Охирги сонда



Кўп ўқилган мақолалар



Долзарб мавзу



Мақолалар архиви

«    Oktabr 2019   
Du Se Cho Pa Ju Sha Ya
30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3
25.06.2019

ПАРЛАМЕНТНИНГ ТАЪСИР КУЧИ ОШМАСА, ТАРАҚҚИЁТ БЎЛИШИ ҚИЙИН

Ўзбекистон ривожланишнинг янги босқичига кўтарилмоқда. Барчамиз бунга гувоҳмиз ва шу жараёнда иштирок этмоқдамиз. Ислоҳотларнинг қанчалик ижобий натижа бериши раҳбарларнинг тажрибаси, ўзига юклатилган вазифани теран англаши, замонавий бошқарув илмидан хабардорлигига боғлиқ, албатта.

Мақсуда ВОРИСОВА, Олий Мажлис Сенати аъзоси, Ўзбекистон ХДП Марказий Кенгаши раиси ўринбосари:

— Мамлакат Президенти Олий Мажлис Сенатининг ялпи мажлисида халқ ноибларига мурожаат қилар экан, жамиятнинг ҳар бир соҳасидаги ҳолатни танқидий таҳлил қилди. Халқ вакиллари — депутат ва сенаторларнинг ўрни ва вазифалари ҳақида чуқур фикрлар билдирилди.

Ҳудудларни ижтимоий ва иқтисодий ривожлантириш бўйича тузилган «йўл хариталари»да белгиланган вазифалар, қонунлар ижроси назорати, халқни қийнаб турган муаммолар депутат ва сенаторларнинг кундалик масъулиятига айланиши керак. Масалан, маҳаллий бюджетни шакллантириш ва тўғри сарфланишини таъминлаш масалаларини ижро органларига етказиш ҳам муҳим ҳисобланади. Ҳудудлардаги ижро органлари раҳбарлари ўз соҳалари бўйича сидқидилдан меҳнат қилса, иқтисодий барқарорликка эришиш ва ижтимоий ривожланишни амалга ошириш мумкин. Бунинг учун парламент катта таъсир кучига эга бўлиши лозим.

Жамиятимизда депутатларнинг ўрни кучайиб борар экан, сиёсий партияларнинг ҳам масъулияти ошиб бориши, миллий парламентаризм талаблари кучайиши табиий ҳолатдир.

Жамиятимизнинг турли соҳаларидаги ислоҳотлар натижасида эришилган ютуқларни эътироф этган ҳолда, жамиятни янада демократлаштириш, бошқарувни такомиллаштириш масаласи долзарблигича қолаётганини таъкидлаш жоиз. Яъни жамиятнинг ривожида ва уни бошқаришда сиёсий партиялар ролини ошириш лозим.

 Маълумки, сиёсий партияларнинг жамият ҳаётидаги аҳамияти ўсиши уларнинг сиёсий куч сифатида майдонга чиқа олиш имкони бор-йўқлиги билан белгиланади.

Демократия ривожланишидаги яна бир йўналиш сиёсий кучлар ўртасида ҳокимиятни қўлга киритишда бўладиган курашлар билан боғлиқдир. Сиёсий партиялар ўртасида ҳокимият учун бўладиган курашдаги бош йўналиш қайси партия умумий тараққиётга қандай ҳисса қўша олади, оддий фуқаро ҳаётининг яхшиланишига қаратилган қандай аниқ дастурга эга, уни амалга ошириш имкониятлари борми, деган саволлар асосида аниқланади. Албатта, бу саволларга жавоб бериш осон эмас. Жамият муаммоларини яхши биладиган, фуқаро қалбига йўл топа оладиган сиёсий партиягина бундай шарафли имкониятни қўлга киритиши мумкин.

Президентимиз нутқларининг катта қисми жамиятда аёлларнинг ўрни ва мавқеини кўтариш масаласига қаратилди.

Тарихий манбалардан маълумки, аёлларни эъзозлаш халқимизга хос хусусият бўлиб, шарқона қадрият даражасига кўтарилган.

Лекин жамият ривожининг турли босқичларида аёлларга хилма-хил муносабат билдирилган. Жамиятимиз аъзоларининг ярмидан кўпроғини ташкил этадиган аёлларимиз бугунги кунда раҳбарлик лавозимларида, жумладан, парламентда озчиликни ташкил этади. БМТ бош котиби Антонио Гутерришнинг аёллар ҳақида айтган қуйидаги фикри муҳим хулосалар учун асос бўлади: «Қаердаки сиёсий ва ижтимоий ҳаётда хотин-қизлар фаол иштирок этаётган бўлса, ўша жойда иқтисодиёт ўсмоқда, барқарорлик мустаҳкамланмоқда ва фуқароларнинг фаровонлиги юксалмоқда».

Жамиятда йиллар давомида тўпланиб қолган ижтимоий муаммолар, айниқса, аёллар муаммоларига ечим топиш учун парламентнинг ҳар икки палатасида аёллар ва гендер тенглик масалалари бўйича қўмита ташкил этиш таклиф этилди. Сенат раислигига аёл киши номзоди илгари сурилиши хотин-қизларга эҳтиром ва юксак ишонч намунаси, деб қабул қилинди.

Умуман, Президентнинг Сенат мажлисидаги нутқи парламентга йўлланган Мурожаатноманинг узвий давоми бўлгани, халқ ноиблари олдида турган ўта долзарб вазифаларни белгилаб бергани билан қадрли ва аҳамиятлидир. 


Фикр ва мулохазалар

Защита от автоматических сообщений

Сўнгги янгиликлар: