10.05.2017

ТАҲЛИЛИЙ ВА ТАНҚИДИЙ ЁНДАШУВ АДОЛАТЛИ ЖАМИЯТ ҚУРИШДА ҲАЛ ҚИЛУВЧИ ОМИЛДИР

Пойтахтимизда Ўзбекистон Электрон оммавий ахборот воситалари миллий ассоциацияси ва халқаро ташкилотлар ҳамкорлигида «Ижтимоий аҳамиятга молик масалаларни ёритишда таҳлилий ва танқидий ёндашувлар — очиқ, адолатли ва инклюзив жамият қуришда ҳал этувчи омил» мавзуида медиа-тадбир ўтказилди. Унда Олий Мажлис Сенати аъзолари, Қонунчилик палатаси депутатлари, вазирлик ва идоралар, жамоат тузилмалари, халқаро ташкилотларнинг мамлакатимиздаги ваколатхоналари, дипломатик корпус вакиллари, ОАВ ходимлари, профессор-ўқитувчилар, талаба-ёшлар иштирок этди.

Олий Мажлис Сенати раиси ўринбосари Светлана Ортиқова бугун одамларни ўйлантираётган, жамият равнақига тўсиқ бўлаётган масалаларнинг илдизига чуқур кириб бориш, халқимиз билан самимий, яқин, янада ошкора мулоқот ўрнатиш оммавий ахборот воситалари ходимларидан катта масъулият, ижодий изланиш, танқидий-таҳлилий ёндашувни талаб этишини таъкидлади.

— 2017-2021 йилларда Ўзбекистон Республикасини янада ривожлантиришнинг бешта устувор йўналиши бўйича Ҳаракатлар стратегияси мамлакатимиз медиатузилмалари фаолиятини такомиллаштиришда ҳамда самарадорлигини оширишда муҳим дастурил­амал бўлмоқда, — дейди Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди маблағларини бош­қариш бўйича Парламент комиссияси раиси Акмал Саидов. — Бугунги кунда мамлакатимизда мавжуд босма нашрларнинг 53 фоизини, телерадиоканалларнинг 85 фоизини нодавлат оммавий ахборот воситалари ташкил этади. 330 дан зиёд веб-сайтлар оммавий ахборот воситалари сифатида рўйхатдан ўтказилиб, уларнинг аксарияти нодавлат сектор улушига тўғри келмоқда. Медиа тузилмалар ҳозирда Ўзбекистонда истиқомат қилаётган миллат ва элатларнинг 7 тилида фаолият олиб бормоқда. Шунинг­дек, ахборотлар ва телерадиомаҳсулотлар қатор хорижий тилларда ҳам тарқатилмоқда. Бундан ташқари, янги телерадиоканалларнинг ташкил этилаётгани аҳолига ранг-баранг, янада мазмунли, ўзига хос кўрсатувлар тақдим этиш имконини бермоқда. Республикамиздаги оммавий ахборот воситаларининг эркин фаолият кўрсатиши учун самарали қонунчилик базаси шакл­ланти­рил­моқда.

Тадбир сўнгида Халқ билан мулоқот ва инсон манфаатлари йилида амалга оширилаётган ишларни фаол ёритаётган телевидение ҳамда радио журналистларига сертификатлар топширилди.

 

Тоштемир ХУДОЙҚУЛОВ,

«Ўзбекистон овози» мухбири.



DB query error.
Please try later.