11.02.2020

ДУБАЙ ОРЗУСИ САРОБГА АЙЛАНДИ

Кўр-кўрона ҳавойи ҳавасга берилиб, сабр ва қаноатни унутиб, осонгина бойлик орттириш илинжида одамлар бугунги кунда турли найрангларнинг, қолаверса, одам савдоси, деб аталган жирканч иллатнинг қурбонига айланмоқда.

Садоқат Назарова ҳам ўзининг ор-номусини, қадр-қимматини оёқ­ости қилмасдан, қиз бола номига иснод келтирувчи одатлардан йироқлашганида, балки кимнингдир суюкли ёри, бўлармиди? Таассуфки, у ўзининг ёш умрини кўча-куйда ўтказиб, отасининг бошини эгди, қаддини букди.

Уйидан ҳайдалган  қиз ўзига ўхшаган таниш-билишлари билан гулдек ёшлигини кўнгилочар масканларда ўтказиб, айш-ишратга муккасидан кетди.   

Шу тарзда, мақсадсиз дайдиб юрган кунларининг бирида Тошкент шаҳрида истиқомат қилувчи Зулайҳо Бўронова (исм-фамилиялари ўзгартирилган) унинг бошини силаб, ўз уйидан жой беради. Зулайҳо Бўронова кўнгил хушлашни ихтиёр этган йигитчаларнинг “илтимоси”ни ерда қолдирмай, уларга ўзининг таниш қизларини тортиқ қилавериб, ҳожатбарорлиги билан «Зули» номи билан танилган. Садоқат Назарованинг кўнгилхушликка мойиллигини илғаган аёл қисқа вақт ичида у билан опа-сингил тутиниб, ўзининг доимий мижозлари билан таништиради, «янги ойимча»ни беномуслик бозорида пуллай бошлайди.

...Дубай. Дунёнинг энг азим ва гўзал шаҳарларидан бири. Ўзининг баҳаво ва шинам жойлари, осмон­ўпар иморатлари билан жаҳон аҳлини лол қолдирган жаннатмонанд шаҳар. Лекин ҳозир-да бу шаҳар номини эшитган аксарият кишилар у ерни мутлақо бошқача талқин қилиши сир эмас. Сабаби шундаки,  ўша ерда ҳам номи қурғур пул ва бойлик дея ҳар қандай разилликка қўл ураётган, қиз ва жувонларни алдаб, уларни фаҳш йўлига бошлаётган, озода шаҳар номини турли тубан қилмишлари билан булғаётган «даллол»лар учраб турибди.

Ойниса Ҳакимова бир неча йиллардан буён Бирлашган Араб Амирликларининг Дубай шаҳрига бориб келиб, анчагина таниш-билиш орттирган аёллардан. Чунончи, у бир неча йиллар муқаддам БАА давлатидан бадарға қилинган бўлса-да, Ўзбекистон Республикаси қонунчилигига асосан чет элга чиқиш ёки Ўзбекистон Республикасига кириш учун белгиланган тартибни қўпол равишда бузди. «Дунёнинг барча мамлакатларига чиқиш учун рухсат» берувчи ҳужжатни расмийлаштирмасдан Ўзбекистон Республикасидан Қирғизистон Республикасига ўтиб, Манас шаҳридан ҳаво йўллари орқали Уммон Султонлигига ноқонуний равишда чиқиб, у ердан Туркиянинг Истамбул шаҳрига, ундан сўнг Бирлашган Араб Амирликларининг Дубай шаҳрига ноқонуний йўллар орқали чиқади. 3 маротаба судланган бу аёл қилмишларидан тегишли хулоса чиқармади.

У пул деса ўзини турли балоларга гирифтор қилишга тайёр бўлган Садоқат Назаровани ўзи яшаётган Дубай шаҳрига чақиртириб, у ерда турли шахслар билан ўзаро жинсий яқинликда бўлиш эвазига катта миқдорда пул ишлаб топиши мумкинлигига шама қилади.

Ойниса Ҳакимова ўзининг жиноий шериги Шамсия Қурбонова билан бирга Зулайҳо Бўронованинг телефон аппаратига ўрнатилган ижтимоий тармоқлар орқали қисқа вақт ичида Садоқат Назаровани ­авраб олади. Садоқат ҳеч иккиланишсиз уларнинг бу таклифига розилик билдиради.

Зулайҳо Бўронова Садоқат учун Дубайдан жўнатилган пуллар эвазига унинг чет элга чиқиши учун ҳужжатларни расмийлаштирилишига кўмаклашади. Бундан ташқари, Садоқат Назарованинг номига «Тошкент-Дубай» авиачиптасини сотиб олади.

Аммо, сергак ва ҳушёр ҳолда хизмат олиб бораётган ички ишлар органлари ходимлари томонидан олиб борилган тезкор тадбирлар давомида фуқаро Зулайҳо Бўронова жабрланувчи Садоқат Назаровани Бирлашган Араб Амирликларининг Дубай шаҳрига жўнатиш учун Тошкент халқаро аэропортига ҳаракатланиб кетаётган вақтида қўлга олинади.

Ходимларимизнинг олиб борган навбатдаги тадбирлари давомида одам савдоси билан боғлиқ бўлган жиноятнинг, қолаверса, фуқаро ­Садоқат Назарованинг одам савдоси қурбонига айланиб қолишининг олди олинди.

Албатта содир этилган ҳар қандай ҳуқуқбузарлик учун жавобгарлик, жиноят учун эса жазо муқаррар.

 

Бахтиёр РАҲМАТОВ,

майор, Пробация хизмати матбуот котиби.


Фикр ва мулохазалар

Защита от автоматических сообщений

Сўнгги янгиликлар: