14.04.2018

ЮРИДИК ТАЪЛИМНИ РИВОЖЛАНТИРИШ — ДОЛЗАРБ МАСАЛА

Тошкент давлат юридик университети томонидан «Мамлакатимизда ҳар томонлама билимли, юқори малакали, халқаро стандартларга жавоб берадиган ҳуқуқшунос кадрларни тайёрлаш ишларини такомиллаштириш борасида белгиланган чора-тадбирлар» мавзусида матбуот анжумани ўтказилди.

Тадбирда Ҳаракатлар стра­тегия­сида белгиланган вазифаларга мувофиқ, юридик кадрлар тайёрлаш тизимини янада такомиллаштириш, замонавий усулларни жорий қилиш ишлари тўғрисида маълумот берилди.

Кўчма юридик клиника фаолияти йўлга қўйилди, — дейди университетнинг ўқув ишлари бўйича проректори Мансурхон Камолов. — Унинг фаолиятини кенгайтириш учун БМТ тараққиёт дастури билан биргаликда иш олиб бориляпти. Университет талабалари ва ўқитувчилари Адвокатлар палатаси вакиллари билан бирга Тошкент вилоятига ҳар шанба ва якшанба кунлари бориб, аҳолига юридик ёрдам кўрсатиб келмоқда.

Олий суд, Бош прокуратура, Адлия вазирлиги, Ички ишлар вазирлиги ҳамда Ўзбекистон судьялар ассоциацияси томонидан кўрсатилаётган амалий кўмак туфайли битирувчи талабалар амалий тажриба орттирмоқда.

АҚШ, Германия, Буюк Британия, Франция, Голландия, Япония, Хитой, Латвиянинг олий таълим муассасалари профессор-ўқитувчилари, хорижий юридик ва консальтинг компанияларнинг юқори малакали мутахассислари томонидан маърузалар, семинар-тренинглар ва мастер-класслар ўтказиб келинмоқда.

Университетда ўқитувчилар, ёш тадқиқотчилар учун глобал ахборот ҳуқуқий ва таълим ресурсларидан фойдаланиш имкониятлари яратилган. Чет эл университетлари билан талабалар алмашинувини амалга ошириш тизими йўлга қўйилган. Хорижлик фуқаролар учун таълим олиш имкониятини кенгайтириш масаласи ҳам назарда тутилган.

Тадбирда журналистларни қизиқтирган саволларга жавоб берилди.



Ноила МАРУПОВА



DB query error.
Please try later.