10.07.2018

ҚИШЛОҚ ОБОД БЎЛСА, КЎНГИЛ ҲАМ ОБОД БЎЛАДИ

Дилором АБДУРАҲИМОВА, Наманган вилоят Кенгашидаги ЎзХДП гуруҳи раҳбари:

— «Обод қишлоқ» дастури тўғрисидаги Президент фармони соҳада амалга оширилаётган ислоҳотларга янгича суръат ва сифат бағишлади. Айниқса, дастурни 2018 йилда амалга ошириш бўйича қўшимча чора-тадбирлар тўғрисидаги қарор қишлоқларимизда аҳоли турмушини янада юксалтириш йўлидаги муҳим ҳужжатлардан бири бўлди.

Кўз олдимизга келтириб кўрайлик, бир пайтлар қишлоқда нима бор эди?.. Колхознинг идораси, яна мактаб, агар бўлса, болалар боғчаси бўларди. Улар қишлоқлардаги энг муҳташам бино ҳисобланарди. Озиқ-овқат ва саноат моллари аралаш сотиладиган «Сельмаг» ҳам кўзимизга маҳобатли кўринарди.

Бугунчи?.. Бугун энг олис қишлоқларгача замонавий саноат корхоналари кириб бораяпти. Ижтимоий инфратузилма ривожланиб, шаҳармонанд даҳалар, замонавий инфратузилмани мужассам этган обод гузарлар барпо этилмоқда, аҳолининг турмуш маданияти, фаровонлиги кун сайин ўсаяпти.

Наманган вилоятида ҳам «Обод қишлоқ» дастури ижросини таъминлашга қизғин киришилди. Вилоят ҳудудидаги қишлоқлардаги маҳалла ва хонадонларга кириб бориш орқали аҳоли билан мулоқотлар ўтказилди. Ҳар бир тумандан иккитадан инфратузилмалари эскирган ва яроқсиз аҳволга келиб қолган жами 22 қишлоқ дастурга киритилди.

Жорий йилда Мингбулоқ туманининг Мулкобод ва Кичик Жомашўй, Косонсойнинг Ширинбулоқ ва Қорасув, Наманган туманининг Шамсикўл ва Шўрқўрғон, Нориннинг Қоратери ва Қўшчек, Попнинг Кенагас ва Ғурумсарой, Тўрақўрғоннинг Оқтош ва Гулистон, Уйчининг Мевазор ва Хўжаобод, Учқўр­ғоннинг Гулистон ва Қўғай, Чортоқнинг Алихон ва Ободдиёр, Чустнинг Лайлакуя ва Шербулоқ, Янги­қўрғон туманининг Бўстон ва Қизилёзи каби қишлоқлари обод қишлоққа айлантириладиган бўлди.

Дастурга киритилган қишлоқларда ички ва хўжалик йўлларини, коммунал хизмат кўрсатиш тармоқларини таъмирлаш, ижтимоий инфратузилма объект­ларини қуриш ишлари олиб борилади. Ичимлик суви таъминотини яхшилаш, бозор инфратузилма объект­ларини қуриш ва бошқа бунёдкорлик ҳамда ободонлаштириш ишлари амалга оширилади. Дастлабки ҳисоб-китобларга кўра, бу мақсадларга 127 миллиард сўмдан зиёд маблағ сарфланиши кўзда тутилмоқда.

«Обод қишлоқ» дастури доирасида вилоятда биринчи киришилган лойиҳа бугун якунланиш арафасида. Уйчи туманининг Мевазор маҳалласи бир вақт­лар чиндан ҳам обод эди. 1000 нафардан зиёд киши истиқомат қиладиган бу маҳаллада собиқ паррандачилик фабрикаси ишчилари учун 1980 йилларда қурилган 5 та икки қаватли уй мавжуд.

