29.04.2017

ЖИЗЗАХ НЕФТНИ ҚАЙТА ИШЛАШ МАЖМУАСИ ХАЛҚИМИЗ ФАРОВОНЛИГИНИ ЮКСАЛТИРИШГА ХИЗМАТ ҚИЛАДИ

Аввал хабар қилинганидек, Президентимиз Шавкат Мирзиёевнинг Жиззах вилоятига ташрифи чоғида Зафаробод туманида нефтни қайта ишлаш мажмуаси қурилишига тамал тоши қўйилди.

Шу муносабат билан ўтказилган тантанали маросимда Жиззах вилояти фаоллари, нефть-газ саноати вакиллари, қурувчи ва муҳандислар иштирок этди. ЎзА мухбири улардан айримларининг таассуротларини ёзиб олди.

Баҳодир СИДДИҚОВ, «Ўзбекнефтгаз» Миллий холдинг компанияси бошқарма бошлиғи ўринбосари, «Нефтгазинвест» масъулияти чекланган жамияти директори:

— Мустақиллик йилларида нефть-газ саноати мамлакатимиз иқтисодиётининг етакчи тармоқларидан бирига айланди. Биринчи Президентимиз Ислом Каримов раҳнамолигида Бухоро нефтни қайта ишлаш заводи, Муборак газни қайта ишлаш заводи, Шўртан газ-кимё мажмуаси, Устюрт газ-кимё мажмуаси каби йирик корхоналар ташкил этилди, мавжудлари модернизация қилинди. Россия, Хитой, Жанубий Корея, АҚШ, Малайзия ва бошқа давлатлар билан ўзаро манфаатли ҳамкорлик йўлга қўйилди.

Давлатимиз раҳбари мажмуа қурилишининг бошланишига бағишланган маросимда бу корхонанинг аҳамияти, иқтисодий самарадорлигини тушунтириб берди. Масалан, нефтни транспорт орқали ташиб келиш катта харажат талаб этади. Бу бензин, керосин, резина, мой, битум каби иқтисодиёт учун зарур маҳсулотлар, бунга боғлиқ бўлган товар ва хизматлар нархининг ошишига сабаб бўлади.

Жиззах нефтни қайта ишлаш мажмуасининг афзаллиги шундаки, унга хомашё қувур билан олиб келинади. Маълумки, бугунги кунда Омск-Павлодар-Чимкент нефть қувури мавжуд ва унинг бир тармоғи Жиззах вилоятига яқин ерга келган. Шу жойдан атиги 95 километр қувур тортиш орқали янги мажмуа арзон хомашё билан таъминланади.

Яна бир аҳамиятли томони бу — корхонада ишлаб чиқариладиган маҳсулотлар. Лойиҳага кўра, мажмуада йилига 5 миллион тонна хомашёни қайта ишлаш орқали Евро-5 стандартидаги 3 миллион 700 минг тонна мотор ёқилғиси, 700 минг тоннадан зиёд авиация керосини, бундан ташқари, суюлтирилган газ, бензол, мазут, битум каби маҳсулотлар ишлаб чиқарилади.

Авиация керосини ҳам мамлакатимиз иқтисодиёти учун жуда фойдали. Бу Ўзбекистон самолётларининг парвоз географиясини кенгайтириш билан бирга хорижий авиакомпанияларга хизмат кўрсатиш ҳажмини ҳам оширишга асос бўлади. Масалан, Жанубий Корея ёки Хитойдан Европага юк ташийдиган самолётлар ёқилғи ўрнига кўпроқ маҳсулот ортиб, Ўзбекистондан ёқилғи қуйиб ўтса, катта фойда кўради. Йўловчи ва юк самолётларимиз рейслари кўпайиши савдо-иқтисодий алоқалар, туризм ривожида муҳим ўрин тутади.

Мажмуа учун жуда қулай ҳудуд танланган. Жиззах вилояти мамлакатимизнинг ўртасида жойлашган, экспорт режалаштирилаётган қўшни давлатлар ҳам бир қадам. Бу корхона маҳсулотларини барча ҳудудларимизга ва экс­портга минимал харажатлар билан етказиш имконини беради. Бу ерга яқин жойда Жиззах цемент заводи бор. Инфратузилма объектларини қуришга кўп вақт ва маблағ кетмайди. Ҳамкорларимиз ва мутахассисларимиз билан бирга ушбу йирик мажмуани ўз вақтида қуриб, фойдаланишга топширамиз. Норқул НУШАРОВ, «Нуроний» жамғармаси Жиззах вилояти бўлими раиси:

— Вилоятимизга Президентимиз ташриф буюриб, Зафаробод туманида улкан корхона қурилишини бошлаб бергани қувончли воқеа бўлди.

Бундай пайтларда беихтиёр ўтган йиллар ёдимизга тушади. Собиқ тузум давридаги пахта яккаҳокимлиги оқибатида Жиззахда ҳам аҳвол оғирлашиб қолган, 90-йиллар бошида ҳам унинг таъсири йўқолмаган эди. Қишлоқ ҳўжалиги бутунлай издан чиққан, ҳосилдорлик ўта пасайиб кетганди. Ишлаб чиқариш ҳақида гапирмаса ҳам бўлади. Пахта заводларидан бошқа корхона йўқ эди. Завод деса ҳамма шуни тушунарди.

Шавкат Мирзиёев вилоятимизга раҳбар бўлиб келиб Биринчи Президентимиз раҳнамолигида жуда улкан ишларни амалга оширди. Ҳар бир соҳанинг ичига кирди, фермерлар, зиёлилар, оддий одамлар билан суҳбатлашди. Барча муаммоларга бирин-кетин ечим топди, одамларнинг дунёқарашини ўзгартирди. Халқ билан мулоқот қилиш, одамлар дарди билан яшаш Президентимизнинг доимий шиори, талаби бўлган.

Аста-секин вилоятимизнинг иқтисодиёти ўнгланди. Пахта, ғалла режалари бажарилди, Жиззах аккумулятор заводига ўхшаш ишлаб чиқариш корхоналари пайдо бўлди.

Ўшандан буён вилоятимиз изчил ривожланиб, мана бугунгидай байрамларга етиб келдик. Бу мажмуанинг қурилишини эшитиб, ҳаммамиз хурсанд бўлдик. Вилоятимиз янада ривожланади, маҳаллий бюджет мустаҳкамланади, ёшларимиз ишли бўлади. Қаранг, бу заводда 2 мингдан зиёд, соҳага алоқадор ва хизмат кўрсатиш тармоқларида яна 14 мингдан ортиқ киши иш билан таъминланар экан. Бундан қувонмай бўладими?!

Бундай улкан воқеалар, мамлакатимиздаги ўзгаришлар биз, нуронийларга ҳам алоҳида масъулият юклайди. Катта ҳаёт тажрибасига эга бўлган меҳнат фахрийлари Президентимизга елкадош бўлишимиз, ҳар томонлама кўмак беришимиз керак.

 

ЎзА мухбири

Анвар САМАДОВ

ёзиб олди.



DB query error.
Please try later.