Охирги сонда



Кўп ўқилган мақолалар



Долзарб мавзу



Мақолалар архиви

«    Mart 2019   
Du Se Cho Pa Ju Sha Ya
25 26 27 28 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31
19.07.2018

ЧИҚИНДИЛАР НЕГА ОЛИБ КЕТИЛМАЯПТИ, ЖАНОБ СЕКТОР РАҲБАРИ, ҚАЕРДАСИЗ

Ёзнинг жазирамасида чиқиндилардан келаётган ҳидга чидаб бўлмаяпти.

Бу ҳақда кимга мурожаат қилмайлик, ижобий натижа бўлмаяпти. Чиқиндихона атрофи қаровсиз қолган ит-мушуклар билан тўлган. Энг ёмони, турли зарарли ҳашаротлар ҳам уйимизга кирмоқда. Бу ҳолат шундайлигича қолса, фарзандларимиз турли касалликларга чалиниши мумкинлиги бизни қаттиқ ташвишлантирмоқда.


Кармана туманида кейинги йилларда қатор саноат корхоналари ишга туширилди. Аҳоли сони ҳам йил сайин ошиб бормоқда. Табиийки, аҳоли ва саноат корхоналари томонидан кунига тонналаб чиқиндилар чиқарилмоқда. Уларни ўз вақтида ташиб кетиш муҳим масалалардан бири.

Аммо тумандаги айрим маҳаллаларда бу борада бир қатор ­муаммолар тўпланиб қолган. Бу эса одамларнинг кайфиятига салбий таъсир кўрсатмоқда.

2018 йил 11 июль куни Навоий вилоят Экология ва атроф-муҳитни муҳофаза қилиш бошқармасининг Чиқиндилар билан боғлиқ ишларни назорат қилиш инспекцияси масъул ходимлари билан тумандаги баъзи маҳаллалардаги ҳолатларни ўргандик.

 «Ўзбекистон» маҳалла фуқаролар йиғини ҳудудида йиғилиб қолган маиший чиқиндилар ўз вақтида олиб чиқиб кетилмаган. Аҳоли бугунги кунда чиқиндиларни олиб чиқиб кетиш учун «Бережливость» хусусий ишлаб чиқариш корхонаси билан шартнома тузган бўлса-да, чиқиндилар ўз вақтида ташиб кетилмаяпти.

Намунали уйлар қаршисидаги бундай ҳолатларга маҳалла фуқаролар йиғини раиси Баҳодир ­Акатов шундай изоҳ беради:

— Биз корхона раҳбарига бир неча маротаба оғзаки ва ёзма тарзда мурожаат қилдик. Аммо ҳеч қандай натижа бўлмаяпти. Аҳоли жон бошига 2200 сўмдан тўловлар амалга оширилаяпти. Лекин корхонада автомашиналарнинг етишмаслиги сабабли чиқиндилар ҳафталаб, ҳаттоки ўн кунлаб қолиб кетмоқда.

Бундай ҳолатларни туманнинг «Боғишамол», «Бешкент», «Талқоқ» маҳалла фуқаролар йиғини ҳудудларида ҳам кўриш мумкин. Об-ҳавонинг иссиқ кунларида тоғдек уюлиб ётган ушбу чиқиндилар турли юқумли касалликларни келтириб чиқармаслигига ҳеч ким кафолат бера олмайди.

— Ёзнинг жазирамасида чиқиндилардан келаётган бадбўй ҳидга чидаб бўлмаяпти, — дейди Замира Мирзаева. — Бу ҳақда кимга мурожаат қилмайлик, ижобий натижа бўлмаяпти. Чиқиндихона атрофи қаровсиз қолган ит-мушуклар билан тўлган. Энг ёмони, турли зарарли ҳашаротлар ҳам уйимизга кирмоқда. Бу ҳолат шундайлигича қолса, фарзандларимиз турли касалликларга чалиниши мумкинлиги бизни қаттиқ ташвишлантирмоқда.

Энг ачинарли ҳолат, туман марказидаги «Бешкент» МФЙ ҳудудида чиқиндилар ҳафтада бир марта олиб чиқиб кетилар экан. Ваҳоланки, чиқинди йиғиш шохобчасидаги мавжуд 3 дона контейнер бир куннинг ўзидаёқ чиқинди билан тўлиб қоларкан. Қолган 6 кун давомида аҳвол нима бўлишини тасаввур қилиб кўринг?.. Чиқинди йиғиш шохобчаси қаровсиз қолганлиги натижасида ҳаттоки деворлари нураб қолиш даражасига келган. Шохобчада иккиламчи хомашё чиқиндилари (қоғоз, металл парчалари, пластмасса ва бошқалар)ни саралаш ишлари умуман олиб борилмайди. Чиқиндилар ўз вақтида олиб кетилмаганлиги сабабли улар ён-атрофга ёйилиб кетган. Қаровсиз ит-мушуклар эса ушбу чиқиндихонани ўзларига «макон» тутишган. Шу атрофда ўтлаб юрган қўй-қўзилар ҳам ушбу чиқиндихонани ҳеч бўлмаганда бир марта «титкилаб» кўради. Шамол турса, чиқиндилар ён-атрофга сочилиб кетади, бадбўй ҳид ёйилади.

— Мазкур ҳолатлар бўйича «Бережливость» хусусий корхонаси раҳбарига икки ойдан буён огоҳлантириш хати юбормоқдамиз, — дейди Навоий вилоят Экология ва атроф-муҳитни муҳофаза қилиш бошқармасининг Чиқиндилар билан боғлиқ ишларни назорат қилиш инспекцияси бош мутахассиси Жасур Абсолиев. — Ҳолат шу тарзда давом этса, мазкур маҳаллалар фуқаролари билан корхона ўртасида тузилган шартнома бекор қилинади.

Шу ўринда саволлар туғилади:

Чиқиндиларни олиб чиқиб кетиш ишлари билан шуғулланувчи «Бережливость» хусусий ишлаб чиқариш корхонаси мутасаддилари нега бу ҳолатга бефарқ қарамоқда?

Техникалари етишмаса, нега чора кўришмайди, нега аҳоли билан шартнома тузади? Ҳудудларни ижтимоий-иқтисодий ривожлантиришга масъул бўлган сектор раҳбарлари бу ҳолатдан бехабарми?! Йўқ, албатта, кўриб, билиб туришибди. Унда нега ўз вазифаларини бажаришмаяпти?..

Ўйлаймизки, сектор раҳбарлари бу саволларга жавоб топишади ва одамларни безовта қилиб келаётган муаммони ҳал этишади.

 

Илҳом САТТОРОВ,

«Ўзбекистон овози» мухбири.



DB query error.
Please try later.