22.07.2020

ХАВФСИЗЛИК ЙЎЛИДА ҲАМКОРЛИК: 15 ИЮЛЬ ВА ФЕТО ГА ҚАРШИ КУРАШ

Туркия ва Ўзбекистон ўртасидаги муштарак тарих, тил, маданият ва тамаддунга асосланган кўп тармоқли яқин ҳамкорлик алоқалари иқтисодиётдан сиёсатга, маданиятдан таълимгача бўлган соҳаларни қамраб олган ҳолда тобора мустаҳкамланиб бормоқда. Энг муҳим масалалардан бири шубҳасиз хавфсизлик ва терроризмга қарши кураш бўйича ҳамкорликдир.

Терроризм тобора глобал тус олган бугунги даврда жаҳонда ҳеч бир мамлакат ёки жамият террор балосидан кафолатланмаган. Туркия ва Ўзбекистон давлатлари ҳам афсуски, терроризмнинг турли кўринишлари билан йиллар давомида курашиб келмоқдамиз.  Бироқ, глобал терроризмга қарши курашишда якка ҳолда ёки айрим давлатларнинг биргаликдаги ҳаракати етарли бўлмаслигини кўриб турибмиз.

Терроризмга қарши баҳамжиҳатликда курашиш аҳамиятининг ёрқин мисоллардан бири, шубҳасиз, 2016 йилда Туркияда халқ иродасига қарши хоинларча давлат тўнтаришини амалга оширишга уринган, бош террорчи Фетуллаҳ Гулен раҳбарлик қилган Фетуллаҳ Гулен Террористик Ташкилоти (ФЕТО)га қарши олиб борган қатъий курашимизнинг қардошларимиз томонидан қўллаб-қувватланганидир.

ФЕТО томонидан режалаштирилган, бу ташкилотнинг армиямиз ичига суқилиб кирган аъзолари қўли билан қуролли кучларимиздаги марказий бошқарув занжири узиб қўйилиши орқали 15 июль кунги давлат тўнтаришига уриниш оқибатида 251 нафар фуқаромиз шаҳид бўлди ва икки минг нафардан ортиқ фуқаромиз жароҳатланди.

Бу воқеа бўлиб ўтганига тўрт йил бўлди. Бу вақт ичида қатъият билан олиб борган курашимиз натижасида мамлакат ичкарисида тобора кучсизланган ФЕТО стратегиясини ўзгартириб, янгича йўл тутиб, ўз фаолиятини хориж мамлакатларидаги тузилмаларида ривожлантира бошлади. Шу сабабли Туркия ҳудудидан ташқаридаги ФЕТО тузилмаларига қарши кураш ҳозирги кунда янада долзарб бўлиб турибди. Бу ташкилот ўзига қулай сиёсий ва иқтисодий таъсир доиралари  яратишни мақсад қилиб, бу йўлда ўзлари жойлашиб олган мамлакатларнинг қонунларини бузишдан ҳам тап тортмаётгандек, асл мақсади террорчилик фаолиятига йўл очиш учун худди жиноят ва разведка ташкилотидек ими-жимида иш олиб бормоқда.

ФЕТО ўзининг ғаразли амалларини яшириш учун таълим соҳасида ёрдам ва ҳайрия ишлари олиб борадиган жамоатчилик ҳаракати қилиб кўрсатишмоқда. Бу бир ниқоб эканлиги, аслида яширин ва маккор бир тузилма эканлиги халқаро миқёсда ҳар куни ўз исботини топмоқда.

Учинчи мамлакатларда ФЕТОга қарши пайдо бўлган огоҳлик, ФЕТО тўдалари фаолиятларини яқиндан кузатиб борилиши ва текширилиши кераклигини тақозо қилмоқда. Турли давлатларда ФЕТОчи тўдалар олиб бораётган ноқонуний ишлар фош этилмоқда. Бутун дунёга ёйилган ФЕТОга қарши курашда бир қанча давлатлар аниқ қадамлар қўймоқда, бу борадаги халқаро бирдамлик ортиб бормоқда.

