10.05.2017

10 ИМКОНИЯТДАН 9 ОЛТИН МЕДАЛЬ

Пойтахтимиздаги «Ўзбекистон» спорт мажмуасида Осиё чемпионати якунига етди. Илгари хабар қилганимиздек, финал жангларининг биринчи куни 4 нафар бокс­чимиз рингга чиқиб, барчаси ғалаба қозонган эди. Финал ўйинларининг иккинчи куни 5 нафар боксчимиз чемпионлик учун жангга чиқиб, уларнинг ҳар бири юксак маҳорат намойиш этиб, Осиё чемпиони бўлди. Шундай қилиб, мусобақада қатнашган 10 нафар боксчимиздан 9 нафари олтин медални қўлга киритди. Боксчиларимиз бу ёрқин ғалаба билан Хотира ва қадрлаш кунини муносиб кутиб олишди. Ўзбекистон спорти юксалиб бораётганини яна бир бор намойиш этишди.

Барча мухлислар маҳоратли боксчимиз Ҳасанбой Дўсматов (-49 кг.) рингга чиқишини ҳаяжон билан кутаётганди. У рақиби мўғулистонлик Ган Эрдене Ганхуянг билан бўлган учрашувда ишончли ҳаракат қилиб, ғалабани қўлга киритди. Рио Олимпиадаси олтин медали сов­риндори ҳисобланган ҳамюртимиз кетма-кет иккинчи маротаба Осиё чемпиони унвонига сазовор бўлди.

-52 кг. вазн тоифасида Осиё чемпионатида қатнашган боксчимиз Жасурбек Латиповфиналдаги жангида Жанубий Корея вакили Ин Кю Ким устидан ғалаба қозонди.

Иқболжон Холдоров (-64 кг.) Мўғулистон терма жамоаси аъзоси Чинзориг Батарсухга қарши бўлиб ўтган жангда рақибидан устунлигига ҳеч кимда шубҳа қолдирмади.

Боксчимиз Шаҳрам Ғиёсовнинг (-69 кг.) финал жангини барчамиз алоҳида қизиқиш ва ҳаяжон билан кутгандик. Юртдошимиз қозоғистонлик таниқли боксчи Аблаихон Жусупов устидан ишончли ғалабага эришди.

Энг оғир вазнли боксчилар ўртасида рингга кўтарилган Баҳодир Жалолов финалда Қозоғистон вакили Қамишбек Конкабаевни мағлубиятга учратди.

Мусобақа якунларига кўра, ўзбекистонлик чарм қўлқоп устаси Ҳасанбой Дўстматов мусобақанинг энг яхши боксчиси, деб топилди. Унга қитъанинг энг яхши боксчиси учун бериладиган мукофотни Осиё бокс конфедерацияси президенти Серик Қонақбаев топширди.

Маълумот учун айтиш керакки, Ўзбекистон терма жамоаси Осиё чемпионатида 10 та имкониятдан 9 та олтин медални қўлга киритиб, қитъа чемпионати тарихида ўзига хос рекорд ўрнатди.

Шу кунгача Осиё чемпионатларида икки марта Жанубий Корея терма жамоаси (1965 йил Сеулда, 1987 йил Қувайтда) 8 та олтин медалга эга бўлган эди. Ўзбекистон Осиё рекордини янгилаган ҳолда жорий йилнинг 23 август — 4 сентябрь кунлари Германиянинг Гамбург шаҳрида бўлиб ўтадиган жаҳон чемпионатида тўлиқ таркиб билан иштирок этиш ҳуқуқига эга бўлди.

Осиё чемпионатида Ўзбекистон терма жамоаси — биринчи (9 та олтин медаль), Қозоғистон вакиллари — иккинчи (1 олтин, 3 та кумуш ва 4 бронза), Ҳиндистон ва Мўғулистон терма жамоалари эса учинчи ўриндан жой олишди (2 тадан кумуш ва биттадан бронза медаль).

 

Шаҳбоз САИДОВ,

«Ўзбекистон овози» мухбири.



DB query error.
Please try later.