Охирги сонда



Кўп ўқилган мақолалар



Долзарб мавзу



Мақолалар архиви

«    Sentabr 2020   
Du Se Cho Pa Ju Sha Ya
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 1 2 3 4
19.08.2020

«ЗАЛ-ЗАЛА ФАРИШТАСИ»

ёхуд ижтимоий тармоқларда ёлғон маълумот тарқатган блогернинг қилмишлари фош бўлгани хусусида

Сўз – қудратли куч. Глобаллашув жараёнида унинг атомдан ҳам залворли эканлигини ҳаётнинг ўзи кўрсатмоқда. Шундай экан, айтилаётган ҳар бир сўзга эътиборли бўлиш керак. Аксинча, миш-мишлар хавотир ва иккиланишни келтириб чиқаради, одамларни чалғитади. Қалбларга озор етказиб, тинчлик-тотувлик ва барқарорликка раҳна солиши мумкин. Бироқ чуқур ўйламай ахборот тарқатувчилар ҳамон учраб турибди.

 Сариосиё туманининг “Кончилар” маҳалласида истиқомат қилувчи Дастагул Останақулова ҳам ана шундай ўйламай гапирадиганлар тоифасидан экан. Туман тиббиёт бирлашмасига қарашли тез тиббий ёрдам бўлимида шифокор-кардиолог ва Шарғун шаҳар поликлиникасида шифокор вазифаларида ишлаётган “қаҳрамон”имиз ижтимоий тармоқларда “Ҳақиқатчи блогерлар” гуруҳини очиб, “Зал-зала фариштаси” тахаллуси билан фаолият кўрсатиб келаётган эди.

 Блогер аёл 2020 йилнинг 2 март куни соат 19:50 ларда интернет тармоғи орқали Узун туманининг “Тожикобод” маҳалласида яшовчи Боймурод Жўраевга туҳмат тошларини отади. Яъни, фермер хўжалиги раҳбари ўзига тегишли “Далер” фермер хўжалигидаги 165- ҳамда 168-дала контурларидаги ер майдонларини фуқароларга сотганини “достон” қилади. Сувли майдонларда чигит экилиши ўрнида уй-жойлар қурилаётгани-ю, бунга Узун тумани раҳбарлари эътибор қаратмаётгани айтиб ўтилади.

 Шов-шувлар ортидан обрў топяпман деб ўйлаган блогер “юриш”ни давом эттиради. Шу йилнинг 24 июль куни соат 8:30 ларда ижтимоий тармоққа “Сурхондарё халқи учун оғир жудолик” сарлавҳали навбатдаги ёлғон хабарни жойлаштирилади. Унда Сурхондарё вилояти ҳокими Тўра Боболов вафот этгани баён қилинади... ва оила аъзоларига чуқур таъзия билдирилади.

 Хўш, мутлақо асоссиз бундай ахборот қандай ва қаердан пайдо бўлган?!

 Маълум бўлишича, Сурхондарё вилоят Санитария-эпидемологик осойишталик марказида меҳнат қилаётган нотаниш аёл 2020 йилнинг 24 июль куни эрталаб соат 8 лардан кейин Дастагул Останақуловага қўнғироқ қилади. Аввалига у ўз муаммоларини айтган бўлса, сўнгра гўё Сурхондарё вилояти ҳокими оламдан ўтганини маълум қилган. Дастагул Останақулова эса бу ахборот қанчалик ростлигини текшириб кўришни хаёлига ҳам келтирмайди. Ёлғон маълумотни дарҳол ижтимоий тармоқ саҳифаларига жойлаштиради.

 – Қарийб ўн етти йил “Далер” фермер хўжалигига раҳбарлик қилдим, – дейди Боймурод Жўраев. – 2019 йилдан эътиборан Жўра Эшмирзаев номли сув истеъмолчилари уюшмасида бошлиқман. Фермер хўжалигини эса фарзандларим бошқараяпти. Дастагул Останақулова, деган блогер аёлни танимайман. Унга нисбатан ҳеч қандай адоватим йўқ. Аммо унинг фисқу фасоддан иборат уйдирма гапларини ҳазм қилолмаяпман.

 Ижтимоий тармоқлардаги чиқишларидан кейин унга қўнғироқ қилдим. Нима сабабдан туҳмат қилаётганини сўраганимда “Мен – халқман!”, деб жавоб берди у. Туман ҳокимлиги ва прокуратурасига топшириқ берганию, тез орада тегишли ҳужжатлар қўлида бўлишини ҳам айтиб ўтди. Иғвогар блогерни кечирмайман. Унга нисбатан тегишли чора кўриш ва етказилган моддий ва маънавий зарарни ундириб берилишини сўрайман.

Дарвоқе, яқинда унинг даъво аризаси судда кўриб чиқилди.

– Қилган ишимдан пушаймонман, – дейди Дастагул Останақулова. –Нотўғри маълумот тарқатганим учун Сурхондарё вилояти ҳокими Тўра Боболов ва фуқаро Боймурод Жўраев кечиришини илтимос қиламан. Ёлғиз она эканлигимни инобатга олган ҳолда енгиллик беришларингизни сўрайман.

Судда ҳолат атрофлича ўрганилган ҳолда Узун туман Маъмурий судининг 2020 йил 24 июлдаги қарори (раислик қилувчи А. Холмўминов) билан айбдор, деб топилган Дастагул Останақуловага Ўзбекистон Республикаси Маъмурий жавобгарлик тўғрисидаги кодекснинг 34-моддаси 2-қисмига асосан узил-кесил базавий ҳисоблаш миқдорининг 10 баравари яъни, 2 миллион 230 минг сўм жарима жазоси тайинланди. Иш бўйича далилий ашё сифатида олинган “Redmi NOTE 9” русумли қўл телефони маъмурий ҳуқуқбузарлик содир этиш қуроли сифатида давлат фойдасига мусодара қилинди.

 Ҳар ким экканини ўради, дейдилар. Айтиш мумкинки, туҳмат ва бўҳтонлардан иборат хабарларни тарқатган блогер аёл ҳам қилмишига яраша жазоланди.

Блогерлар орасида билимли, холис ва фидойилари оз эмас, албатта. Улар жамиятдаги камчилик ва нуқсонларга қарши фаол кураш олиб боришмоқда. Аммо Дастагул Остонақуловага ўхшаганлар барча блогерлар шаънига доғ туширади, одамларда уларга нисбатан ишончсизлик уйғотади.

 

Абдумалик ҲАЙДАРОВ,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: