29.04.2017

ОСИЁНИНГ ЭНГ КУЧЛИЛАРИ ТОШКЕНТДА

30 апрель - 7 май кунлари пойтахтимиз — Тошкентда Осиё чемпионати бўлиб ўтади. Унда 29 мамлакатдан 200 нафарга яқин боксчи ғолиблик учун курашади. Мусобақаларда 1977 йилдан 1998 йилгача туғилган бокс­чилар иштирок этади.

Мазкур Осиё чемпионати жорий йилнинг 25 августидан 4 сентябригача Германиянинг Гамбург шаҳрида бўлиб ўтадиган жаҳон чемпионатига кучлиларни саралаш турнири ҳисобланади. Жаҳон чемпионатида Осиё учун 60 та ўрин ажратилган, ҳар бир вазн тоифасида олтитадан энг яхши боксчи танланади. Тошкентдаги Осиё чемпионатида боксчилар совринли ўринлардан ташқари ушбу лицензия­лар учун ҳам ўзаро рақобатлашади.

Маълумки, бокс бўйича биринчи Осиё чемпионати 1963 йили Таиланд пойтахти Бангкок шаҳрида бўлиб ўтган.

Ўзбекистон бокс бўйича Осиё чемпионатларини ташкил қилишда бой тажрибага эга. Пойтахтимизда 1995 ва 1999 йиллари катталар ўртасидаги, 2015 йили ўсмирлар ўртасидаги Осиё чемпионати ўтказилган.

Эртага бошланадиган мусобақаларда қуйидаги спортчилар мамлакатимиз шарафини ҳимоя қилади:

- 49 кг. Ҳасанбой Дўсматов,

- 52 кг. Жасурбек Латипов,

- 56 кг. Муроджон Аҳмадалиев,

- 60 кг. Элнур Абдураимов,

- 64 кг. Иқболжон Холдоров,

- 69 кг. Шаҳрам Ғиёсов,

- 75 кг. Исроил Мадримов,

- 81 кг. Бектемир Мелиқўзиев,

- 91 кг. Санжар Турсунов,

+91 кг. Баҳодир Жалолов.

Мураббийлар штаби: Марат Қурбонов, Раҳматжон Рўзиохунов, Тўлқин Қиличев.

Осиё чемпионатида Ўзбекистон терма жамоаси билан бир қаторда Хитой, Ҳиндистон, Эрон, Иордания, Қозоғистон, Жанубий Корея, Мўғулистон, Покистон, Шри-Ланка, Тожикистон терма жамоалари тўлиқ таркиб — ўнтадан боксчи билан иштирок этади.

Маълумот ўрнида айтиб ўтиш жоизки, мазкур боксчилардан Ҳасанбой Дўсматов, Муроджон Аҳмадалиев, Элнур Абдураимов, Исроил Мадримов, Бектемир Мелиқўзиев, Баҳодир Жалолов Таиланд пойтахти Бангкок шаҳрида 2015 йили бўлиб ўтган Осиё чемпио­натида иштирок этган. Мусобақа якунига кўра, боксчиларимиз 2 олтин, 5 кумуш ва 1 бронза медалини қўлга киритиб, умумжамоа ҳисобида иккинчи ўринни эгаллаган эди. Биринчи ўринга Қозоғистон терма жамоаси, учинчи ўринга мезбон — таиланд­лик боксчилар сазовор бўлган.

Навбатдаги Осиё чемпионатида боксчиларимиз муносиб иштирок этади, деб умид қиламиз.

 

Шаҳбоз САИДОВ,

«Ўзбекистон овози» мухбири.



DB query error.
Please try later.