Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
02.10.2018

ШУКУР БУРХОНОВНИНГ ДУОСИ

Теша МЎМИНОВ, Ўзбекистон халқ артисти:

— Тошкентда ўқиб юрган пайтларимизда биз талабалар Ўзбек Миллий академик драма театрида оммавий саҳналарда иштирок этардик. Бир куни оммавий саҳна кўриниши пайтида Шукур Бурхонов талабалар ичидан мени чақириб олди. Қаерданлигимни, ўқишимни, кейин нима учун бу касбни танлаганимни сўради. Мен жавоб бердим.

— Ҳой бухоролик бола, — деди шунда Шукур Бурхонов. — Агар бу ерга артистлик орқасидан бой бўламан, обрў орттираман, деб келган бўлсанг, ҳали ҳам бошқа касбни танла. Бу муқаддас даргоҳ, сохтакорликни, сунъийликни ёқтирмайди. Мабодо шу касбга чин дилдан, бор вужудинг билан меҳр қўйган бўлсанг, ҳар бир чиқишинг одамларнинг эсида қоладиган воқеа бўлсин. Ролни ўйнаш керак эмас, шу образ билан яшаш керак.

Иккинчи курсда ўқиётган пайтларимда театрда «6 июль» деб номланган спектакль қўйиларди, ролларни таниқли устозлар ўйнарди. Ўзбекистон халқ артисти Турғун Азизов спектакль қўйиладиган куни келмай қолди. Ўшанда Ўзбекистон халқ артисти Наби Раҳимов бизларга қарата: «Қани, шу ролни ким ўйнаб беради?» деганида ўзим билмаган ҳолда олдинга отилиб чиққанман ва ушбу ролни ўйнаганман.

3-курсдалигимда театр томошабин билан тўла, яна ўша спектаклда роль ўйнашга тўғри келди. Театр режиссёри Тошхўжа Тўлахўжаевнинг уйига бориб, шу ролни ўйнашим учун рухсат олиб келишди. Эртаси куни «Спектаклда роль ўйнаган Теша Мўминовга 60 сўм мукофот пули берилсин, театрга ишга қабул қилинсин», деган буйруқ чиқди.

Ўқишни битириб, Бухорога қайтмоқчи бўлдим. Ёлғиз фарзандман, ота-онамнинг биргина суянчиғи мен, қайтмасам бўлмасди. Лекин театрдаги устозларим мени қўйишмади. Ўзлари Бухорога бориб, ота-онам билан гаплашиб, уларнинг розилигини олишди. Барибир кўнглим жойига тушмади, бош фарзандимни ота-онам қўлига бердим. Онам вафот этганларидан кейин отам билан қизимни Тошкентга кўчириб олиб келдим, қурбим етганча хизматларида бўлиб, дуоларини олдим...

Барча ролларини қойилмақом қилиб ижро этган устоз Шукур Бурхонов бир умр соҳибқирон Амир Темур ролини ўйнаш орзуси билан ўтди. Буюк санъаткор касал бўлиб ётганида уйига тез-тез бориб хабар олиб турардим. Бир гал борганимда: «Қани, қўлингни дуога оч, мендан ҳам зўр артист бўлгин, юксак мартабаларга эришгин», — деб дуо қилдилар. Устозни сўнгги сафарга кузатув куни видолашиш учун келган одамлар кўчаларга сиғмай кетди.

Худога шукр, ҳамма орзу қилган ролларимни ўйнадим, устоз орзу қилган Амир ­Темур образини ҳам ўйнаш каминага насиб қилди. Мана шундай улуғ айёмда устозларни хотирлаш, уларнинг руҳини шод этиш, ҳаёт бўлганларининг уйига бориб, зиёрат қилиш ҳаммамизнинг инсоний бурчимиз, қолаверса, шогирдлик қарзимиз. Ҳозир ўзимиз устозмиз, бундай байрам кунлари ҳовлимиз тўйхонага айланиб кетади. Устоз-шогирдликдан айирмасин!



DB query error.
Please try later.