07.12.2017

«МЕНИНГ МАҲАЛЛАМДА ЖИНОЯТ СОДИР БЎЛМАСЛИГИ КЕРАК»

Фуқароларнинг ўзини ўзи бошқариш органлари фаолиятини мувофиқлаштириш бўйича Республика кенгаши бошқаруви томонидан «Маҳаллаларда ҳуқуқ­бузарликларнинг барвақт олдини олиш – давр талаби» мавзуида матбуот анжумани ўтказилди.

Бугунги кунда маҳалла институти мамлакатимизда амалга оширилаётган кенг кўламли ислоҳотларда фаол қатнашмоқда. Маҳалланинг нуфузини оширишга нафақат ижтимоий-иқтисодий, балки сиёсий, тарбиявий ва улкан маънавий аҳамиятга эга масала сифатида эътибор қаратилиши натижасида бу тузилма аҳолининг энг яқин таянчи ва суянчига айланмоқда. Бу жараёнда Президентимизнинг жорий йил 3 февралдаги «Маҳалла инс­титутини янада такомиллаштириш чора-тадбирлари тўғрисида»ги фармони муҳим аҳамият касб этмоқда.

— Ҳуқуқбузарликларнинг барвақт олдини олиш билан бирга фуқароларда қонунга ҳурмат ҳиссини кучайтиришда маҳаллаларнинг иштирокини кенгайтириш борасида самарали ишлар амалга оширилмоқда, — дейди Фуқароларнинг ўзини ўзи бошқариш органлари фаолиятини мувофиқлаштириш бўйича Республика кенгаши раисининг ўринбосари Зафар Рўзиев. — Шу йилнинг 15 ноябрь куни ҳуқуқбузарликлар профилактикаси ва жиноятчиликка қарши курашиш борасида белгиланган вазифалар ижроси, бу борада мавжуд муаммолар ва уларни ҳал этиш масалалари бўйича ўтказилган видеоселектор йиғилишида билдирилган фикр-мулоҳазалар, берилган топшириқлар асосида тизимли чора-тадбирлар режаси ишлаб чиқилди. Ҳар бир маҳаллада «Маҳалла посбони» жамоатчилик тузилмаси раҳбари ва аъзоларидан иборат таркибда туну кун навбатчилик ташкил этиляпти. «Жамоатчилик назорат масканлари» фаолиятини самарали йўлга қўйиш ­Хоразм, Қашқадарё ва Самарқанд вилоятлари мисолида ўрганилиб, мазкур тажриба барча маҳаллаларда оммалаштирилмоқда.

Маълумки, видеоселектор йиғилишида жамоатчилик билан яқин ҳамкорлик ва мулоқот ўрнатилгани натижасида 1243 маҳаллада бирорта жиноят содир этилишига йўл қўйилмагани, уйма-уй юриб аҳоли муаммолари ўрганилгани сабабли 22 минг 370 нафар оиланинг нотинчлигига барҳам берилиб, 11 минг 345 нафар ёш оила ажрашиб кетишдан сақлаб қолингани, маҳалла посбонларининг тезкор хабарлари ёрдамида 4 минг 494 жиноят фош этилгани алоҳида таъкидланди. Албатта, бу борадаги ижобий натижаларни яхшилаш олдимизда турган муҳим вазифадир.

Тадбирда ҳар бир маҳаллани жиноятчиликдан холи ҳудудга айлантириш, бефарқлик, лоқайдлик ҳолатларига барҳам бериш тинч ва осойишта ҳаётни таъминлашнинг асосий шартларидан бири экани, ҳар бир фуқаро онгида «Менинг маҳалламда жиноят содир бўлмаслиги керак», деган туйғуни шакллантириш муҳим масала экани таъкидланди.

 

Тоштемир ХУДОЙҚУЛОВ,

«Ўзбекистон овози» мухбири.



DB query error.
Please try later.