08.04.2019

ФЕСТИВАЛЬ ҒОЛИБЛАРИ АНИҚЛАНДИ

Пойтахтимиздаги «Миллий» стадионда ёшларнинг бўш вақтини мазмунли ташкил этиш ва спорт ўйинларига оммавий равишда жалб қилиш мақсадида «Ёшлар бирлиги — юрт тинчлиги» шиори остида ҳарбий-ватанпарварлик спорт фестивали ўтказилди.

 

Чилонзор тумани ҳокимлиги, прокуратураси, мудофаа ишлари бўлими, Ўзбекистон ёшлар иттифоқи ва бир қатор мутасадди ташкилотлар билан ҳамкорликда ташкил этилган спорт фестивалининг тантанали очилиш маросимида мамлакатимизда ёшларга оид давлат сиёсатини амалга оширишга қаратилган саъй-ҳаракатлар юксак самаралар бераётгани, бу каби ҳарбий-спорт мусобақалари ўқувчиларни ҳарбий- ватанпарварлик руҳида тарбиялаш, улар ўртасида соғлом турмуш тарзини қарор топтиришга хизмат қилаётгани алоҳида таъкидланди.

Шундан сўнг ҳудуддаги 7-, 534-мактабгача таълим муассасалари тарбияланувчилари Ватан, мардлик ва дўстликни тараннум этувчи шеърлар ўқиди. Улар иштирокидаги саҳна кўринишлари барчада катта таассурот қолдирди.

— Ёшларни ҳақиқий ватанпарвар қилиб тарбиялаш мамлакатимиз мудофааси юксалишига хизмат қилади, — дейди Чилонзор тумани мудофаа ишлари бўлимининг чақирилувчи ёшларни ҳарбий хизматга тайёрлаш бўлими бошлиғи Шерзод Ҳикматов. — Мазкур спорт фестивали жойларда тизимли равишда ўтказилди. Мақсад ҳарбий чақириққа тайёргарлик ёшидаги ўқувчиларни ҳарбий хизмат ва олий ҳарбий билим юртларига пухта тайёрлашдир. Шунингдек, туманимиздаги мактабгача таълим муассасалари ўртасида ўтказилган тадбирлар болажонларда катта қизиқиш уйғотди.

Мусобақада ҳудуддаги касб-ҳунар коллежлари, академик лицейлар, умумтаълим мактаблари жамоалари ҳарбий қуролни қисмларга ажратиш ва йиғиш, саф тайёргарлиги, сафда қўшиқ айтиш, турникда тортилиш ва эстафета югуриши каби шартлар бўйича ўзаро баҳслашди. Беллашувлар ғолиблари, чақирувга қадар бошланғич тайёргарлик бўйича энг яхши фан ўқитувчилари, фаол қатнашган жамоалар ҳомийларнинг диплом ва эсдалик совғалари билан тақдирланди.

— Мусобақада турникда тортилиш шартида энг яхши натижа кўрсатиб, ғолиб бўлдим, — дейди тумандаги 168-умумтаълим мактаби ўқувчиси Ҳумойиддин Муратов. — Бу каби спорт тадбирлари шу кунгача амалий ва назарий дарсларда олган билимларимизни синовдан ўтказишга хизмат қилади.

Қуролли Кучлар Марказий ашула ва рақс ансамбли ижросидаги концерт дастури барчага кўтаринки кайфият бағишлади.

 

Абдулазиз МУСАЕВ,

ЎзА мухбири.



DB query error.
Please try later.