14.03.2017

«БУНЁДКОР» ТОШКЕНТДА, «ЛОКОМОТИВ» ТЕҲРОНДА

имкониятни бой берди

Кеча Осиё чемпионлар лигаси мусобақасининг гуруҳ бос­қич 3-тур учрашувларига старт берилди. Саккизта гуруҳда жамоалар рақибларига қарши майдонга чиқишмоқда.

«С» гуруҳида мамлакатимизнинг «Бунёдкор» жамоаси кеча Тошкентда Эроннинг «Зобаҳан» клубини қабул қилди. Мазкур ўйинга қадар қалдирғочлар иккита турда мағлубиятга учраб гуруҳда охирги ўринда боришаётган эди. «Зобаҳан»га қарши кечган ўйинда ҳам «Бунёдкор» 0:2 ҳисобида мағлуб бўлди. Ўйиннинг 55-дақиқасида Жавлон Мирабдуллаевнинг қўпол хатосидан сўнг Жерри Бенгстон Мурод Зуҳуров билан бирга-бир вазиятга чиқиб, ҳисобни очди.

Орадан 8 дақиқа ўтиб эса Вадим Чемиртан «Бунёдкор»ни янада қийин аҳволга солиб қўйди. У рақиб футболчисига нисбатан қўпол ўйнагани учун майдондан четлатилди.

Ўйин сўнггида «Истиқлол» ўйинчиси Табризи «Бунёдкор» жарима майдонига кириб келган вақтда йиқитилди ва ҳакам 11 метрлик жарима зарбасини белгилади. Нуқтага яқинлашган Табризи ҳисобни 0:2 га етказди.

Шу тариқа учинчи бор мағлубият аламини тортган «Бунёдкор» гуруҳдан чиқиш имкониятини деярли йўқотди. Улар кейинги турларнинг барчасида ғалаба қозонган тақдирда ҳам плей-офф масаласи бошқа клубларнинг ўйинига боғлиқ бўлиб қолади.

Мамлакатимизнинг яна бир жамоаси «Локомотив» Эронда «Истиқлол» меҳмони бўлди. Мазкур ўйинда теҳронликлар 2:0 ҳисобида зафар қучди. Учрашувнинг 37-дақиқасида Фаршид Исмоили ҳисобни очди. 84-дақиқада Али Горбани ҳимоячилар хатосидан унумли фойдаланиб, ҳисобни оширди — 2:0. Ўйин якунига қадар ушбу натижа сақланиб қолди.

Шундай қилиб «Локомотив» гуруҳ босқичидаги иккинчи мағлубиятини тан олди ва плей-оффга чиқиш имкониятларини пасайтириб юборди.

Гуруҳлардаги қолган учрашувлар бугун ва эртага бўлиб ўтади.

 

Шаҳбоз САИДОВ,

«Ўзбекистон овози» мухбири.



DB query error.
Please try later.