11.02.2017

КОНТРАБАНДАГА ЧЕК ҚЎЙИЛМОҚДА

Давлат божхона қўмитаси контрабанда ва божхона қоидабузарликларига қарши курашиш борасида амалга оширилаётган чора-тадбирлар ҳақида матбуот анжумани ўтказди.

Қайд этилдики, қўмита томонидан товар-моддий бойликлар ва контрабанда ашёларининг ноқонуний айланиши, ташқи иқтисодий фаолият соҳасида содир этилаётган ҳуқуқбузарликларни фош этиш, олдини олиш, уларнинг келиб чиқиш сабабларини таҳлил қилиш масалаларига алоҳида эътибор қаратилмоқда.

Анжуманда мазкур соҳанинг моддий-техник базасини мустаҳкамлаш, замонавий ахборот технологиялари билан жиҳозлаш ишлари ҳақида ҳам сўз юритилди. Кўрилган чора-тадбирлар туфайли нафақат йирик ҳажмдаги юк автомашиналари саноқли сонияларда божхона кўригидан ўтказиляпти, балки бу жараёнда бир қатор қоидабузарликлар ҳам фош этилмоқда.

Контрабанда жиноятининг олдини олишда турли давлатларнинг божхона хизматлари билан ҳамкорлик муҳим аҳамиятга эга бўлмоқда.

Ўтган йили божхона органлари томонидан турли мазмундаги аудио ва видео маҳсулотлари ёзилган 5 мингдан ортиқ контрафакт маҳсулот аниқланган.

Матбуот анжуманида, шунингдек, тадбиркорларга яратилган қулайлик ва имтиёзлар ҳақида алоҳида сўз юритилди. Ташқи иқтисодий фаолият иштирокчиларини қўллаб-қувватлаш мақсадида тадбиркорларга ўтган йилда божхона тўловлари бўйича 13,3 триллион сўм миқдорида имтиёз берилди. Давлат рўйхатидан ўтмасдан товарларни, айниқса, сифатсиз озиқ-овқат маҳсулотларини республикамизга олиб кириш, сақлаш ёки яширин тарзда ишлаб чиқариш билан шуғулланаётган шахсларга нисбатан тегишли чоралар кўрилмоқда.

Хулоса қилиб айтганда, божхона органлари томонидан қонун ҳужжатлари бузилишининг, жумладан, ноқонуний ва сифатсиз товарлар кириб келишининг олдини олиш ҳамда фош этиш борасида самарали тизим яратилган.

 

Равшан ШОДИЕВ,

«Ўзбекистон овози» мухбири.



DB query error.
Please try later.