Охирги сонда



Кўп ўқилган мақолалар



Долзарб мавзу



Мақолалар архиви

«    Mart 2017   
Du Se Cho Pa Ju Sha Ya
27 28 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
02.03.2017

БАҲОР ВА ЗУЛФИЯ

Зулфияхоним ҳайкали ўрнатилган майдонда улуғ шоира таваллуд куни муносабати билан тантанали маросим ўтказилди

Ўзбек халқининг севимли шоираси Зулфияхонимнинг таваллуд айёми муносабати билан 1 март куни шоира ҳайкали ўрнатилган майдонга Ўзбекистон Хотин-қизлар қўмитаси, Ёзувчилар уюшмаси, Тошкент шаҳар ҳокимлиги турли вазирлик ва идоралар, ижодий ҳамда жамоат ташкилотлари вакиллари, олимлар, маънавият тарғиботчилари, маҳалла фаоллари, ёшлар йиғилди.

Тадбир аввалида йиғилганлар шоиранинг ҳаётлик пайтида ёзиб олинган ўзи ўқиган шеърлардан намуналар тингладилар. Анжуманни Тошкент шаҳар ҳокими ўринбосари, Хотин қизлар қўмитаси раиси Фарида Абдураҳимова кириш сўзи билан очди. Ўзбекистон Республикаси Бош вазири ўринбосари, Хотин қизлар қўмитаси раиси Танзила Норбоева, Ёзувчилар уюшмаси раиси Муҳаммад Али ва бошқалар Зулфияхонимнинг ибратли ҳаёти ва сўнмас ижодининг умр­боқийлиги, жозибаси, илмий, тарбиявий аҳамияти ҳақида ўз фикрларини билдирдилар.

— Улуғларга ҳурмат кўрсатиб, иззатини жойига қўйган одамларгина эл ичра обрў-эътибор, шону шуҳрат топади ва шогирдларининг меҳри, соғинчида яшайди, — дейди Ўзбекистон халқ шоираси, Олий Мажлис сенати аъзоси Энахон Сиддиқова. — Мен бундан қирқ йил олдин Ёзувчилар уюшмасида ўтказилган семинарда шеър ўқиб, устоз назарига тушганман. Зулфияхоним мен каби кўплаб шоираларнинг буюк устози ва унинг хотираси олдида ҳурмат бажо келтириш биз учун ҳамиша фарз ва қарздир.

Зулфиянинг илк шеърий тўплами — «Ҳаёт варақлари» 1932 йилда чоп этилган бўлса, ундан ке­йинги йилларда нашр этилган китоблари юракларга шалоладай кириб борди. Шоира ўз умри давомида кўплаб жаҳон адабиёти дурдоналарини ўзбек тилига ўгирди. У халқаро Жавоҳарлаъл Неру, «Нилуфар» мукофотлари ҳамда Болгариянинг «Кирилл ва Мефодий» орденига сазовор бўлган.

— Ҳамид Олимжон ва Зулфиянинг ижоди, уларнинг ибратли ҳаёти ҳар биримиз учун ўрнак бўла олади, — дейди тадбиркор Манзура Йўлдошева. — Мен ҳар йили баҳорнинг биринчи кунида шу ерга келиб, улуғ шоирамиз ҳайкали пойига гул қўяман.

— Бугун Зулфияхонимнинг инсоний баркамоллик, одоб-ахлоқ, беғубор ва покиза туйғуларга ҳамоҳанг бўлган асарлари ҳар бир хонадонда севиб ўқилади, — дейди Ўзбекистонда хизмат кўрсатган маданият ходими, шоира Шарифа Салимова. — Шоиранинг ижод намуналари жаҳон халқ­ларининг кўплаб тилларига таржима қилинган. У куйлаган дардда некбинлик, ҳаётга, одамларга муҳаббат бор. Шунинг учун бу шоирамизни «Садоқат куйчиси», деб эъзозлаймиз. Зулфия лирикасида самимият, ростгўйлик, ўқувчига нисбатан эҳтиром туйғуси бениҳоя кучли.

Зулфия ҳаёти ва ижоди юксак қадрланиб, унинг номида Давлат мукофоти таъсис этилган. Бу йил ана шу мукофотга сазовор бўлган 240 нафар Зулфияхоним қизлари сафига яна 15 нафар истеъдодли қиз қўшилади.

Тадбирда таниқли санъаткорлар, В.Успенский номидаги Республика ихтисослаштирилган мусиқа академик лицейи ўқувчилари ижросида шоира шеърлари билан айтиладиган қўшиқлар куйланди. Анжуман якунида кенг жамоатчилик томонидан Зулфия­хоним ҳайкали пойига гуллар қўйилди.

 

Нуруллоҳ ДОСТОН,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: