13.11.2018

СИФАТЛИ ТИББИЙ ХИЗМАТСИЗ ОДАМЛАРНИ РОЗИ ҚИЛИБ БЎЛМАЙДИ

Баҳром ОБИДЖОНОВ, Олий Мажлис Қонунчилик палатасидаги Ўзбекистон ХДП фракцияси аъзоси:

— Тиббиётда тўғри ташхис ярим даъво саналади. Шундан келиб чиқиб, ҳар бир тиббиёт муассасасида беморларга тўғри ташхис қўйиб, даволай оладиган малакали мутахассислар, асбоб-ускуналар, энг муҳими, тартиб-интизом бўлиши зарур. Бироқ соҳадаги ислоҳотларга қарамай, эскича ишлаш усулидан воз кечмаётган, ташхис қўйиш ва даволашнинг замонавий усулларини амалиётга жорий эта олмаётган муассасалар ҳам йўқ эмас.

Ўтган ҳафтада давлатимиз раҳбари раислигида соғлиқни сақлаш тизимини ривожлантириш, ҳудудлар аҳолисини сифатли тиббий хизмат билан қамраб олиш, тиббиёт муассасалари моддий-техник базасини мустаҳкамлаш борасидаги ислоҳотлар натижаларини таҳлил қилиш ва истиқболдаги устувор вазифаларни белгилашга бағишланган видеоселектор йиғилишида ана шундай ўткир муаммолар ҳақида сўз борди. Мамлакатимизда амалга оширилаётган ислоҳотлардан асосий мақсад одамлар ҳаётини яхшилаш экани, сифатли тиббий хизмат бу борада муҳим ўрин тутиши алоҳида таъкидланиб, соҳа ходимлари олдида турган устувор вазифалар кўрсатиб ўтилди.

Қайд этилганидек, кейинги икки йил ичида Президентнинг соҳага оид 50 та фармон, қарор ва фармойишлари, ҳукуматнинг 70 дан зиёд қарор ва фармойишлари қабул қилинди. 6 та янги илмий-амалий тиббиёт маркази ташкил этилди. Аҳолига янада қулайлик яратиш мақсадида ҳудудларда уларнинг 10 та филиали иш бошлади. Туман ва шаҳар шифохоналарида 306 янги ихтисослашган бўлим, 1200 тез тиббий ёрдам шохобчаси очилди. Эътиборлиси, бу йил тиббиёт соҳасига давлат бюджетидан 2017 йилга нисбатан 40 фоиз кўп маблағ ажратилди. Президент қарорига мувофиқ, тиббиёт ходимларининг ойлиги сезиларли даражада ошириляпти. Бу эса шифокор меҳнатига эътиборнинг янада ортаётганидан далолатдир.

Хўш, мамлакатимиз соғлиқни сақлаш тизими ушбу ислоҳотларга ҳамоҳанг равишда ижобий томонга ўзгардими? Бу саволга «ҳа», деб жавоб бериш мушкул. Айниқса, туманлар, чекка қишлоқларда кўрсатилаётган тиббий хизматда ўзгариш деярли сезилаётгани йўқ. Аҳолидан бўлаётган мурожаатлар эса ҳали қилиниши керак бўлган ишларнинг кўплигини кўрсатяпти?..

Афсуски, чекка туманлардаги марказий шифохоналар ва поликлиникаларнинг моддий-техник базаси, малакали кадрлар билан таъминланиш даражаси ҳануз талабга жавоб бермайди. Бирор жойингиз оғриб, туман шифохоналарига борсангиз, кўнгилдагидек тиббий ёрдам ололмайсиз. Айрим жойларда ташхис қўядиган ускуналар йўқ бўлса, айрим пайтларда шифокорларнинг малакаси етишмайди. Натижада хасталанган одам ўз туманида даво топа олмай, катта маблағ сарфлаб, вилоят марказига, пойтахтимиздаги тиббиёт муассасаларига келишга ёки чет элга кетишга мажбур бўлмоқда.

Шу боис йиғилишда тизимдаги муаммоларни вақтида аниқлаш ва ҳал этиш, ҳудудлардаги ҳолатни тўлиқ қайта ўрганиб чиқиш, қишлоқ врачлик пунктлари, оилавий поликлиникалардан тортиб марказий тиббиёт муассасаларигача тўлиқ қамраб олиш кераклиги алоҳида таъкидланди.

Биз, Олий Мажлис Қонунчилик палатаси депутатлари ҳудудларда сайловчилар билан ўтказилаётган учрашувларда аҳоли фикр-мулоҳазаларини, таклифларини эшитяпмиз. Уларнинг мурожаатлари асосида камчиликларни бартараф этиш чоралари кўрилмоқда. Бироқ ҳар бир масъул шахс ўзини ўзи ўзгартирмас, ишини танқидий баҳолаб, вазифасига виждонан ёндашмас экан, муаммонинг илдизига етиб бўлмайди. Касалликларни даволаш усуллари кун сайин такомиллашиб бормоқда. Лекин кўп ҳудудларда аҳвол эски ҳолатда, деярли ўнгланмасдан қолмоқда. Ислоҳотлар бир-икки муассасаларда эмас, мамлакатимиз тиббиёт тизимида сезилиши керак.


Фикр ва мулохазалар

Защита от автоматических сообщений

Сўнгги янгиликлар: