13.05.2017

ҚИШЛОҚ ХЎЖАЛИГИ СОҲАСИГА

янги техникалар жорий этилмоқда

«Ўзагротехсаноатхолдинг» акциядорлик жамияти томонидан ўтказилган матбуот анжуманида республикамизда қишлоқ хўжалиги техникалари ишлаб чиқаришнинг ўзаро боғлиқ ягона тизимини ташкил этиш, сервис корхоналари ва машина-трактор паркларини модернизация қилиш, соҳага хорижий инвестицияларни фаол жалб этиш борасида амалга оширилаётган ишлар хусусида маълумот берилди.

— Президентимизнинг 2016 йил 17 ноябрдаги «Ўзагротехсаноатхолдинг» акциядорлик жамияти фаолиятини ташкил этиш чора-тадбирлари тўғрисидаги қарори фаолиятимизда дастуриламал бўлиб хизмат қилмоқда, — дейди «Ўзагротехсаноатхолдинг» акциядорлик жамияти бошқаруви раиси Нодир Отажонов. — 2017 йилнинг биринчи чорагида тизим корхоналари томонидан ўсиш суръатлари ўтган йилнинг шу даврига нисбатан 183,2 фоизга етди. Хусусан, «Ўзагротехмаш» акциядорлик жамияти корхоналарида 107 трактор, 98 тиркама, 128 омоч, 613 чигит экиш сеялка, 350 культиватор ва 500 дан ортиқ бошқа техникалар ишлаб чиқарилди. «Ўзагролизинг» акциядорлик жамияти эса фермер хўжаликларига 2 минг 380 дона техника ва агрегатни лизинг асосида етказиб берди. «Ўзагросервис» акциядорлик жамияти томонидан 7,8 миллиард сўмлик маҳсулот ишлаб чиқарилди ҳамда 10,1 миллиард сўмлик механизация хизматлари кўрсатилди.

Айни кунларда «Ўзагротехсаноатхолдинг» акциядорлик жамияти Беларусь, Жанубий Корея, Франция ва бошқа давлатлар тадбиркорлари билан ҳамкорликда қўшма корхоналар ташкил этиб, 30 дан ортиқ турдаги янги техника воситаларини ишлаб чиқаришни йўлга қўйишни мўлжалламоқда. Хусусан, ем-хашак ўриш, тойлаш, озуқани жойида майдалаб, тарқатиш, дуккакли ва сабзавот экинларини экиш, йиғиш техникалари ўзимизда тайёрланади.

Тадбирда журналистларни қизиқтирган саволларга жавоб берилди.

 

Тоштемир ХУДОЙҚУЛОВ,

«Ўзбекистон овози» мухбири.



DB query error.
Please try later.