Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
09.10.2018

ЎЗБЕКИСТОН — ФРАНЦИЯ: АСРИЙ ҲАМКОРЛИК ИЗИДАН

Франция билан маданий алоқалар тарихимизнинг зарли саҳифаларидан. Маълумки, буюк аждодимиз Амир Темур Франция қироли Карл IV билан ўзаро ҳамкорликка оид ёзишмалар олиб борган. ­Бугунги кунда ҳам ушбу анъаналар бардавом.

«Ўзбекистон — Франция» дўстлик жамияти раиси, Мирзо Улуғбек номидаги Ўзбекистон Миллий университети ректори Авазжон МАРАҲИМОВ ЎзА мухбири билан суҳбатда ушбу мамлакат билан маданий-гуманитар соҳадаги ҳамкорликнинг бугунги ривожи ҳақида қуйидагиларни сўзлаб берди:

— «Ўзбекистон — Франция» дўстлик жамияти ўз фаолиятини таълим, маданият, маърифат соҳаларида ҳамкорликни ривожлантириш асосида ташкил қилиб келмоқда. Хусусан, икки мамлакатнинг бой тарихи, адабий алоқалари, илм-фан соҳасидаги муносабатларини мустаҳкамлашга хизмат қилувчи қатор дастурлар ишлаб чиқилиб, муваффақиятли амалга оширилмоқда.

Илмий ҳамкорлик ҳақида сўз борганда, ўтган йили пойтахтимизда ташкил этилган «Илмий мунозара: муаммо, ечим ва ютуқ» мавзусидаги халқаро анжуман ва унинг самараларини ёдга олиш мақсадга мувофиқ. Ушбу анжуман ўзбек таржимашунослик мактаби асосчиси, адабиётшунос олим Ғайбулла ас-Салом таваллудининг 85 йиллиги муносабати билан ўтказилди. Унда иштирокчилар мамлакатимизда таржима соҳасини янада ривожлантириш, тил ўрганишнинг осон ва инновацион усулларидан фойдаланиш, маданий алоқаларни яхшилаш борасида фикр алмашдилар.

Дўстлик жамияти Франциянинг Ўзбекистондаги элчихонаси билан ҳамкорликда икки мамлакат миллий байрамларини ўтказиш, урф-одат ва анъаналарини кенг тарғиб қилиш бўйича ҳам самарали иш олиб бормоқда. Жумладан, ҳар йили 14 июлда Франция миллий байрами — Бастилия қалъаси иш­ғол қилинган кун муносабати билан Тошкентда тантанали маросим ва бадиий кечалар ташкил этилади.

Дунё миқёсида юртимизнинг бой маданияти, ранг-баранг урф-одатлари, миллий ҳунармандлигига қизиқиш катта. Шуни инобатга олган ҳолда, Францияда «Ўзбекистон маданияти» кунларини ўтказиш, юртимизнинг сайёҳлик брендини тарғиб қилишга алоҳида эътибор қаратилмоқда. Маданий тадбир доирасида Францияда мамлакатимиз ҳунармандлари, тасвирий санъат намояндалари ва ҳайкалтарошлари ижодий ишлари намойиш этиб келинмоқда.

Ҳар йили август ойи жамиятимиз учун ўзгача тантана — бадиий-адабий яқинлик руҳидаги тадбирларга бой бўлади. Ватанимизнинг Мустақиллик байрами арафасида Ўзбекистон ва Франциянинг илмий доиралари вакиллари, шоир ва ёзувчилар иштирокида бадиий кечалар уюштирилади. Тантаналарда француз ва ўзбекона миллий куй-қўшиқлар янграйди.

Жамиятимиз пойтахтимизда фаолият юритаётган «Тошкент Француз альянси» билан ҳамкорликда ҳар ойда бир марта «Француз адиблари асарлари билимдони» танловини ўтказиб келади. Шу орқали маданий-адабий ҳамкорликни давом эттириш ва француз бадиий ада­биётининг нодир намуналарини ўзбек тилига таржима қилиш учун қулай ижодий муҳит яратилади.

«Ўзбекистон — Франция» дўстлик жамиятининг фаол аъзолари Тур шаҳрида анъанавий тарзда ўтказиладиган «Тил ва маданият» фестивалида мунтазам қатнашади. Бу мамлакатларимиз дўстлик алоқалари янада мустаҳкамланиши ва халқ дипломатияси ривожида муҳим ўрин тутади.

Мухтасар айтганда, Соҳибқирон Амир Темурнинг Франция давлати билан бошлаб берган дўстлик алоқалари бугун икки мамлакат раҳбарлари ташаббуси билан юксак мақомда давом этмоқда. «Ўзбекистон — Франция» дўстлик жамияти ана шу эзгу мақсад йўлидаги хайрли ҳамкорликни мустаҳкамлаш, уни амалий мазмун билан бойитишга хизмат қилмоқда.

 

ЎзА мухбири

Дилобар МАМАТОВА

ёзиб олди.



DB query error.
Please try later.