18.04.2017

УЙИНГИЗДА ЧИРОҚ ЎЧМАЙДИ

«Ўзбекэнерго» акциядорлик жамияти томонидан «2016 йилда амалга оширилган инвестиция лойиҳалари ва паст кучланишли электр тармоқларини модернизация ва реконструкция қилиш дастури бўйича амалга оширилаётган ишлар» мавзуида матбуот анжумани ўтказилди.

— Бугунги кунда иқтисодиёт тармоқларининг жадал ривожланиши ҳамда аҳоли ҳаётининг фаровонлашиб бориши натижасида энергетика ресурсларига бўлган талаб кундан-кунга ошиб бормоқда, — дейди «Ўзбекэнерго» акциядорлик жамияти бошқаруви раиси ўринбосари Рўзиқул Райимов. — Шу боисдан ҳам жамиятимиз мутахассислари томонидан асосий эътибор ишлаб чиқариш кучларининг имкониятларини янада ошириш, кўп энергия сарфлайдиган, маънан ва жисмонан эскирган ускуналарни технологик жиҳатдан замонавий, тежамкор электр ускуналарига алмаштиришга қаратилган.

Маълумки, Вазирлар Маҳкамасининг қатор қарорларига мувофиқ 2021 йилга қадар 52 инвестиция лойиҳаси амалга оширилиши кўзда тутилган. Ушбу лойиҳалар иж­росини таъминлаш мақсадида жамият томонидан доимий равишда тегишли чоралар кўрилиб, юқори технологияли ускуналарни ўрнатиш ва соҳага илғор хорижий тажрибаларни татбиқ этиш ҳамда қўшимча хорижий инвестицияларни жалб этиш борасида халқаро молия инс­титутлари, хорижий компаниялар билан ҳамкорлик ишлари олиб борилмоқда.

Дарҳақиқат, Президентимиз Шавкат Мирзиёевнинг 2016 йил 23 декабрдаги «Ўзбекистон Республикасининг 2017 йилги Инвестиция дастури тўғрисида»ги қарорига мувофиқ 2017 йилда 29 йирик инвестиция лойиҳаси амалга оширилиши мўлжалланган бўлиб, шу вақтгача 2 лойиҳа бўйича ишлар тўлиқ якунланиб, фойдаланишга топширилди. Хусусан, Қандим газни қайта ишлаш заводини ташқи электр энергияси билан таъминлаш мақсадида 90 километр масофадаги 220 кВ ли ҳаво линияси қурилади. Шунингдек, «Электр энергия истеъмолини ҳисобга олиш ва назорат қилишнинг автоматлашган тизими жорий қилиниб, Бухоро, Жиззах ва Самарқанд вилоятларида 0,4 кВ истеъмолчиларни ҳисобга олиш тизими» дастури бўйича 1 миллондан ортиқ ҳисоблаш нуқтаси ишга туширилиш арафасида.

Айни пайтда республика электр тармоқларининг фаолияти даражаси ва сифатини янада ошириш, минтақалар ижтимоий-иқтисодий ривожланиши учун қулай шароитлар яратиш ва аҳолининг яшаш шароитларини янада яхшилаш мақсадида паст кучланишли электр тармоқларининг ҳозирги ҳолати таҳлил этилиб, 2017-2021 йилларда паст кучланишли электр тармоқларини модернизация ва реконструкция қилиш ҳисобига шаҳар ва қишлоқлар аҳолисининг электр энер­гиясидан фойдаланиш имкониятини кенгайтириш бўйича чора-тадбирлар дастури қабул қилинган.

2017-2021 йилларда 34 минг километрдан ортиқ 0,4-6-10 кВ электр тармоқлари ҳамда 6 минг 930 дан ортиқ трансформатор ­пунктларини модернизация ва реконс­трукция қилиш режалаштирилган. Бунинг учун қарийб 836 миллион АҚШ доллари миқдорида маблағ сарфланиши кўзда тутилган. Шунингдек, мамлакатимиздаги 2 минг 272 маҳаллада 2 миллион 479 минг истеъмолчининг электр энергия таъминоти янада яхшиланади, технологик йўқотишларни 669,61 миллион кВт соатга, йиллик эксплуатация харажатларини 2015 йилга нисбатан 15,3 фоизга қисқартиришга эришилади.

Тадбир сўнгида журна­листларни қизиқтирган саволларга мутахассислар жавоб қайтарди.

 

Тоштемир ХУДОЙҚУЛОВ,

«Ўзбекистон овози» мухбири. 



DB query error.
Please try later.