28.11.2017

«ЭЛЕКТРОН ПОЛИКЛИНИКА» ҚУЛАЙ ВА СИФАТЛИ

Ушбу янгилик сентябрь ойида шаҳардаги 10-оилавий ­поликлиникада амалиётга татбиқ этилган эди. Қисқа фурсатда яна 12 та поликлиника локал тармоққа уланди. Вилоят ҳокимлиги ва ҳомийларнинг молиявий ёрдамида зарур ахборот коммуникация воситалари билан таъминланди.

— Онлайн тартибида ишловчи автоматлашган ахборот тизимини вилоятдаги бирламчи тиббий санитария ёрдами муассасаларига ҳам жорий қиляпмиз, — дейди «Узмединфо» маркази вакили Нурмуҳаммад Сотволдиев. — Тегишли дастурга мувофиқ очилган тиббий карталарнинг ҳаммаси касалликларнинг халқаро таснифи шаклида Соғлиқни сақлаш вазирлиги корпоратив тармоғидаги электрон базага киритилади. Яъни, бемор нафақат ўзи яшайдиган жойдаги поликлиника, балки республикамизнинг қайси бир шаҳри ёки вилоятида бўлмасин, тиббий хизматга эҳтиёж сезса, ўша ҳудуддаги бирламчи тиббий-санитария ёрдами муассасасига мурожаат қилиши мумкин. Фуқаронинг тиббий картаси мамлакатимиздаги барча оилавий поликлиникалар компьютерларида кўринади.

— Янгиликнинг имкониятлари жуда кенг, — дейди Наманган вилоят соғ­лиқни сақлаш бошқармаси бош мутахассиси Акмалжон Ҳамиджонов. — Энди беморлар оилавий поликлиникаларга келиб, навбат кутиб, қимматли вақтларини беҳуда сарфламайди. Интернет тармоғи орқали қайси шифокорнинг қайси вақтда ишлашини билиб олиб, электрон тарзда рўйхатга ёзилишлари мумкин. Ташхис маълумотлари эса автоматик равишда ҳисоботлар базасида қайд этиб борилади. Фуқаролар мазкур тизим орқали шифокорлар ва ҳамшираларга миннатдорчилик изҳор қилишлари, фаолиятига оид таклиф ва мулоҳазаларини баён этишлари мумкин. Яна бир муҳим жиҳат шундан иборатки, «Электрон поликлиника»га келиб тушган мурожаат ёки шикоятлар таҳлили врачлар ва ўрта тиббиёт ходимлари фаолиятини адолатли баҳолашда муҳим аҳамиятга эга.

«Электрон поликлиника» тизими келгуси босқичда туманлардаги кўп тармоқли марказий поликлиникаларга ўрнатилади. Кейин эса қишлоқ оилавий поликлиникалари қамраб олинади.

 

Носиржон ДЕҲҚОНОВ,

«Ўзбекистон овози» мухбири.



DB query error.
Please try later.