Охирги сонда



Кўп ўқилган мақолалар



Долзарб мавзу



Мақолалар архиви

«    Avgust 2018   
Du Se Cho Pa Ju Sha Ya
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
30.11.2017

ҲУНАРИ БОРГА ИШ ТОПИЛАДИ

Тошкент шаҳар бандлик бош бош­қармасига қарашли Ишсизларни касб-ҳунарга тайёрлаш, қайта тайёрлаш ва малакасини ошириш ўқув маркази фуқароларни талаб юқори бўлган йўналишлар бўйича ўқитиб, уларнинг ҳаётда ўз ўрнини топишига ёрдам бераётган муассасалардан бири. Бу йил ташкил этилганига йигирма беш йил бўлган марказ шу пайтга қадар олтмиш беш мингдан зиёд фуқарони ўттиздан ортиқ йўналишларда касб­га тайёрлади, малака оширишига ёрдам берди.

— Ҳозирги кунда компьютер оператори, электрпайвандчи, тикувчи, сартарош, иш юритувчи каби йўналишлар бўйича кадр­лар тайёрлаяпмиз, — дейди марказ директори Абдуҳамид Мустагизов. — Бизда ўз соҳасини яхши биладиган ўқитувчилар дарс беради. Жорий йилнинг шу даврига қадар ўқув марказимизда мингга яқин фуқаро қайта тайёрланди. Айни кунларда таълим олаётганлар 200 нафарга яқин.

Бугун ишлашни, ҳаётда муносиб ўрин топишни истаган одам мақсадига эришади. Марказ инсонларга ёрдам беришни ўз олдига асосий вазифа қилиб қўйган. Ўқиш давомида бандликка кўмаклашиш марказлари томонидан стипендия тайинланади ва таълим даври ҳам меҳнат стажига қўшилади. Стипендиянинг энг кам миқдори энг кам ойлик иш ҳақининг бир бараварини ташкил этади.

Марказда фуқаролар истаган таълим йўналиши бўлмаса, бунинг ҳам чораси бор. Айтайлик, уяли телефон аппарати таъмирлаш бўйича таълим олишни хоҳловчилар кўп бўлса, шу йўналиш бўйича курс ташкил этилади. Ёки фуқаро йўлланма билан касб-ҳунар коллежи ёки нодавлат ўқув марказларидан бирига юборилади ва марказ билан ҳамкорликда таълим олади.

— Марказимиз таълим муассасаларидан анча фарқ қилади, — дейди ўқув ишлари бўйича директор ўринбосари ­Малика Сарварова. — Бу ерда асосан оилали, фарзандли ота-оналар ўқийди. Ҳар бирининг ўзига яраша дарди, ташвиши бор. Уларнинг кўнглига йўл топиб, мустаҳкам билим бериш ўқитувчилардан катта масъулият талаб этади. Ҳафтасига беш кун, етти соатгача таҳсил олиш, амалий дарсларда иштирок этиш учун ўқувчиларимизнинг ўзларида ҳам иштиёқ бўлиши керак, албатта.

Ҳам рўзғор, ҳам фарзанд тарбияси билан шуғулланаётган одам учун ўқишнинг ўзига яраша машаққатлари бор. Бироқ хоҳиш ҳар қандай тўсиқни енгиб ўтади.

Моҳинур Юсупова 2009 йилда Тошкент давлат иқтисодиёт университети қошидаги академик лицейни кичик ЭҲМ оператори йўналиши бўйича битирган. Ҳозир унинг мутахассислиги бўйича ишчи кучига талаб бўлмагани учун Яккасарой туман бандликка кўмаклашиш маркази йўлланмаси билан ўқув марказида тикувчилик йўналишида таълим оляпти.

Бугун кимлардир ҳаётини янгидан бошлаб, касб-ҳунар ўрганаётган пайтда ҳам айримлар ҳамон иш тополмай овора. Кимнинг­дир тугаллаган йўналиши замон талабига жавоб бермай қолган. Кимдир ўз мутахассислиги бўйича етарлича кўникмага эга эмаслиги, яна кимдир соҳасига тўғри келадиган бўш иш ўрни йўқлиги сабаб ишсиз. Мана шундай фуқаролар қайта касбга тайёрланса, ишга жойлаштирилса, юртимиз равнақи йўлида меҳнат қилишларига шубҳа йўқ.

Бироқ ўз мутахассислиги бўйича иш тополмаётган фуқароларнинг ҳаммаси ҳам янги йўналиш бўйича ўқиш имкони борлиги ҳақида маълумотга эга эмас. Шу боис фуқароларга, айниқса, қишлоқларда яшовчи аҳолига шундай марказлар фаолияти ҳақида атрофлича маълумот бериб, уларнинг жамиятда муносиб ўрин топишига кўмаклашиш зарур, деб ўйлайман.

 

Зилола ҒАЙБУЛЛАЕВА,

ЎзДЖТУ халқаро журналистика факультети талабаси.



DB query error.
Please try later.