Бундай саъй-ҳаракатлар билан тўда аъзоларининг чет эллардаги фаолиятлари устидан босим ортмоқда, тузилманинг хорижда ҳаракатланиши қийинлашмоқда ва унинг ўйин майдонлари кескин суръатда торайиб бормоқда.

ФЕТО тузилмаларига қарши олиб бораётган ишларимиз қатъиятлилик билан давом эттирилади. Бу курашда давлатимиз, аввало, дўст ва қардош давлатлар ва иттифоқчиларнинг самимий ёрдамлари ва ҳамкорлигини кутиб қолади.

Бу ташкилот фақатгина Туркияга таҳлика солибгина қолмай, бутун дунё мамлакатлари учун жиддий хавф туғдирмоқда. Дўст ва қардош Ўзбекистон ҳам мустақилликка эришганидан бугунги кунгача бу тузилманинг нишонида турганини биламиз, афсуслар бўлсинки, бунинг оқибатларини ҳам кузатиб келмоқдамиз.

Ўзбекистон бугунги кунга қадар ФЕТОга қарши муваффақият билан курашиб келди. Қардош Ўзбекистон бу ёвуз мақсадли тузилманинг ҳақиқий башарасини неча ўн йиллар аввал кўра олгани, уларга қарши кўрган чора-тадбирлари билан тамаддунимиз бешиги бўлган бу қадимий  заминдаги асрларга таянган огоҳлик ва зийракликни яна бир марта намойиш этган эди. Бироқ ҳозирги кунда ҳар доимгидан ҳам ҳушёрроқ бўлишимиз лозим. Баъзи разведка ташкилотлари қўлида ўйинчоқ бўлаётган ФЕТО Ўзбекистон илғор тараққиёт йўлини тутганлигидан фойдаланиб, мамлакатнинг ичига суқилиб киришга уринишини, ривожланиш жараёнига соя солиш мақсадида эканлигини биз биламиз.

Қардош Ўзбекистоннинг бу борада ҳар доимгидан ҳам ҳушёр бўлишига шубҳамиз йўқ. ФЕТОга қарши курашимизни муваффақиятли давом эттирар эканмиз, мамлакатларимиз ўртасида бу соҳадаги ҳамкорлик ва ҳамжиҳатлик ҳам ортиб бормоқда. Бу тузилманинг Ўзбекистонга сизиб киришининг олдини олиш унга қарши курашнинг муҳим бир томонидир.

Турк халқининг бошига тушган, халққа тегишли қуроллар халққа қарши ваҳшийларча қўлланилган, демократия рамзи бўлган Туркия Парламенти биноси бомбардимон қилинган ўша 15 июлдаги фожиали воқеалар ҳеч бир давлат бошига  тушишини истамаймиз. Биз бу аччиқ тажриба билан янада эҳтиёткор ва янада кучли бўлишни ўргандик, террорчи тузилмага қарши курашда ҳамкорлик ва бирдамликнинг қанчалик муҳим эканлигини кўрдик.

15 июль — давлат тўнтаришига бўлган уринишга тўрт йил тўлган бу кунда, халқ иродасига қарши турган, манқуртлаштган олчоқларга қарши кўксини қаҳрамонларча қалқон этган 251 нафар шаҳидимизни мана шу Ота юртимиз тупроғида чуқур миннатдорлик ва чексиз эҳтиром билан ёд этамиз. Туркия ва Ўзбекистон ўртасидаги мустаҳкам қардошлик ришталарига путур етказишни мақсад қилган бу хоинлар тўдасига қарши давлатларимиз яқин ҳамкорликда ҳаракат қилаётганидан ғурурланишимизни билдиришни истайман.

Оллоҳ бу икки қардош мамлакатни ва икки биродар халқни оғир синовлардан асрасин, халқларимиз омонлик ва баҳамжиҳатликда дунё тургунча турсин.

Меҳмет Сурайё Эр,

Туркия Республикасининг мамлакатимиздаги

Фавқулодда ва мухтор элчиси.


Фикр ва мулохазалар

Защита от автоматических сообщений

Сўнгги янгиликлар: