30.11.2017

ОДАМЛАР ОРАСИДА

бўлиб, таклифлар ва ҳақиқий аҳвол ўрганилмоқда

«Меҳнатга лаёқатли кам таъминланган аҳолининг бандлиги: соҳада амалга оширилаётган ишлар, муаммолар ҳамда уларнинг ечими». Ўзбекистон ХДП Марказий Кенгаши ҳамда Тошкент вилоят кенгаши томонидан ўтказиладиган тадбир мавзусини эшитиб, тўғриси, бир залда, маърузалар асосида ўтадиган одатий йиғилишни тасаввур қилгандим. Зангиота туманидаги хонадонларга кириб борганимиздан кейин фикрим ўзгарди.

Дастлаб Далгузар маҳалласидаги Абзаловлар хонадонига бордик. Оила аъзолари Ҳасан Абзалов ҳамда Дилдора ­Салимова бизни мамнуният билан кутиб олди. Бир нафар қизига ҳаётда ҳамроҳ бўлсин, деб ўғил асраб олган бу инсонларнинг жасорати кишини ҳайратлантиради.

Абзаловлар оиласи «Савдогарбанк» туман филиали томонидан ажратилган 8 миллион сўм кредит эвазига икки бош қорамол олибди. Биз билан суҳбатда бўлган қўшни аёл Инобат Тўлаганова ҳам кредит эвазига оёққа туриб, кам таъминланган оилалар рўйхатидан чиқарилибди.

— Биз 30 йилдан бери қўшнимиз. Бир кўчада аҳил-иноқ яшаб келяпмиз, — дейди Инобат Тўлаганова. — Дилдора опа келин бўлиб тушганида кўзлари заиф кўрарди. Йиллар ўтиб, умуман кўрмай қолди. Уларнинг қизи 25 ёшда, ўғли эса коллежда ўқийди. Бу оиланинг аҳиллиги мақтовга лойиқ. Тўй-маросимларимизда бирга бўлишади, қўлларидан келганча кўмаклашишади. Маҳалламиз яқинда уларга новвойхона қуриб берди. У ердан тушадиган ижара тўлови оилани тебратишга сарфланади. Бундан таш­қари, маҳалладошлар ҳашар йўли билан янги ошхона кўтаришди. Ҳамма уларнинг ҳолидан хабар олишга ҳаракат қилади.

Яна бир неча хонадонда бўлдик. Одамларнинг турмуш тарзи билан танишдик. Тақдир синовларига қарамасдан интилишдан, ҳаётни севишдан тўхтамаган ҳамюртларимизнинг орзу истакларини ўргандик.

Шундан кейин семинар ўтказиладиган жойга келдик. У ерда йиғилганларнинг аксариятини хотин-қизлар ҳамда коллеж битирувчилари ташкил қилар эди.

Вилоят партия кенгаши раиси Меҳрож Дархонов семинарнинг аҳамияти хусусида гапирди. Юртимизда олиб борилаётган ислоҳотлар мазмун-моҳиятига кўра, партиямиз дастурий мақсадларига ҳамоҳанг эканини таъкидлади. Ўз ишини очиш ­истагида бўлган эҳтиёжманд аҳоли вакиллари учун қулай имкониятлар яратилгани, имтиёзли кредитлар ажратилаётгани ҳақида атрофлича маълумот берди.

— Бугун биз сизларни тинглашга, сизлар билан очиқ мулоқот ўтказишга келдик, — деди ЎзХДП Марказий Кенгаши бўлим мудири Боймурод Юсупов. — Тақдир тақозоси билан ёрдамга эҳтиёжманд кишилар, оилалар, таъминланган оилалар доим бўлган. Бизнинг мақсадимиз ҳам, вазифамиз ҳам уларни фаол ҳаётга қайтариш, одамларни боқимандалик кайфиятидан чиқаришдан иборат. Ҳаётимизни яхшилаш учун барчамиз биргаликда ҳаракат қилишимиз зарур.

Семинарда «Микрокредитбанк» АТБ ходимлари ҳам иштирок этди. Улар тизимда яратилган қулайликлар, коллеж битирувчилари, кам таъминланган оилалар ҳамда оилавий бизнесни очиш учун бериладиган имтиёзли кредитлар, уларнинг йиллик фоиз ставкалари ҳақида батафсил сўз юритишди.

Семинарнинг иккинчи қисми савол-жавоблар ҳамда муҳокамаларга бағишланди. Унда фуқаролар ўзларини ўйлантираётган турли мавзуларда саволлар беришди.

 

Ҳожиакбар НИҒМАТОВ, коллеж битирувчиси:

 — Мен келажакда чорвачилик билан шуғулланмоқчиман, қорамол боқмоқчиман. Аҳолига сифатли ва арзон гўшт етказиб беришни ният қилганман. Шу ишни бошласам, неча фоизлик кредит олишим мумкин ва қанча миқдорда солиқ тўлайман?

 

Ирода ҚОСИМОВА, «Микрокредитбанк» АТБ Республика бошқармаси бош мутахассиси:

— Касб-ҳунар коллежлари битирувчилари Марказий банк­нинг қайта молиялаш ставкаси билан 14 фоизлик, 36 ой муддатга кредитлар олиши мумкин. Янги иш бошлайдиган битирувчилар бир йил давомида солиқдан озод қилинади.

 

Муҳиддин ЭЛМУРОДОВ, коллеж битирувчиси:

— Мен ҳам қорамолчилик билан шуғулланмоқчиман. Фақат кредит маблағи қўлимизга берилишини хоҳлардим. Чунки агрофирмалар 5,5 миллион сўмга берадиган қорамолни бозордан 3,5 миллионга сотиб олиш мумкин...

 

Ашур ҚОДИРОВ, «Микрокредитбанк» АТБ Тошкент вилоят филиали масъул­ ходими:

— Бундай турдаги кредит маблағлари мақсадли сарфланиши учун агрофирмалар ҳисоб рақамига ўтказиб берилади. Сиз айтаётган масала эса депутатлар томонидан ўрганилиши ва таклиф берилиши керак, деб ўйлайман...

Тадбирда жисмоний имконияти чекланганларни иш билан таъминлаш, ёлғиз аёллар, боқувчисини йўқотган кесксаларнинг ижтимоий ҳимоясига оид саволларга ҳам мутахассислар томонидан жавоб берилди.

Шу куни турли масалалар бўйича фуқароларнинг мурожаатлари тингланди. Масалан, Меҳри Салимова икки нафар набирасига фуқаролик паспорти ололмаётганини айтди. Бунга сабаб қизи келин бўлиб тушган хонадон қўшимча тўловлардан халос бўлиш учун уни яшаш жойига рўйхатга қўймаган экан. Турмуш ўртоғи оламдан ўтгач, қайнонаси келини ва набираларини сиғдирмаган. Натижада ҳеч қаерда рўйхатдан ўтмаган икки нафар қиз паспортсиз қоляпти. Шу масалада депутатлардан ёрдам сўради.

Шунингдек, уй-жой қурилиши масаласида, битирувчиларнинг 4 томонлама шартномаси бажарилмагани бўйича, коммунал тўловлар ва яна бош­қа муаммолар юзасидан мурожаатлар ёзиб олинди. Уларга ечим топиш учун тегишли ташкилотлар билан ҳамкорлик қилинадиган бўлди.

Бу каби тадбирлар Тошкент вилоятининг барча шаҳар ва туманларида бўлиб ўтмоқда.

 

Зилола УБАЙДУЛЛАЕВА,

«Ўзбекистон овози» мухбири.



DB query error.
Please try later.