11.06.2019

Бир-бирига ўхшаш «ЭГИЗАК» жавоблар замони ўтмадими?

«Ўзбекистон овози» газетасининг 2019 йил 8 январь сонида «Адолат посангиси бузилса» сарлавҳали танқидий мақола чоп этилган эди.

Мақолада Самарқанд шаҳрининг собиқ ҳокими А.Шукуров томонидан Самарқанд шаҳри Гагарин кўчасидаги 128-уйни бузиш ва ўрнига замонавий турар-жой қуриш учун уни «Гарант қурилиш сервис» МЧЖга бериш тўғрисида 2015 ва 2016 йилда чиқарилган қарорлари ҳақида сўз боради. Орадан қарийб 6 ой ўтган бўлишига қарамай, собиқ шаҳар ҳокимининг амалдаги қонунларга зид равишда қабул қилган бу қарорининг қонунийлик ёки ноқонунийлик даражасига баҳо бериш, протест келтириш масаласи суд-ҳуқуқ идоралари томонидан ҳанузгача пайсалга солиб келинмоқда.

Самарқанд шаҳрида кўп қаватли уй-жой қурилишларига ноқонуний тарзда ер ажратиш натижасида кимларнинг жиноий жавобгарликка тортилганидан ҳаммамиз хабардормиз. Лекин шунга қарамай, бу тарихий масканда уй-жойлар қурилишида халқаро шаҳарсозлик қоидаларига риоя қилинмагани туфайли уларнинг баъзи бирларини бузиш ҳақида суд қарорлари қабул қилинганидан ҳам хабаримиз бор.

Самарқанд шаҳри, Гагарин кўчаси, 128-манзилда жойлашган 5 қаватли бинонинг уч қаватини 2006 йилда сотиб олган, 2007 йилнинг 7 мартида Самарқанд шаҳар ҳокимининг «Бинога эгалик ҳуқуқини тасдиқлаш тўғрисида»ги қарорига эга бўлган тадбиркор Жамшид Шомуродов қонунсизлик ва адолатсизлик гирдобида қолди.

Бино мажбурий тарзда бузилиб, «замонавий турар-жой қуриш» баҳонасида унинг ер майдони «Гарант қурилиш сервис» МЧЖга «тортиқ» қилинди. Зўравонликка қонуний тус берилди.

Самарқанд шаҳар прокуратураси эса бу борада шаҳар ҳокими қарорига қонун доирасида баҳо бериш ўрнига, уни қайд этишдан нарига ўтмаяпти.

Мамлакатнинг гуллаб-яшнаши, ривожланиши тадбиркорлар фаолияти билан боғлиқлиги дунё тажрибасидан маълум. Президентимиз Шавкат Мирзиёев бу ҳақда кўп гапираяпти, тадбиркорларни қўллаб-қувватлаяпти, уларга тўсиқ бўлаётган барча ғовларни бартараф қилишга қаратилган муҳим қарорлар қабул қилаяпти. Лекин бу борада ўрта бўғин раҳбарларининг тушунчасини, дунёқарашини ўзгартириш қийинлик билан кечаётганини ҳаётнинг ўзи кўрсатиб турибди.

Тадбиркорликка таъма аралашса, зиддиятлар кўпаяди, тўсиқ қўйилса, тараққиёт тўхтайди, инвесторлар бундай жамиятда ўз бизнесини юритишга ишончли кафолат ололмайди. Ривожланишни истар эканмиз, бирдан-бир йўлимиз — қонунларга риоя қилиш, тадбиркорларга кенг йўл очиш.

Тадбиркорлик фаолияти тўхтаб қолган Жамшид Шомуродов ҳақиқат излаб сарсон-саргардон бўлиб юрган бир пайтда «Гарант қурилиш сервис» корхонаси Ўзбекистон Республикасининг амалдаги қонунида белгиланган талабларга риоя қилмасдан, ушбу манзилдаги турар ва нотурар уй-жойларни мулкдор Ж.Шомуродовнинг розилигисиз қонунга хилоф равишда бузганидан ташқари, бу ерда қурилиш ишларини давом эттираяпти, кўп қаватли уйнинг биринчи қаватига устунлар ўрнатилди...

 Қонун бўйича «Гарант қурилиш сервис» МЧЖ раҳбари кўп қаватли турар-жой эгаларидан уй-жойларини тўлиқ сотиб олганидан кейин, агар уй-жой соҳиблари шу манзилда замонавий уй-жой қуришга қурби етмасагина ҳокимиятга таклиф киритиши ва кўриб чиқилиши лозим эди. Ҳолбуки, Жамшид Шомуродов бу ғалва бошланмасидан илгари шаҳар ҳокимлигига бориб, бузиладиган эски бино ўрнига талаб даражасидаги уй-жой қурилишига қурби ҳам, маблағи ҳам етарли эканини кўп марталаб оғзаки ва ёзма тарзда билдирган эди. Лекин унинг бу ёзишмалари жавобсиз қолиб кетди, рухсат ҳам берилмади.

Ижро ҳокимияти томонидан чиқарилаётган қарорларнинг қонунийлигини назорат этувчи шаҳар прокуратураси шу ҳолат бўйича Самарқанд шаҳар ҳокимининг юқорида келтирилган, яъни 2015 йилнинг 27 ноябрида ва 2016 йилнинг 19 декабрида қонунга зид равишда қабул қилган қарорларига протест келтириш ўрнига уни қўллаб-қувватлади, бундан тадбиркор жабр кўрди. Аслида, бу масала холис кўрилганида, қонун устуворлиги таъминланиб, можарога нуқта қўйилган бўлар эди.

Гарчанд қонунларимизда ҳар бир тадбиркорнинг хусусий мулки давлат ҳимоясида ва дахлсиз эканлиги кўрсатилган бўлса-да, Жамшид Шомуродовнинг бу борада қилган мурожаатларига «Шаҳар прокуратураси томонидан...» деб бошланадиган бир хил мазмундаги, ҳатто нуқта-вергули ҳам ўзгаришсиз қолдирилган жавоблар келиши давом этмоқда.

Яқинда Бош прокуратура мутасаддилари томонидан Самарқанд шаҳрида ўтказилган сайёр қабулда тадбиркорларга тўсиқ бўлаётган масалалар муҳокама қилинди, уларнинг кўпларига шу ернинг ўзида ечим топилди. Жамшид Шомуродов ҳам «Самарқанд шаҳар прокуратураси томонидан...» деб бошланадиган бир даста жавоб хатларини кўтариб келди.

Бош прокурор ўринбосари Эркин Йўлдошев ўтган 6 ойнинг турли саналарида шаҳар прокурорининг имзоси билан жўнатилган бир қолипдаги жавоблар билан танишиб, шаҳар прокуратураси мутасаддиларга танбеҳ берди ва белгиланган муддатда бу масалани қайтадан кўриб чиқиб, қонун доирасида ҳал қилиш вазифасини қатъий қўйди. Ишнинг бориш жараёни назоратга олинадиган бўлди.

 

Нуруллоҳ ДОСТОН,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: