06.04.2017

ОСОЙИШТАЛИК ОСМОНДАН ТУШМАЙДИ

бунинг учун ҳаммадан огоҳлик талаб этилади

Жиззах вилоят ички ишлар бошқармаси раҳбарлари ҳудудларга бориб, ҳафта давомида амалга оширилган ишлар ва йўл қўйилган камчиликларни танқидий таҳлил қилиб, ҳар бир ходимга аниқ топшириқ бермоқда. Ўрганилиши лозим бўлган ҳудуд ҳақида жамланган маълумот ва хабарлар асосида ҳуқуқни муҳофаза қилувчи идоралар ҳамда жамоатчилик вакиллари билан ҳамкорликда кенг қамровли чоралар белгиланяпти.

Хусусан, умумтаълим мактабларида, академик лицей ва касб-ҳунар коллежларида ўқувчиларнинг дарс машғулотларига қатнашиши текширилди. Дарсга сабабсиз қатнашмаётган 374 нафар ўқувчининг ота-онасига нисбатан фарзандининг таълим-тар­бия­си билан шуғулланмаётганлиги учун Ўзбекистон Республикаси Маъмурий жавобгарлик тўғрисидаги кодекснинг 47-моддаси талаблари асосида ҳужжатлар расмийлаштирилди. Ушбу шахсларнинг ҳаракатлари Жиззах шаҳар, Бахмал, ­Ш.Рашидов, Зарбдор, Зомин ва Ғаллаорол туманларида жойлашган коллежларнинг ўзида кенг жамоатчилик иштирокида «сайёр суд» орқали муҳокама этилиб, чора кўрилди.

Айни пайтда 35014 хонадон ўрганиб чиқилди. Ўрганишлар давомида биринчи маротаба Ўзбекистон Республикасининг фуқаролик паспортларини ўз вақтида олиш, амал қилиш муддатини ўтказиб юбормасдан янги фуқаролик паспортларига алмаштириш юзасидан тушунтириш ишлари олиб борилди. 420 нафар фуқаро паспорт-виза тартиб-қоидаларига, 130 нафар фуқаро эса доимий ва вақтинчалик яшаш тартибига риоя қилмаганлиги аниқланиб, тегишли тартибда ҳужжатлар расмийлаштирилди.

Шубҳа уй­ғотган шахслар жойлардаги таянч пунктларига олиб келиниб, тегишли профилактик суҳбатлар ўтказилди. Уларнинг баъзиларига нисбатан маъмурий баённомалар расмийлаштирилди.

Шунингдек, чет элга узоқ муддатга чиқиб кетган, чет элдан қайтиб келган фуқаролар аниқланди. Улар билан профилактик тушунтириш ишлари олиб бориляпти.

Фуқаролар гавжум жойларда 786 патруль йўналишлари ташкил қилиниб, 27 объект қўриқлаш пультига уланди. 49 объектга видеокузатув мосламалари ўрнатилди.

Мулкий турдаги жиноятларнинг олдини олиш мақсадида қўриқлаш хизмати томонидан маҳалла раислари ва профилактика инспекторлари билан ҳамкорликда кўп қаватли, савдо уйлари ва тўйхоналарнинг кириш йўлагига юқори сифатли тасвирга туширувчи кузатув камералари ва кодли қулфлар ўрнатиш бўйича тарғибот-ташвиқот ишлари олиб борилди.

Ёнғин хавфсизлиги хизмати ходимлари томонидан газ идоралари, электр тармоқлари корхонаси ва бошқа идора ходимлари билан 723 объект­да ёнғин содир бўлиши мумкин бўлган ҳолатларнинг олдини олиш мақсадида профилактик тадбирлар олиб борилди. Уларга таклиф ва тавсиялар бериш орқали амалий ёрдамлар кўрсатилди.

Ҳуқуқбузарликларнинг олдини олиш, вазият барқарорлигини таъминлаш, таълим муассасаларида ўқувчилар давоматини яхшилаш, фуқаролар, ёнғин ва йўл ҳаракати хавфсизлигини таъминлаш мақсадида маҳалла, таълим муассасалари ва корхона-ташкилотларда 3520 маротаба тушунтириш, тарғибот ва ташвиқот ишлари олиб борилди.

Ўтказилаётган тадбирларнинг сифат ва самарадорлигини ошириш мақсадида барча ­тоифадаги раҳбарлар ва терговчилар жалб этилди. Ҳафта давомида содир этилган жиноятларнинг келиб чиқиш сабаблари муҳокама қилинган ҳолда, аҳоли билан учрашув ва давра суҳбатлари ташкил этилди.

Маҳаллаларда, таълим муассасаларида, корхона ва ташкилотларда фуқароларнинг ўзини ўзи бошқариш органлари билан ҳамкорликда «Огоҳлик — давр талаби», «Ўз уйингни ўзинг асра» каби мавзуларда тарғибот-ташвиқот ишлари олиб борилмоқда. Кўрилаётган барча чоралар ҳуқуқбузарликларнинг олдини олишга қаратилгандир.

 

Фаррух ЮНУСОВ,

Жиззах вилояти ИИБ ҲООБ катта инспектори, капитан.



DB query error.
Please try later.