Ўтган давр мобайнида кўп қаватли уйларга коммунал хизматлар кўрсатиш тизими издан чиқди. Негаки, хонадонларнинг эгаси бор, уйлар эса ҳеч кимники эмас. Бино нураб-тўкилиб, маиший-коммунал, санитария тармоқлари йўқ бўлиб кетган. Бу ерда яшовчиларнинг кундалик турмуш шароити ниҳоятда оғир даражага етганди. Кўпчилик ўз ҳолича ҳовлига ҳожатхона, молхона ва бошқа ёрдамчи хўжалик иншоотлари қуриб олгани ҳам рост. Натижада жуда хунук манзара ва антисанитария муҳити пайдо бўлганди. Энг ёмони, ҳудудда яшовчилар шунга ўрганиб қолаётганди. Дастур асосида амалга оширилган ишлар натижасида бугун маҳалла бутунлай янгича қиёфа касб этди. Маиший шарт-шароитлар яхшиланди. Бу, албатта, маҳалла аҳли онг-тафаккурига ҳам ижобий таъсир қилишига шубҳа йўқ.

Бугунгача кўп қаватли уйларнинг томи шиферланиб, кириш эшиклари алмаштирилди. Ҳудудга ичимлик суви тармоғи тортилди. Ҳовли атрофи девор билан ўралди. Маҳаллий эҳтиёждан келиб чиқиб, ҳовлида тандирхона ва бошқа умумфойдаланиш учун маиший-хўжалик қурилмалари барпо этилди. Уйлар ўртасидаги майдонларга 200 тупдан зиёд манзарали ва мевали кўчат, турли гуллар экилиб, боғ ва гулзорлар ташкил қилинди. Айни пайтда биноларнинг фасад қисмида пардозлаш ишлари давом этмоқда.

Президентимизнинг вилоятимизга ташрифларидан сўнг лойиҳа кўлами янада кенгайди. Умумий ишлар ҳажми 7 миллиард сўмдан зиёд бўлиши кўзда тутилмоқда. Ҳудуддаги 15-умумтаълим мактаби, 39-мактабгача таълим муассасаси тубдан таъмирланади. Канализация тармоғи тортилади, тўрт километрдан кўпроқ йўлга асфальт босилади. Шу мақсадда бугун биргина қурилиш-ободонлаштириш ишларида 100 нафардан ортиқ киши ишламоқда

Шундай объектлардан яна бири — Тўрақўрғон туманидаги «Оқтош» қишлоғининг «Оқтош» маҳалласидир. Маҳаллада дастур асосида яқиндагина бошланган бунёдкорлик ишлари кун сайин юқори ­сур­ъат касб этмоқда. «Обод қишлоқ» дастурига мувофиқ Оқтошда ҳам ишлар эътиборга муҳтож уйларни ­таъмирлашдан бошланди. Кўп қаватли уйларнинг томи ва фасадини реконструкция қилиш, канализация тармоғи тортиш, ёрдамчи маиший-хўжалик бинолари ва болалар майдончаси қуриш, ҳовли атрофини 6,2 километрдан зиёд девор билан ихоталаш режалаштирилган.

Бундан ташқари, маҳалладаги Бобур, Осойишта, Навоий кўчаларидаги 549 ҳовли-хонадонда қурилиш-таъмирлаш ишлари амалга оширилади. Айни пайтда ушбу объектда 4000 дан зиёд киши меҳнат қилмоқда.

Дастур бўйича қишлоқда 250 ўринли боғча қуриб берилиши оқтошликларнинг қувончига қувонч қўшганини МФЙ раиси Валижон Сатторовдан эшитиб, уни табрикладик. Чунки бугун ўсиб келаётган ёш авлод тарбияси энг долзарб масаладир.

Дастурий мақсадлардан келиб чиқиб, биз, маҳаллий Кенгашлар депутатлари ҳам тарғибот ишлари олиб бормоқдамиз. Қишлоқларнинг меъморий қиёфасини тубдан янгилаш, йўл-транспорт, муҳандислик-коммуникация инфратузилмаси ҳамда ижтимоий соҳа объектларини барпо этишдан мақсад — аҳолининг турмуш маданиятини юксалтириш ва айни вақтда дунёқарашини кенгайтириш. Бу хайрли ишлар қишлоқ кишиларини боқимандалик кайфиятидан чиқариши зарур. Бизга кимдир келиб қилиб беради, давлатимиз ижтимоий ёрдамини аямайди, деб қараб туриш ярамайди. Энди ҳар биримиз тараққиётга дахлдорлик ва масъуллик ҳисси билан яшашимиз, яратувчанликни касб этишимиз лозим, деб ўйлайман.



DB query error.
Please try later.