амалга ошириши учун яратилаётган қулайликлар бугунги ривожланиш талабларига ҳамоҳанг такомиллаштириб борилаётганидан далолатдир.

Мамлакатимиз мустақилликка эришгунча, яъни 1943-1991 йилларда бор-йўғи 140 нафарга яқин юртдошимиз муборак ҳаж сафарига бориш бахтига мушарраф бўлган.

2018 йилдан бошлаб йилига 10 минг ватандошимиз умра амалларини бажариш имконига эга бўлади. Давлатимиз раҳбарининг ташаббуси билан жорий йилда 150 нафар Иккинчи жаҳон уруши қатнашчиси ва уларга ҳамроҳлик қилувчи фуқаролар имтиёзли равишда ҳаж зиёратига юборилмоқда.

Ислом Каримов номидаги Тошкент халқаро аэропортида бўлиб ўтган маросимда Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита раиси О.Юсупов, Ўзбекистон мусулмонлари идораси раиси муфтий У.Алимов ва бошқалар мамлакатимизда миллий-диний қадриятларимизни асраб-авайлаш ва ривожлантиришга қаратилаётган алоҳида эътибор, жумладан, ҳаж мавсумида жорий этилаётган қулайликлар юртдошларимизнинг кўнглини кўтариб, мамлакатимиздаги тинчлик-осойишталик ва бағрикенглик муҳитига шукроналик келтиришида муҳим омил бўлаётганини таъкидлади.

Ҳаж мавсумини юқори савияда ташкил этиш учун барча чора-тадбирлар кўрилди. Зиёратчилар учун қулай шарт-шароит яратиш, уларнинг саломатлигини муҳофаза қилиш ва хавфсизлигини таъминлаш мақсадида Ўзбекистон мусулмонлари идораси, Ички ишлар ва Соғлиқни сақлаш вазирликлари, Давлат божхона қўмитаси ва бошқа мутасадди ташкилотлар томонидан тегишли ишлар амалга оширилмоқда. Ҳаж ва умра амалларини ташкил этиш ва ўтказиш масалалари бўйича Жамоатчилик кенгаши томонидан юртдошларимизга хизмат кўрсатиш ишлари мувофиқлаштириб борилаётир.

Ҳаж ибодатларини тўла-тўкис адо этиш, бу борадаги тартиб-қоидалар, шунингдек, сафар талаблари хусусида тушунтириш бериш мақсадида жойларда зиёратчилар гуруҳлари учун сафаролди учрашувлари ташкил этилди.

Зиёратчиларга қулайлик яратиш мақсадида жорий йилнинг 7-23 август кунлари “Ўзбекистон ҳаво йўллари” миллий авиакомпанияси томонидан Тошкент, Бухоро, Самарқанд, Қарши, Наманган ва Урганч шаҳарларидан Мадина шаҳрига тўғридан-тўғри парвозлар йўлга қўйилди.

Ватандошларимиз Мадина шаҳридаги муқаддас қадамжоларни зиёрат қилганидан сўнг Макка шаҳрига йўл олади. Зиёратчилар учун мавсум давомида меҳмонхона, ошхона ва транспорт хизматлари юқори савияда ташкил этилади.

Матназар Элмуродов, ЎзА


DB query error.
Please try later.